Qazaq Creative Hub الاڭىندا «كرەاتيۆتى يندۋستريالاردى دامىتۋ قورى» كورپوراتيۆتىك قورى جۇزەگە اسىرىپ جاتقان Creative Aimaq رەسپۋبليكالىق جوباسى اياسىندا ۇيىمداستىرىلعان QOSTANAI CREATIVE CULTURE كرەاتيۆتى جارمەڭكەسى ءوز مارەسىنە جەتتى.
ەكى كۇن بويى جارمەڭكە قوستاناي وبلىسىنىڭ تاريحي-مادەني مۇراسىن، ۇلتتىق قولونەرىن، اۆتورلىق برەندتەرىن، زاماناۋي تەحنولوگيالارىن جانە كرەاتيۆتى يندۋستريالارىن ءبىر الاڭدا توعىستىردى. ءىس-شاراعا 1 320 ادام كەلىپ، ءوڭىر كرەاتورلارىنىڭ اۆتورلىق ونىمدەرى 4 ملن 414 مىڭ تەڭگەگە ساتىلدى. بۇل وڭىرلىك كرەاتيۆتى يندۋستريالاردىڭ ەكونوميكالىق الەۋەتى جوعارى ەكەنىن جانە قازاقستاندىق كرەاتيۆتى ونىمدەرگە دەگەن سۇرانىستىڭ ارتىپ كەلە جاتقانىن كورسەتتى.
باعدارلامانىڭ ەڭ ايتۋلى ساتتەرىنىڭ ءبىرى – بيىل قوستاناي ءوڭىرىنىڭ ەنشىسىنە بۇيىرعان رەسپۋبليكالىق «التىن دومبىرا» ايتىسىنىڭ باس جۇلدەسىنىڭ كوپشىلىك نازارىنا ۇسىنىلۋى بولدى. كەلۋشىلەر جۇلدە يەگەرى ايبەك قاليەۆپەن جۇزدەسىپ، اتاۋلى دومبىرالار كورمەسىن، ۇلتتىق مۋزىكالىق اسپاپتار توپتاماسىن جانە تاريحي تۇلعالارعا ارنالعان ەكسپوزيتسيالاردى تاماشالادى.
سونىمەن قاتار قوستاناي ديزاينەرلەرىنىڭ ەتنوستيلدەگى ءسان كورسەتىلىمى، نيۋ-يوركتەگى MobFilm Festival حالىقارالىق كينوفەستيۆالىنىڭ ءفيناليسى اتانعان «قالام» ءموبيلدى ءفيلمىنىڭ تانىستىرىلىمى، قوستاناي وڭىرلىك ۋنيۆەرسيتەتى ستۋدەنتتەرىنىڭ يننوۆاتسيالىق ينجەنەرلىك جوبالارى مەن قازاقستانداعى العاشقى ستۋدەنتتىك جارىس بوليدۋ كوپشىلىك نازارىنا ۇسىنىلدى.
ەكى كۇن بويى زەرگەرلىك ونەر، اعاش جانە بىلعارى وڭدەۋ، كيىز باسۋ، قىش ونەرى، ۇلتتىق ويۋ-ورنەك پەن ساندىك-قولدانبالى ونەر باعىتتارى بويىنشا شەبەرلىك ساباقتارى ۇيىمداستىرىلىپ، كەلۋشىلەر ۇلتتىق قولونەردىڭ قىر-سىرىمەن تانىسىپ، بۇيىمداردى جاساۋ پروتسەسىنە تىكەلەي قاتىستى. سونداي-اق ەلىمىزدەگى تۇڭعىش فولكلورلىق-ەتنوگرافيالىق ۇجىمداردىڭ ءبىرى – «شەرتەر» ءانسامبلى ونەر كورسەتىپ، ۇلتتىق مۋزىكالىق مۇرانى دارىپتەدى.
