ۋكراينا رەسەيمەن كەلىسسوزدەردى ىلگەرىلەتىپ، بەيبىتشىلىككە قول جەتكىزۋ ماقساتىندا اقش ۇسىنعان شەكارانى قايتا قاراۋ جونىندەگى جاڭا باستامانى قابىلدامادى. بۇل تۋرالى The Telegraph جازدى، دەپ حابارلايدى «ادىرنا» ءتىلشىسى.
باسىلىمنىڭ مالىمەتىنشە، امەريكالىق كەلىسسوز جۇرگىزۋشىلەر اۋماقتىق ىمىراعا كەلۋ نۇسقاسىن ۇسىنعان. بۇل ۇسىنىس بويىنشا رەسەي دونباستاعى مايدان شەبىن تولىق باقىلاۋعا العانىن مالىمدەي الادى. الايدا ۋكراينا ءوزى باقىلاۋىندا ۇستاپ وتىرعان قالالاردى بەرۋگە مىندەتتى بولمايدى.
دەگەنمەن، ابۋ-دابيدەگى كەلىسسوزدەرگە جاقىن ۋكراينالىق دەرەككوز The Telegraph باسىلىمىنا بەرگەن تۇسىنىكتەمەسىندە كيەۆتىڭ اۋماقتىق جەڭىلدىكتەردى تالقىلاماعانىن اتاپ وتكەن.
«ۋكراينا دەلەگاتسياسى اۋماقتىق ماسەلەلەر بويىنشا ەشقانداي جەڭىلدىكتەردى تالقىلاعان ەمەس»،- دەدى دەرەككوز.
بۇعان دەيىن The Economist باسىلىمى اق ۇيدە ۋكراينانىڭ اكىمشىلىك شەكارالارىن قايتا قاراۋ تۋرالى ۇسىنىس تالقىلانىپ جاتقانىن راستاعان ەدى. اسىرەسە دونەتسك جانە لۋگانسك وبلىستارىنىڭ شەكارالارىن وزگەرتۋ ماسەلەسى قاراستىرىلىپ جاتقانى ايتىلدى.
ال Politico باسىلىمى امەريكالىق رەسمي تۇلعالارعا سىلتەمە جاساپ، ابۋ-دابيدە وتكەن ۇشجاقتى كەلىسسوزدەردە رەسەي مەن ۋكراينا اۋماقتىق ماسەلەدە «يكەمدىلىك تانىتۋعا» دايىن ەكەنىن كورسەتكەنىن جازعان.
«جەكە اڭگىمەلەردە بۇل كەزدەسۋدى ۇيىمداستىرعان امەريكالىق رەسمي تۇلعالار رەسەي دە، ۋكراينا دا اۋماقتىق ماسەلەدە بەلگىلى ءبىر دەڭگەيدە يكەمدىلىك تانىتۋعا دايىن ەكەنىن كورسەتكەنىن اتاپ ءوتتى»، – دەلىنگەن جاريالانىمدا.
سونداي-اق ابۋ-دابيدەگى كەلىسسوزدەردى اشقان اقش پرەزيدەنتىنىڭ ارنايى وكىلى دجارەد كۋشنەر رەسەي باسشىلىعىنىڭ بەيبىتشىلىككە دايىندىعى تۋرالى پىكىر بىلدىرگەن.
«ەۋروپالىقتار بىزگە ءجيى قوياتىن سۇراقتاردىڭ ءبىرى – رەسەيلىكتەر مەن پرەزيدەنت ءپۋتيننىڭ شىنىمەن بەيبىتشىلىككە دايىن ەكەندىگى. ستيۆپەن (ۋيتكوففپەن – رەد.) بىرگە ءتيىستى جاعداي جاسالسا، بۇعان تولىق سەنىمدى ەكەنىمىزدى ايتا الامىز»، – دەدى ول.
كۋشنەر ەكى كۇنگە جوسپارلانعان كەلىسسوزدەردەگى ماقساتى رەسەيلىك تاراپتى «ەۋروپالىقتاردى دا كەزدەسۋلەرگە قاتىستىرۋعا اقىرى كوندىرۋ» ەكەنىن جەتكىزگەن. الايدا ەۋروپالىق وكىلدەر رەسەي دەلەگاتسياسى زالعا كىرمەي تۇرىپ، كەلىسسوزدەر وتەتىن ورىندى تاستاپ كەتكەن.
The Telegraph باسىلىمىنىڭ جازۋىنشا، امەريكالىق شەنەۋنىكتەر كيەۆ پەن ماسكەۋ اراسىنداعى اۋماقتىق ماسەلەلەر بويىنشا قانداي دا ءبىر ىمىراعا ەۋروپانىڭ قاۋىپسىزدىك ارحيتەكتۋراسى تالقىلانبايىنشا قول جەتكىزۋ مۇمكىن ەمەس دەپ ەسەپتەيدى.
