امەريكالىق جازۋشى ءارى اۋدارماشى جەيك زاۆلاتسكي قازاقتىڭ كورنەكتى اعارتۋشىسى، عالىمى جانە قوعام قايراتكەرى احمەت بايتۇرسىنۇلىنىڭ «ماسا» اتتى ولەڭدەر جيناعىن اعىلشىن تىلىنە اۋدارىپ، جەكە كىتاپ رەتىندە باسىپ شىعاردى، دەپ حابارلايدى "ادىرنا".
Turkystan.kz باسىلىمىنىڭ جازۋىنشا، ورتالىق ازيا مادەنيەتىن ۇزاق جىلدار زەرتتەگەن اۋدارماشى بۇعان دەيىن قازاقستان، قىرعىزستان جانە موڭعوليادا تۇرىپ، ءوڭىردىڭ تاريحى مەن ادەبيەتىنە قىزىعۋشىلىق تانىتقان.
اۋدارماشىنىڭ ايتۋىنشا، ول قازاق مادەنيەتىمەن تانىسقاننان بەرى الاش قوزعالىسىنا ەرەكشە قىزىعۋشىلىق تانىتىپ كەلەدى. سوندىقتان الاش قايراتكەرلەرىنىڭ ءبىرىنىڭ شىعارماسىن اعىلشىن تىلىنە اۋدارۋدى ماقسات ەتكەن.
«مەن ءۇشىن الاش قايراتكەرلەرى – ءوز زامانىنان وزا تۋعان تۇلعالار. ولار قازاق ۇلتىنىڭ بولاشاعىن ەرتە بولجاي ءبىلدى جانە مادەنيەتتى جاڭا دەڭگەيگە كوتەرۋگە كۇش سالدى. سول سەبەپتى ولاردىڭ مۇراسىن شەتەل وقىرمانىنا تانىستىرۋدى ءجون كوردىم»، – دەيدى جەيك زاۆلاتسكي.
ونىڭ سوزىنشە، «ماسا» جيناعىن اۋدارۋ بارىسىندا بىرقاتار قيىندىقتار كەزدەسكەن. اسىرەسە قازاق پوەزياسىنداعى تىلدىك ەرەكشەلىكتەر مەن كونە سوزدەردىڭ مولدىعى جۇمىستى كۇردەلەندىرگەن.
«احمەت بايتۇرسىنۇلى قازاق ءتىلىنىڭ مۇمكىندىگىن شەبەر پايدالانادى. ال اعىلشىن تىلىنە اۋدارعاندا ولەڭنىڭ ۇيقاسى مەن قۇرىلىمىن تولىق ساقتاۋ مۇمكىن بولمادى. كەيدە تۇپنۇسقانىڭ يدەياسىن جەتكىزۋ ءۇشىن ولەڭ جولدارىن قايتا قۇرۋعا تۋرا كەلدى»، – دەيدى اۋدارماشى.
جەيك زاۆلاتسكي اۋدارمانى الەمگە قازاق ادەبيەتىن تانىتۋدىڭ ماڭىزدى جولى دەپ سانايدى. ونىڭ پىكىرىنشە، «ماسا» جيناعى بۇگىنگى كۇنى دە وزەكتىلىگىن جوعالتقان جوق.
«مەنى احمەت بايتۇرسىنۇلىنىڭ ءبىلىم، ساۋاتتىلىق، ۇلتتىق ابىروي جانە ءوزىن-ءوزى باسقارۋ ماسەلەلەرىن تاباندى تۇردە كوتەرگەنى ءتانتى ەتەدى. مۇنداي يدەيالار قازىرگى قوعام ءۇشىن دە ماڭىزدى. سوندىقتان بۇل شىعارما قازاقستاندا عانا ەمەس، الەمنىڭ تۇكپىر-تۇكپىرىندە وقىلىپ، زەرتتەلۋى كەرەك»، – دەيدى ول.
قازىر سان-ديەگو ۋنيۆەرسيتەتىندە ءدارىس بەرەتىن اۋدارماشى بۇل ەڭبەك ارقىلى اعىلشىن ءتىلدى وقىرمانداردىڭ قازاق ادەبيەتىنە قىزىعۋشىلىعىن ارتتىرۋدى كوزدەيتىنىن اتاپ ءوتتى. ونىڭ ۇمىتىنشە، «ماسا» جيناعىن وقىعان شەتەلدىك وقىرماندار قازاق ادەبيەتى مەن تاريحىن تەرەڭىرەك تانۋعا ىنتالانادى.
ۇلىبريتانيا: "قازاق ەلى ءوز مۇناي-گازىن جاڭا باعىتتارمەن ەكسپورتتاي الۋى ءۇشىن كومەكتەسۋگە دايىنبىز"
