قوستاناي وبلىسىندا 60 ءۇيدى سۋ باستى. بۇل تۋرالى وبلىستىق توتەنشە جاعدايلار دەپارتامەنتىنىڭ باسشىسى تالعات كاكىموۆ بريفينگ بارىسىندا ءمالىم ەتتى، دەپ حابارلايدى قازاقپارات.
دەپارتامەنت باسشىسىنىڭ ايتۋىنشا، ازىرگە قار سۋىنان قاراسۋ اۋدانىنىڭ قارامىرزا اۋىلى عانا زارداپ شەكتى. قالعان وڭىرلەردەگى جاعداي بىرقالىپتى.
«7 ءساۋىر كۇنى تاڭەرتەڭ ءتىنتۋىر وزەنىندە سەڭ ءجۇرىپ، سۋ قالىپتى اقتى. ساعات 15.30 شاماسىندا اۋا رايى كۇرت قۇبىلىپ، جەلدىڭ ەكپىنى سەكۋندىنا 30 مەترگە دەيىن جەتتى. جەل بىردە وڭتۇستىك-باتىستان سوقسا، ەندى بىردە سولتۇستىك-باتىسقا اۋىستى. سونىڭ اسەرىنەن وزەندە 25-30 سانتيمەترگە دەيىن جەتەتىن تولقىن پايدا بولىپ، وزەن ارناسىنان شىقتى. سۋ قارامىرزا ەلدى مەكەنىنە دەيىن جەتتى. ساعات 16.30-دا 60 تۇرعىن ءۇيدى سۋ باستى. 8 ساۋىردە سۋ دەڭگەيىنىڭ قارقىندى تومەندەۋى باستالدى»، - دەدى تالعات كاكىموۆ.
سۋ ۇيلەردىڭ ىشىنە دەيىن كىرمەگەن، تجد قىزمەتكەرلەرى ارنايى قۇرىلعىلاردىڭ كومەگىمەن دەر كەزىندە سۋدى سورعىزۋ جۇمىستارىن جۇرگىزگەن. وبلىس اكىمدىگى سۋ تاسقىنىنان زارداپ شەككەن تۇرعىنداردى قولداۋ ءۇشىن سۋ باسقان ءۇيدىڭ يەلەرىنە 50 اەك (138 900 مىڭ تەڭگە) كولەمىندە جانە اۋلاسىنا سۋ كىرگەن تۇرعىندارعا 25 اەك (69 450 مىڭ تەڭگە) كولەمىندە وتەماقى تولەمەك.
قازىرگى ۋاقىتتا تۇرعىندارعا ازىق-تۇلىك قورجىنى ازىرلەنىپ جاتىر.
