بۇگىن، 11 قاراشا كۇنى ماسكەۋدە ۇقشۇ ۇجىمدىق قاۋىپسىزدىك كەڭەسىنىڭ كەزەكتى وتىرىسى ءوتتى. بۇل تۋرالى اقوردا جازدى، دەپ حابارلايدى «ادىرنا» ءتىلشىسى.
سامميتكە پرەزيدەنت قاسىم-جومارت توقاەۆپەن بىرگە رەسەي فەدەراتسياسىنىڭ باسشىسى ۆلاديمير پۋتين, بەلارۋس پرەزيدەنتى الەكساندر لۋكاشەنكو، قىرعىز پرەزيدەنتى سادىر جاپاروۆ, تاجىكستان رەسپۋبليكاسىنىڭ پرەزيدەنتى ەمومالي راحمون, سونداي-اق ۇقشۇ باس حاتشىسى تاالاتبەك ماسادىكوۆ قاتىستى.
مەملەكەتتەر باسشىلارى ۇقشۇ اياسىنداعى ىقپالداستىقتىڭ نەگىزگى اسپەكتىلەرىن قاراستىرىپ، ۇيىمنىڭ 2026 جىلى اتقارعان قىزمەتىنىڭ ناتيجەسىنە باعا بەردى ءارى الداعى كەزەڭگە ارنالعان جۇمىستىڭ باستى باعىتتارىن ايقىندادى.
سونداي-اق پرەزيدەنتتەر حالىقارالىق جانە وڭىرلىك قاۋىپسىزدىكتىڭ وزەكتى ماسەلەلەرى جونىندە پىكىر الماستى.
قاسىم-جومارت توقاەۆ قوناقجايلىق تانىتقانى ءۇشىن ۆلاديمير پۋتينگە ريزاشىلىعىن ءبىلدىرىپ، رەسەي تاراپىنىڭ بيىل ۇقشۇ-عا وتە ناتيجەلى توراعالىق ەتكەنىن اتاپ ءوتتى.
پرەزيدەنت حالىقارالىق تەرروريزممەن كۇرەس، ەسىرتكى زاتتارىنىڭ زاڭسىز اينالىمىنا قارسى ءىس-قيمىل، سونداي-اق جاساندى ينتەللەكت تەحنولوگياسىنىڭ ىقپالى ۇلعايىپ كەلە جاتقانىن ەسكەرە وتىرىپ، اقپاراتتىق قاۋىپسىزدىكتى نىعايتۋ باعىتتارى بويىنشا كۇش-جىگەر جۇمىلدىرۋ قاجەت ەكەنىنە نازار اۋداردى.
قازاقستان پرەزيدەنتى ءسوز سوڭىندا ۇقشۇ-عا توراعالىق ەتەتىن تاجىكستاننىڭ كوشباسشىسى ەمومالي راحموندى قۇتتىقتاپ، وسى جاۋاپتى ميسسيانى اتقارۋدا ساتتىلىك تىلەدى.
