رەسەي پرەزيدەنتى ۆلاديمير پۋتين ۋنيۆەرسيتەتتەردى فيلولوگيا فاكۋلتەتتەرىنەن بولەك ورىس ءتىلى مەن ادەبيەتى فاكۋلتەتتەرىن اشۋعا شاقىردى. ول بۇل ۇسىنىسىن 2 ماۋسىم كۇنى رەسەيدەگى ورىس ءتىلى مەن حالىقتار تىلدەرىن قولداۋ سالاسىنداعى مەملەكەتتىك ساياساتتى جۇزەگە اسىرۋ جونىندەگى كەڭەس وتىرىسىندا ايتتى، دەپ حابارلايدى «ادىرنا» ءتىلشىسى DW-گە سىلتەمە جاساپ.
ءپۋتيننىڭ سوزىنشە، كوپتەگەن جوو-دا ورىس ءتىلى مەن ادەبيەتى شەتەل فيلولوگياسى سياقتى وزگە باعىتتارمەن بىرگە فيلولوگيا فاكۋلتەتتەرىنىڭ قۇرامىندا وقىتىلادى. ونىڭ پىكىرىنشە، مۇنداي ءتاسىل «ورىس ءتىلىنىڭ مەملەكەت ءۇشىن ماڭىزىن تولىق دەڭگەيدە كورسەتپەيدى».
پرەزيدەنت وتكەن جىلى اننەكسيالانعان قىرىم اۋماعىنداعى ۆەرنادسكي اتىنداعى قىرىم فەدەرالدىق ۋنيۆەرسيتەتىندە دەربەس ورىس ءتىلى مەن ادەبيەتى فاكۋلتەتى اشىلعانىن اتاپ ءوتتى.
«قىرىمدىقتاردىڭ باستاماسىن باسقا دا فەدەرالدىق جوعارى وقۋ ورىندارى، اسىرەسە بولاشاق ءتىل جانە ادەبيەت مۇعالىمدەرىن دايارلايتىن ۋنيۆەرسيتەتتەر قولدايدى دەپ سەنەمىن»، – دەدى پۋتين.
وتىرىس بارىسىندا پۋتين ۇكىمەتتىڭ جوعارى وقۋ ورىندارىنا ارنالعان جاڭا ءبىلىم بەرۋ ءمودۋلىن ازىرلەۋ جوسپارى تۋرالى دا ايتتى. بۇل باعدارلاما اياسىندا ستۋدەنتتەر ورىس ءتىلىنىڭ كونستيتۋتسيالىق مارتەبەسىن جانە ەلدىڭ ءتىل ساياساتىن وقيتىن بولادى.
وتكەن جىلى رەسەي پرەزيدەنتى ءتىل ساياساتىنىڭ نەگىزگى قاعيداتتارىن بەكىتكەن ەدى. قۇجاتتا ورىس ءتىلى «مەملەكەتتىلىكتىڭ نەگىزى» رەتىندە سيپاتتالىپ، ونىڭ ء«داستۇرلى رۋحاني-ادامگەرشىلىك قۇندىلىقتارمەن» بايلانىسى ەرەكشە اتاپ كورسەتىلگەن.
سونداي-اق قۇجاتتا ورىس تىلىندە بالاماسى بار جاعدايدا شەتەلدىك سوزدەردى قولدانۋدان باس تارتۋعا شاقىرىلعان.
