13-جەلتوقسانعا قاراعان ءتۇنى جامبىل وبلىسىندا ماگيسترالدى گاز قۇبىرى جارىلىپ، 5 ەلدى مەكەندەگى 980 ءۇي جىلۋسىز قالدى، دەپ حابارلايدى “ادىرنا” ۇلتتىق پورتالى.
ناقتىلار بولساق، جامبىل وبلىسىنداعى قىزىلقاينار، جاسوركەن، جالپاقتوبە، قىزىلديحان، گرودەكوۆو اۋىلدارىنىڭ تۇرعىندارى گازسىز قالدى.
وعان قوسا وسى ەلدى مەكەندەردەگى 8 الەۋمەتتىك نىسان دا جىلۋدان اجىراپ قالدى.
اپات گرودەكوۆو اۋىلىندا تۇنگى 22:10 شاماسىندا بولعان.
الدىن الا بولجام بويىنشا، جارىلعان قۇبىرعا قىسىم اسەر ەتۋى مۇمكىن.
قازىر ماماندار 20 مەتردەن اساتىن قۇبىر بولىگىن جالعاۋدا.
اپاتقا بايلانىستى ايماقتا ارنايى شتاب قۇرىلدى.
«جوندەۋ جۇمىستارى شامامەن 4-5 ساعات جۇرگىزىلەدى دەگەن ويدامىز. 10 جەردەن دانەكەرلەۋ، جالعاۋ جۇمىستارىن جۇرگىزۋ كەرەك. الەۋمەتتىك نىسانداردان 4 مەكتەپ، 2 بالاباقشا، 2 مەديتسينالىق عيمارات جىلۋسىز تۇر. وعان بايلانىستى جانار جاعارمايمەن جۇمىس ىستەيتىن ارنايى قۇرىلعى ناسوستارمەن ولاردىڭ جىلۋ جۇيەسىن اينالدىرىپ، قاتىپ قالماۋ ءۇشىن ارەكەت جاسالىپ جاتىر»، — دەيدى جامبىل وبلىسى اكىمىنىڭ ورىنباسارى قاناتبەك مادىبەكوۆ.
