ءتىل ماسەلەسىندەگى ءبىر جاعىمدى ءۇردىس تۋرالى ايتا سالايىن.
وتكەندە ءبىر اعامىز "جيىرما جىل بۇرىن جازعاندارىمدى وقىسام، ۇيالامىن. باستان اياق كالكا!" دەدى. ءوزىم دە 2012 جىلى تولستويدىڭ كۇندەلىگىن اۋدارعانمىن ازداپ. كەيىن سونى وقىپ، تۋرا سولاي ۇيالعانمىن.
قالىپتاسا باستاعان كالكالاردان قاشىپ، قازاقشا ورالىمداردى ىزدەي باستاۋىمىزعا بىرنەشە ادام سەبەپ بولدى عوي دەپ ويلايمىن. ءوزىم وسى ماسەلەگە كەلگەندە ءبىرىنشى كەزەكتە مارقۇم بەكبولات ادەتوۆتى ويلايمىن. و كىسى 2010 جىلدارى كەرەمەت-كەرەمەت ماقالا جازىپ ءجۇردى. بەرتىندە گۇلنار سالىقباي اپايىمىزدىڭ ءتىزىپ تۇرىپ 7-8 قاتەنى تۇزەگەن ءسوزى كوپ جەرگە تاراپ، ۇلكەن پايداسىن تيگىزدى. قاينار ولجاي، ساكەن سىبانباي اعالارىمىزدىڭ ءتىل تازالىعى جونىندەگى پوستتارى دا جۋرناليستەرگە پايداسى ەرەسەن بولعانىنا كۇمان جوق. باتىربولات ايت-بولاتۇلى اعا رەسمي ءتىلدى تازالاۋ ءۇشىن از الىسقان جوق. تاعى دا سول سەكىلدى ءدال قازىر مەنىڭ ەسىمە تۇسپەي تۇرعان نەمەسە مەن كورمەي جۇرگەن كىسىلەر بولۋى مۇمكىن (ولاردىڭ اتتارىن سىزدەر جازا وتىرىڭىزدار). بىراق دەيمىن عوي، بارىنەن دە بۇرىن، تۇراقتى جازىپ، قايمىقپاي الىسىپ كەلە جاتقان ءبىر ادام بولسا، ول نازگۇل قوجابەك قوي. دەستە-دەستە ءماتىن وقىپ، سونىڭ ىشىنەن تاپقانىن بىزگە ايتىپ، توقتاۋسىز الىسىپ كەلە جاتىر. ءبارىمىز قوسىلىپ ءبىر "راح-مەت!" دەپ قويساق تا ارتىق ەتپەيتىندەي.
Muqaba باسپاسىنان شىعۋى ءتيىس ءبىر كىتاپ الدىما كەلگەن سوڭ، باسقا جۇمىستاردىڭ اراسىندا كۇنىنە 5-6 بەتتەن بولسا دا وقي بەرەيىنشى دەپ اشقانمىن. ىشىندە ۇزاق جىلدار دەگەن كالكانى كورىپ قالدىم. قانشاما جىل دەسە دە، جىلدار بويى دەسە دە ءبارى ورىن-ورنىنا كەلە قالايىن دەپ تۇرعان دۇنيە عوي، بىراق كالكاعا قارسى يممۋنيتەتى ويانباعان ادام سويلەگەندە كەرەمەت سويلەسە دە، ءار ءسوزدىڭ ءمانىن تەرەڭ ۇعىناتىن ادام بولسا دا جازعان كەزدە، اسىرەسە اۋدارعان كەزدە سونداي كالكالارعا قالاي ۇرىنعانىن بايقاماي قالادى ەكەن.
قىسقاسى، كوپ جاعىنان زيان شەگىپ جاتقان ءتىلىمىز قالام ۇستاعان ورتا جاستاعى ادامداردىڭ اراسىندا بولسا دا اقىرىنداپ ەمدەلىپ تە جاتىر ەكەن.
ارمان المەنبەت
