اپاتتىق قۇتقارۋ قىزمەتى ديرەكتورىنىڭ ورىنباسارى جۇمات وكەنوۆ جارىلىس ورىن العان كەنىشتەگى زارداپ شەككەن ازاماتتاردى ىزدەۋ جۇمىستارىنىڭ بارىسىمەن ءبولىستى، دەپ حابارلايدى «ادىرنا» ۇلتتىق پورتالى.
ونىڭ ايتۋىنشا، شاحتانىڭ شىعىس بولىگىنەن 14-15 ادامنىڭ دەنەسى تابىلعان.
«6 ادامدى شىعاردىق، 11 ادامدى ءبىر ساعاتتىڭ كولەمىندە شىعارامىز. شىعىس جاعىنان تاعى ادامداردى تاسىمالداپ جاتىرمىز. بۇلار تابىلعان 33 كەنشىنىڭ قاتارىنا كىرەدى. 13 ادام مۇلدە تابىلماي جاتىر. كەيبىر مايىتتەردى، ءتىپتى تانۋ مۇمكىن بولماي جاتىر. بولشەكتەنىپ كەتكەن، اياعى ءبىر جاقتا، باسى ءبىر جاقتا. سول سەبەپتەن اتى-جوندەرىن حابارلاۋ ازىرگە قيىن بولىپ تۇر.
قازىرگى كەزدە ءورت تولىقتاي ءسوندىرىلدى. باستاپقى كەزدە بۇل دا بىزگە كەدەرگى كەلتىرگەن بولاتىن»، – دەدى مامان.
جۇمات وكەنوۆتىڭ سوزىنشە، بۇعان دەيىن تابىلعان 33 ادامنىڭ دەنەسى كوزگە كورىنەتىن بەتكى جاقتا جاتقاندىقتان تابىلعان. قالعان 13 كەنشىنى تابۋ قيىنعا ءتۇسىپ تۇر، ولار ءۇيىندى استىندا قالۋى دا مۇمكىن.
«ادىرنا» ۇلتتىق پورتالى
