جەڭىس كۇنى قارساڭىندا قوستاناي وبلىسىنىڭ اكىمى قۇمار اقساقالوۆ ەكىنشى دۇنيەجۇزىلىك سوعىس ارداگەرلەرىن ارنايى بارىپ قۇتتىقتادى. كەزدەسۋ بارىسىندا ءوڭىر باسشىسى مايدانگەرلەرگە سوعىس جىلدارىنداعى ەرلىگى، قايسارلىعى مەن وتان الدىنداعى جانقيار قىزمەتى ءۇشىن شىنايى العىسىن ءبىلدىردى.
وبلىس اكىمىنىڭ ايتۋىنشا، جەڭىمپاز ۇرپاقتىڭ ەرلىگى — وتانسۇيگىشتىكتىڭ، اسقاق رۋحتىڭ جانە ەلگە ادال قىزمەت ەتۋدىڭ ماڭگىلىك ۇلگىسى. ول ارداگەرلەرگە قامقورلىق جاساۋ مەن تاريحي جادىنى ساقتاۋ مەملەكەتتىڭ باستى مىندەتتەرىنىڭ ءبىرى ەكەنىن اتاپ ءوتتى.
وبلىس اكىمدىگىنىڭ مالىمەتىنشە، جەڭىس كۇنىنە وراي ۇلى وتان سوعىسىنا قاتىسۋشىلارعا 5 ميلليون تەڭگە كولەمىندە بىرجولعى الەۋمەتتىك كومەك بەرىلدى. بۇل شەشىم ارداگەرلەر مەن تىل ەڭبەككەرلەرىن قولداۋ ماقساتىندا قابىلدانعان.
بۇگىندە قوستاناي وبلىسىندا تۇراتىن بارلىق مايدانگەرلەر 100 جاستان اسقان. سوعان قاراماستان، ولار ومىرگە دەگەن توزىمدىلىكتىڭ، دانالىقتىڭ جانە ەلگە ادالدىقتىڭ سيمۆولى بولىپ وتىر.
ارداگەرلەردىڭ قاتارىندا اقىن، ۇستاز ءارى جۋرناليست قاسىمحان الدابەرگەنوۆ بار. ول وڭىردەگى ءبىلىم، مادەنيەت جانە رۋحانيات سالاسىنىڭ دامۋىنا ۇلكەن ۇلەس قوستى. دىلدابەك نۇرىشەۆ سوعىستان كەيىن وبلىستىڭ دامۋىنا ەڭبەك ءسىڭىرىپ، ەڭبەك اۋلەتىنىڭ نەگىزىن قالاعان. ال بۇرىنعى تانك كومانديرى ميحايل پودولياكوۆ ۇزاق جىلدار مەملەكەتتىك قىزمەتتە ەڭبەك ەتىپ، ارداگەرلەر قوزعالىسىنىڭ دامۋىنا بەلسەندى اتسالىستى.
ءوڭىر باسشىسى ارداگەرلەرگە زور دەنساۋلىق، اماندىق جانە ۇزاق عۇمىر تىلەپ، مايدانگەرلەرگە قۇرمەت كورسەتۋ مەن تاريحي جادىنى ساقتاۋ ءاردايىم ماڭىزدى مىندەت بولىپ قالا بەرەتىنىن ايتتى.
