قازاق مەكتەپتەرىندە ورىس ءتىلىن وقىتۋدى توقتاتۋ مۇمكىن ەمەس. بۇل تۋرالى وقۋ-اعارتۋ ءمينيسترى عاني بەيسەمباەۆ ايتتى، دەپ حابارلايدى “ادىرنا” ۇلتتىق پورتالى.
بۇل تالاپ قازاقستان مەكتەپتەرىنىڭ مەملەكەتتىك ستاندارتىنا ەنگىزىلگەن.
وتكەن اپتا سوڭىندا ورتالىق كوممۋنيكاتسيالار قىزمەتىندە وتكەن بريفينگ بارىسىندا جۋرناليستەر مينيستردەن قازاق مەكتەپتەرىندە بالالاردىڭ ورىس ءتىلىن ۇيرەنۋگە نەلىكتەن مىندەتتەلەتىنىن جانە بالاما رەتىندە نەگە باسقا تىلدەر وقىتىلمايتىنىن سۇرادى.
مينيستر مەكتەپتەردىڭ مەملەكەتتىك ستاندارتى بويىنشا قازاق، ورىس تىلدەرىن ۇيرەنۋ مىندەتتى ەكەنىن ءتۇسىندىردى.
"مەملەكەتتىك ستاندارت، وقۋ باعدارلاماسى بار، بارلىق قازاقستاندىق مەكتەپتەر وسى قاعيدالار بويىنشا جۇمىس ىستەيدى. تىلدەردى دامىتۋ وتە ماڭىزدى. قازاق ءتىلىن مەڭگەرۋدى ارتتىرۋ جانە باسقا تىلدەردى وقىتۋ ساپاسىن كوتەرۋ قاجەت. ءبىزدىڭ بالالار نەعۇرلىم كوپ ءتىل بىلسە، ولاردىڭ باسەكەگە قابىلەتتىلىگى سوعۇرلىم جوعارى بولادى. ءبىز قازىر قازاق، ورىس تىلدەرىندە سويلەيمىز، بالالارىمىز ءتىل ۇيرەنۋ مۇمكىندىگىنەن ايىرىلماۋى كەرەك،" - دەپ جاۋاپ بەردى مينيستر.
ول سونداي-اق ءمينيستردىڭ بۇيرىعىمەن مەملەكەتتىك ستاندارتتى وزگەرتۋ مۇمكىن ەمەس ەكەنىن اتاپ ءوتتى. سونىمەن قاتار ءار مەكتەپ وقۋشىلاردىڭ قالاۋى بويىنشا جانە مۇعالىمدەردىڭ قاتىسۋىمەن كەز كەلگەن شەت ءتىلىن فاكۋلتاتيۆتى وقىتۋدى ەنگىزە الاتىنىن جەتكىزدى.
