ابۋ-دابيدە ۋكراينا، رەسەي جانە اقش اراسىنداعى كەلىسسوزدەر اياقتالدى. بۇل تۋرالى 11 قاراشادا تاسس جازدى، دەپ حابارلايدى «ادىرنا» ءتىلشىسى.
كەلىسسوزدەردىڭ اياقتالعانىن AFP اگەنتتىگى ۋكراينا دەلەگاتسياسىنداعى دەرەككوزگە، ال Reuters اتى-ءجونى اتالماعان دەرەككوزگە سىلتەمە جاساپ راستادى.
تاسس-تىڭ جازۋىنشا، كيەۆ پەن ماسكەۋ اسكەري تۇتقىنداردى اۋقىمدى تۇردە الماسۋعا كەلىسكەن. كەزدەسۋ 2 ساعاتقا جەپەي اياقتالۇان. ال AFP مالىمەتىنشە، اقش-تىڭ اراعايىندىعىمەن ءوتىپ جاتقان كەلىسسوزدەر بارىسىندا ۋكراينا رەسەيدەن اسكەري قيمىلداردى توقتاتۋدى تالاپ ەتكەن. ۋكراينا دەلەگاتسياسىنداعى دەرەككوزدىڭ ايتۋىنشا، تەك وسىدان كەيىن عانا ەۋروپاداعى بولاشاق قاۋىپسىزدىك جۇيەسىن تالقىلاۋعا بولادى.
بۇگىن ابۋ-دابيدە اقش-تىڭ اراعايىندىعىمەن رەسەي مەن ۋكراينا اراسىنداعى كەلىسسوزدەردىڭ ەكىنشى كۇنى باستالعان ەدى. كەزدەسۋ رەسەيدىڭ ۋكرايناعا قارسى سوعىسىن اياقتاۋ جونىندە ۋاعدالاستىققا قول جەتكىزۋگە باعىتتالعان.
«الدىمەن اقش پەن رەسەيدىڭ قاتىسۋىمەن ۇشجاقتى فورماتتا كەزدەسۋ وتكىزەمىز. ودان كەيىن ەۋروپاداعى سەرىكتەستەرىمىزبەن جەكە كەزدەسەمىز»، – دەدى ۋكراينا دەلەگاتسياسىنىڭ باسشىسى، ۋكراينانىڭ سىرتقى بارلاۋ قىزمەتىنىڭ جەتەكشىسى رۇستەم ۋمەروۆ.
ابۋ-دابيدەگى كەلىسسوزدەردىڭ قايتا جالعاسقانى تۋرالى رەسەي باق-تارى دا حابارلادى. ۇشجاقتى كەزدەسۋدىڭ ەكىنشى كۇنىندە ەنەرگەتيكا ماسەلەلەرى، قارا تەڭىزدەگى قاۋىپسىزدىك جانە جوعارى دەڭگەيدەگى ىقتيمال كەزدەسۋ تالقىلاناتىنى ايتىلعان.
ال AFP اگەنتتىگى ۋكراينانىڭ جوعارى لاۋازىمدى وكىلىنە سىلتەمە جاساپ، كيەۆ سوعىس اياقتالعاننان كەيىن كەمىندە 10 جىل بويى 800 مىڭ اسكەري قىزمەتكەردەن تۇراتىن ارميانى ۇستاۋعا قارجى ءبولۋدى كوزدەپ وتىرعانىن جازدى. ۋكراينا مۇنى رەسەي تاراپىنان بولۋى مۇمكىن جاڭا اسكەري اگرەسسيادان قورعانۋ ءۇشىن قاجەت دەپ سانايدى.
بىرىككەن اراب امىرلىكتەرىنىڭ استاناسىندا وتكەن كەلىسسوزدەردىڭ العاشقى كۇنىندە كيەۆ پەن ماسكەۋ وكىلدەرى قاۋىپسىزدىك كەپىلدىكتەرى مەن اسكەري تۇتقىنداردى «1000-عا 1000» نەمەسە «1500-گە 1500» فورمۋلاسى بويىنشا الماسۋ ماسەلەلەرىن تالقىلاعان.
كەلىسسوزدەردە اۋماقتىق ماسەلە دە كوتەرىلگەن. زەلەنسكيدىڭ ايتۋىنشا، بۇل تاقىرىپتى رەسەي دەلەگاتسياسى قوزعاعان.
«رەسەيلىكتەر دونباسس اۋماعىنىڭ جارتىسىن باسىپ الدىق دەپ ەسەپتەيدى جانە سونى العا تارتادى. الايدا ول اۋماق، شىن مانىندە، ءبىزدىڭ باقىلاۋىمىزدا. بۇل تۋرالى رەسەيلىك دەلەگاتسيا قۇرامىنداعى اسكەري وفيتسەرلەر مەن بارلاۋ وكىلدەرى بايىپپەن ايتتى»، – دەدى ول.
سونداي-اق زەلەنسكي مايدانداعى جاعدايعا قاتىستى ۋكراينانىڭ باعاسىن امەريكالىق تاراپ تا راستاعانىن اتاپ ءوتتى.
Financial Times باسىلىمىنىڭ مالىمەتىنشە، ەۋروپا شەنەۋنىكتەرى قىرعي-قاباق سوعىس كەزەڭىندە قولدانىلعان قاقتىعىستاردىڭ الدىن الۋ تەتىكتەرىن قايتا قالپىنا كەلتىرۋ ماسەلەسىن تالقىلاۋعا دايىن. ولاردىڭ قاتارىندا اقش پەن كسرو-عا ءبىر-ءبىرىنىڭ اسكەري نىساندارىن باقىلاۋعا مۇمكىندىك بەرگەن اشىق اسپان تۋرالى شارت جانە زىمىرانداردىڭ جەكەلەگەن تۇرلەرىن ورنالاستىرۋدى شەكتەيتىن كەلىسىمدەر بار.
ال Axios باسىلىمىنىڭ حابارلاۋىنشا، ابۋ-دابيدەگى كەلىسسوزدەردەن كەيىن اق ءۇيدىڭ ارنايى وكىلدەرى ستيۆ ۋيتكوفف پەن دجارەد كۋشنەر ماسكەۋ مەن كيەۆكە بارۋى مۇمكىن.
