كەلەر جىلى قازاقستاندىقتار زەينەتاقى جيناعىنىڭ ءبىر بولىگىن الا الادى. ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ناقتى كىمدەردىڭ قورداعى اقشانى پايدالانا الاتىنىن ەگجەي-تەگجەيلى بايانداپ بەردى.
زەينەتاقى جيناعىنىڭ ءبىر بولىگىن الۋ ءۇشىن شوتىڭىزدا تومەندەگىدەي اقشا بولۋى كەرەك:
20 جاس – 1 ملن 720 مىڭ تەڭگە;
30 جاس – 2 ملن 538 مىڭ تەڭگە;
35 جاس – 2 ملن 961 مىڭ تەڭگە;
40 جاس – 3 ملن 437 مىڭ تەڭگە;
45 جاس – 3 ملن 947 مىڭ تەڭگە;
50 جاس – 4 ملن 495 مىڭ تەڭگە;
55 جاس – 5 ملن 84 مىڭ تەڭگە;
59 جاس جانە ودان ءارى قاراي – 5 ملن 586 مىڭ تەڭگe.
بۇل تسيفرلار قاراپايىم حالىقتى شوشىتقان سەكىلدى. بۇگىندە ازاماتتار الەۋمەتتىك جەلىلەردە ءوز نارازىلىعىن ءبىلدىرىپ جاتىر.
«اسپاندا قالقي بەرمەي، جەردەگى ەسەپپەن ەسەپتەسە قايتەر ەدى؟!»
- «مەنىڭ جاسىم جيىرما سەگىزدە. 7 جىل مەديتسينانى وقىپ، 25 جاسىمدا ءبىتىردىم. جۇمىس ءوتىلىم 4-ءىنشى جىلعا بارادى. ايتپاعىم، زەينەتاقى قورىمداعى اقشا مولشەرى مۇندا مەنىڭ جاسىما كورسەتىلگەن كورسەتكىشتەن 5 ەسە از. سوندا بۇلار قالاي ەسەپتەگەن؟ اسپاندا قالقي بەرمەي، جەردەگى ەسەپپەن ەسەپتەسە قايتەر ەدى؟! قاراپ وتىرىپ قارنىڭ اشادى. تاعى دا باي، باعلاننىڭ بالالارىنىڭ جاعدايىن قاراستىرعان. قاراپايىم حالىق تاعى دا ءوز ماڭداي تەرمەن جيعان اقشاسىنىڭ راحاتىن كورە المايدى. 500 مىڭ ايلىق السا، قازاق ءۇي كەزەگىندە تۇرىپ نەسى بار؟!»،-دەپ جازبا قالدىردى دارىگەر قۋات داۋرەنۇلى Facebook پاراقشاسىندا.
ەسەپتەپ كورەلىك..
ەڭبەك مينيسترلىگىنىڭ اقپاراتىنا سۇيەنسەك، 30 جاستاعى ازاماتتىڭ جزق شوتىندا 2 ملن 518 مىڭ تەڭگە بولۋى ءتيىس. بۇل اقشانى جيناۋ ءۇشىن ءسىز 20 جاسىڭىزدان ۇزبەي جۇمىس جاساپ، ايىنا كەم دەگەندە 210 مىڭ تەڭگە تابۋىڭىز قاجەت. وسى ورايدا وتە قىزىق سۇراق تۋىندايدى: ديپلومى جوق ستۋدەنتكە اي سايىن بۇنداي اقشانى كىم تولەيدى؟ ستۋدەنت دەيمىز عوي، بۇگىندە ەڭبەك ءوتىلى بىرنەشە جىلدان اسقان مامانداردىڭ دا جالاقىسى بۇل سوماعا جەتە قويعان جوق. مينيسترلىك ەلدەگى احۋالدى ۇمىتىپ كەتكەن-اۋ، شاماسى.
«حالىق ايىنا 500 مىڭ تەڭگە تاپپايدى»
قايرات سەرىكۇلىنىڭ اۋىل شارۋاشىلىعى سالاسىندا جۇمىس جاساپ جۇرگەنىنە 25 جىلدىڭ ءجۇزى بولعان. دەسە دە، ول زەينەتاقى جيناعىنىڭ ءبىر بولىگىن الا المايتىنىن جەتكىزدى.
- جاستايىمنان جۇمىس جاساپ كەلە جاتىرمىن، بىراق قورداعى اقشام 3 ملن تەڭگەگە دە جەتپەدى. قاراپايىم حالىق ايىنا 500 مىڭ تەڭگە تاپپايدى عوي. بۇل سومانى ايىنا 100-150 مىڭ تەڭگە تاۋىپ، جيناۋ مۇمكىن ەمەس.
ايگۇل بولاتقىزى:
-مەن مادەنيەت سالاسىنىڭ قىزمەتكەرىمىن. 40 جىلدىق ەڭبەك ءوتىلىم بار. ءبىر قىزىعى، جينالعان سومام از. زەينەتاقى جيناعىنىڭ ءبىر بولىگىن الا الاتىن ازاماتتار تۋعاننانجۇمىس جاساعاندار-اۋ، شاماسى.
مايرا بەرىك:
- جولداۋدى ەستىگەندە ءبىر قۋانىپ ەدىك. اتتەگەن-اي! 30 جاسىندا 2,5 ميلليون جيناعان ادامنىڭ ءۇيسىز ءجۇرۋى مۇمكىن ەمەس قوي. باسپانا الا الماي جۇرگەندەر – 100-200 مىڭ جالاقى الاتىن جاندار. شىنايى مۇقتاجداردىڭ قولى تاعى دا جاقسى ومىرگە قولى جەتپەيىن دەپ تۇر.
كوپشىلىكتىڭ پىكىرى وسىنداي. الداعى ۋاقىتتا مينيسترلىك قاراپايىم حالىقتىڭ پىكىرىن ەسكەرىپ، وڭ شەشىم قابىلدايدى دەپ سەنەمىز.
ديانا اسان،
«ادىرنا» ۇلتتىق پورتالى
