قازاقستان پرەزيدەنتى قاسىم-جومارت توقاەۆ ۋكراينا باسشىسى ۆلاديمير زەلەنسكيدىڭ رەسەي پرەزيدەنتى ۆلاديمير پۋتينمەن قازاقستاندا كەزدەسۋ وتكىزۋ تۋرالى ۇسىنىسىنا جاۋاپ بەردى، دەپ حابارلايدى "ادىرنا" ۇلتتىق پورتالى.
مەملەكەت باسشىسىنىڭ ايتۋىنشا، قازاقستان اسكەري قاقتىعىستا دەلدال بولۋدى ماقسات ەتپەيدى.
«قازاقستان رەسەي مەن ۋكراينا اراسىنداعى سوعىستا ارااعايىن ەمەس جانە ءوزىن سولاي كورمەيدى. ەكى تاراپ تا داۋلى ماسەلەلەردى ەكىجاقتى نەگىزدە تالقىلاي الادى. ءبىز تەك الاڭ ۇسىنا الامىز. ەگەر رەسەي مەن ۋكراينا باسشىلارى قازاقستانعا كەلۋگە نيەت بىلدىرسە، كەلىسسوزدەردى وتكىزۋ ءۇشىن بارلىق قاجەتتى جاعداي جاسايمىز»، – دەدى توقاەۆ.
پرەزيدەنت قاقتىعىستىڭ تىم كۇردەلى ەكەنىن، تەك اۋماقتىق ماسەلە عانا ەمەس، تاريحي، ۇلتتىق، تىلدىك جانە ساياسي فاكتورلار دا شيەلەنىستى ۋشىقتىرىپ وتىرعانىن اتاپ ءوتتى.
سونىمەن قاتار توقاەۆ سوعىس جالعاسىپ جاتقاندا جوعارى دەڭگەيدەگى كەزدەسۋلەردەن ناقتى ناتيجە كۇتۋ قيىن ەكەنىن، الدىمەن ديپلوماتتار مەن ساراپشىلار دەڭگەيىندە دايىندىق قاجەت ەكەنىن ايتتى.
بۇعان دەيىن زەلەنسكي كەلىسسوزدەرگە تۇركيا، ساۋد ارابياسى، قاتار، اۆستريا جانە شۆەيتساريانى ۇسىنعانىن ايتىپ، قاجەت بولسا قازاقستان دا وسىنداي ورىن بولا الاتىنىن جەتكىزگەن. ال رەسەي پرەزيدەنتىنىڭ ءباسپاسوز حاتشىسى دميتري پەسكوۆ كەلىسسوزدەر الاڭى ەكىنشى كەزەكتەگى ماسەلە ەكەنىن، قازىرگى تاڭدا ەشقانداي جۇمىس توپتارى قۇرىلماعانىن مالىمدەگەن.
