قوستانايدا قازاق پوەزياسىنىڭ كورنەكتى وكىلى، اقىن ءارى اۋدارماشى كەڭشىلىك اعىتايۇلى مىرزابەكتىڭ تۋعانىنا 80 جىل تولۋىنا ارنالعان «ىڭكار دۇنيە» ادەبي-سازدى كەشى ءوتتى.
اقىننىڭ 80 جىلدىعىنا ارنالعان ادەبي كەشكە قاتىسۋشىلارعا مەملەكەت باسشىسى قاسىم-جومارت توقاەۆتىڭ جولداعان قۇتتىقتاۋىن قازاقستان رەسپۋبليكاسى پرەزيدەنتىنىڭ كەڭەسشىسى مالىك وتارباەۆ وقىپ بەردى.
پرەزيدەنت ءوز قۇتتىقتاۋىندا كەڭشىلىك مىرزبەكتى قازاق پوەزياسىنا ايرىقشا قولتاڭباسىمەن كەلىپ، ءتول ادەبيەتتىڭ دامۋىنا ەلەۋلى ۇلەس قوسقان دارىندى تۇلعا رەتىندە اتاپ ءوتتى.
«كەڭشىلىك مىرزابەك – قازاق پوەزياسىنا ايرىقشا قولتاڭباسىمەن كەلىپ، ءتول ادەبيەتىمىزدى دامىتۋعا ەلەۋلى ۇلەس قوسقان دارىندى تۇلعا. ونىڭ سىرشىل جىرلارىندا تۋعان جەرگە دەگەن سۇيىسپەنشىلىك، ەل تاعدىرىنا دەگەن جاۋاپكەرشىلىك جانە ادام بولمىسىنىڭ تەرەڭ يىرىمدەرى شەبەر سۋرەتتەلدى. اقىننىڭ ازاماتتىق ءۇنى مەن كوركەمدىك ىزدەنىسى ۇلتتىق ءسوز ونەرىنىڭ ءورىسىن كەڭەيتتى»، – دەلىنگەن پرەزيدەنتتىڭ قۇتتىقتاۋىندا.
مەملەكەت باسشىسى اقىننىڭ شىعارماشىلىق مۇراسىن حالقىمىزدىڭ رۋحانياتىنا قوسىلعان قۇندى قازىنا دەپ اتاپ، ونىڭ ەڭبەكتەرىن جيناقتاۋ مەن جان-جاقتى زەرتتەۋدىڭ ماڭىزدىلىعىنا نازار اۋداردى.
«كەڭشىلىك مىرزابەكتىڭ تاعىلىمدى مۇراسى – حالقىمىزدىڭ رۋحانياتىنا قوسىلعان قۇندى قازىنا. اقىننىڭ شىعارمالارىن جيناقتاۋ، جان-جاقتى زەرتتەۋ – بارشامىزدىڭ ورتاق مىندەتىمىز»، – دەدى مەملەكەت باسشىسى.
قۇتتىقتاۋدا مەملەكەت باسشىسى ءسوز زەرگەرىنىڭ ەسىمى ەل جادىندا ساقتالىپ، شوقتىعى بيىك شىعارمالارى حالقىمەن بىرگە جاساي بەرەتىنىنە سەنىم ءبىلدىردى.
سالتاناتتى شارادا قوستاناي وبلىسىنىڭ اكىمى قۇمار اقساقالوۆ اقىننىڭ شىعارماشىلىق مۇراسىنىڭ ماڭىزدىلىعىنا توقتالىپ، وڭىردە ادەبيەت پەن رۋحانياتتى دارىپتەۋگە باعىتتالعان جۇمىستاردىڭ جۇيەلى جۇرگىزىلىپ كەلە جاتقانىن اتاپ ءوتتى.
«توبىل-تورعاي ءوڭىرى اقىندارىن ەرەكشە ارداق تۇتقان ەل. ءبىز رۋحانياتتى دامىتۋ، ادەبي مۇرانى دارىپتەۋ جانە قالامگەرلەر ەڭبەگىن كەڭىنەن ناسيحاتتاۋ جۇمىستارىن جۇيەلى جالعاستىرىپ كەلەمىز. كەڭشىلىك اقىننىڭ قۇرمەتىنە تورعايدا جاس تالانتتاردىڭ بايقاۋى ۇيىمداستىرىلدى. تۋعان جەردەن باستاۋ العان رۋحاني شارا بۇگىن قوستاناي تورىندە جالعاسىپ وتىر. اقىننىڭ جىرلارى مەن ونەگەسى ۇرپاقتان-ۇرپاققا جەتىپ، رۋحاني مۇرا بولىپ قالا بەرەدى»، – دەدى ءوڭىر باسشىسى.
كەڭشىلىك مىرزابەك 1946 جىلى جانگەلدين اۋدانىنىڭ اقشىعاناق اۋىلىندا دۇنيەگە كەلگەن. 42 جىل عۇمىر كەشكەن اقىن قازاق ادەبيەتىندە وزىندىك قولتاڭباسىن قالىپتاستىرىپ، تۋعان جەرگە دەگەن سۇيىسپەنشىلىكتى، ەل تاعدىرىنا جاۋاپكەرشىلىكتى جانە ادام بولمىسىن تەرەڭ جىرلادى.
قالامگەردىڭ «ىڭكار دۇنيە»، ء«دۇبىرلى داۋرەن»، ء«سارۋار»، «بالالىق شاق باللادالارى»، ء«داۋىر – داستان» اتتى جىر جيناقتارى وقىرمانعا كەڭىنەن تانىلدى. «بالالىق شاق باللادالارى» جيناعى ءۇشىن اقىن 1987 جىلى ءىلياس جانسۇگىروۆ اتىنداعى سىيلىقتىڭ لاۋرەاتى اتاندى.
