قوستاناي اۋەجايىندا اۋەگە كوتەرىلگەن ۇشاقتىڭ شاسسي دوڭگەلەگى ورتەندى. وقيعانى Qazaq Air اۋە كومپانياسىنىڭ ءباسپاسوز قىزمەتى راستادى، دەپ حابارلايدى “ادىرنا”..
تەحنيكالىق تەكسەرۋ جۇرگىزۋ ءۇشىن وڭىرگە ارنايى كوماندا جىبەرىلدى.
ۆەدومستۆونىڭ مالىمەتىنشە، 2025 جىلعى 11 قازاندا قوستاناي – استانا باعىتىنداعى IQ368 تۇراقتى رەيسىن ورىنداۋ كەزىندە قوستاناي اۋەجايىندا اۋە كەمەسىندە تەحنيكالىق اقاۋ تىركەلىپ، ۇشۋ توقتاتىلعان. اۋە كومپانيا اقپاراتىنا سايكەس، كەيبىر جولاۋشى شاسسي ماڭىندا قىسقا مەرزىمدى وت ۇشقىنى بايقالعانىن حابارلاعان. بۇل دەرەك تەحنيكالىق تەكسەرىس كەزىندە نازارعا الىناتىن بولادى.
اتالعان وقيعا تۋرالى اقپارات جەرگىلىكتى باق-تا جاريالاندى.
“قوستانايعا اقاۋدى تەكسەرىپ، جويۋ ءۇشىن تەحنيكالىق كوماندا جىبەرىلدى. جولاۋشىلارعا قوناقۇيگە ورنالاستىرۋ، بيلەت قۇنىن قايتارۋ نەمەسە باسقا رەيستەرگە اۋىستىرۋ ۇسىنىلدى”، — دەپ حابارلادى اۋە كومپانيانىڭ ءباسپاسوز قىزمەتى.
كومپانيا وكىلدەرى جولاۋشىلار مەن ەكيپاجدىڭ قاۋىپسىزدىگى — باستى باسىمدىق ەكەنىن، بارلىق ءىس-ارەكەتتىڭ حالىقارالىق ۇشۋ قاۋىپسىزدىگى ستاندارتتارىنا قاتاڭ سايكەستىكتە ورىندالاتىنىن اتاپ ءوتتى.
اتالعان وقيعاعا بايلانىستى قازاقستان رەسپۋبليكاسى كولىك مينيسترلىگى دە پىكىر ءبىلدىردى.
“Qazaq Air اۋە كومپانياسىنىڭ قوستاناي – استانا باعىتىنداعى رەيسى كەزىندە بولعان اۆياتسيالىق وقيعانى تەرگەۋ ءۇشىن ازاماتتىق جانە تاجىريبەلىك اۆياتسيا سالاسىنداعى اۆياتسيالىق وقيعالار مەن ينتسيدەنتتەردى ەسەپكە الۋ جانە تەرگەپ-تەكسەرۋ قاعيدالارىنا سايكەس كوميسسيا قۇرىلاتىن بولادى. تەرگەۋدى قر كولىك مينيسترلىگىنىڭ كولىك وقيعالارى مەن ينتسيدەنتتەرىن تەرگەۋ دەپارتامەنتى جۇرگىزەدى”، — دەپ حابارلادى ۆەدومستۆو.
