مەملەكەت باسشىسى قاسىم-جومارت توقاەۆ قازاق ءتىلىنىڭ مەملەكەتتىك مارتەبەسى، قوعامداعى قولدانىسى مەن بولاشاعى تۋرالى پىكىر ءبىلدىردى، دەپ حابارلايدى "ادىرنا".
پرەزيدەنت انا ءتىلىنىڭ ەل بىرلىگىن نىعايتۋداعى، ۇلتتىق قۇندىلىقتاردى دارىپتەۋدەگى جانە قازاقستاننىڭ حالىقارالىق بەدەلىن ارتتىرۋداعى ماڭىزىن اتاپ ءوتتى.
مەملەكەت باسشىسىنىڭ ايتۋىنشا، قازاق ءتىلى – تاۋەلسىزدىكتىڭ نىشانى، مەملەكەتتىلىكتىڭ باستى بەلگىلەرىنىڭ ءبىرى ءارى ۇلتتىڭ رۋحاني تىرەگى. سوندىقتان مەملەكەتتىك تىلگە قۇرمەت كورسەتۋ – ءار ازاماتتىڭ ازاماتتىق جانە ادامگەرشىلىك بورىشى. سونىمەن قاتار ءتىلدىڭ ابىرويى ەلدىڭ ەكونوميكالىق، تەحنولوگيالىق جانە وركەنيەتتىك دامۋىمەن تىعىز بايلانىستى.
ء«بىز ەكونوميكاسى دامىعان، يننوۆاتسياسى مەن تەحنولوگياسى ۇزدىك، الەم جۇرتشىلىعى مويىنداعان، وركەنيەتتى، مىقتى مەملەكەت بولساق، قازاق ءتىلى دە قۋاتتى ءتىل بولاتىنى انىق. مەملەكەتتىڭ بەدەلى ارتقان سايىن، مەملەكەتتىك ءتىلدىڭ دە ابىرويى كۇشەيەدى. بۇل – اقيقات»، – دەدى پرەزيدەنت قاسىم-جومارت توقاەۆ.
پرەزيدەنت ءبىلىم بەرۋ سالاسىندا قازاق ءتىلىنىڭ قولدانىس اياسى كەڭەيىپ كەلە جاتقانىن ايتتى. ونىڭ مالىمەتىنشە، بيىل ءبىرىنشى سىنىپقا قابىلدانعان وقۋشىلاردىڭ 71 پايىزى قازاق سىنىپتارىن تاڭداعان. سونداي-اق كوللەدجدەر مەن جوعارى وقۋ ورىندارىندا مەملەكەتتىك تىلدە ءبىلىم بەرەتىن بولىمدەردىڭ سانى ارتىپ كەلەدى.
مادەنيەت پەن شىعارماشىلىق يندۋستريادا دا قازاق تىلىندەگى ونىمدەردىڭ ۇلەسى كوبەيگەن. بىلتىر جارىق كورگەن 6 مىڭنان استام كىتاپتىڭ 70 پايىزى قازاق تىلىندە باسىلعان. ال بيىل قازاقستاندا تۇسىرىلگەن 71 ءفيلمنىڭ 63-ءى انا تىلىمىزدە جارىققا شىققان.
مەملەكەت باسشىسى بۇل كورسەتكىشتەر قازاق تىلىنە دەگەن قوعامدىق سۇرانىستىڭ ارتىپ كەلە جاتقانىن اڭعارتاتىنىن ايتىپ، جۇمىستى جۇيەلى تۇردە جالعاستىرۋ قاجەتتىگىن جەتكىزدى.
سونىمەن قاتار پرەزيدەنت قازاق ءتىلىنىڭ حالىقارالىق دەڭگەيدە قازاقستاننىڭ مادەنيەتى مەن زياتكەرلىك الەۋەتىن تانىتاتىن ماڭىزدى قۇرالعا اينالىپ كەلە جاتقانىنا توقتالدى. ول تاريحي تۇلعالار بەيبارىس سۇلتان، اباي قۇنانبايۇلى، قانىش ساتباەۆپەن قاتار، بۇگىنگى تاڭدا الەمگە تانىلىپ جۇرگەن ديماش قۇدايبەرگەن، سامال ەسلياموۆا، ءبيبىسارا اساۋباەۆا، سۋمو بالۋانى ەرسىن بالتاعۇل (كيمبوزان حارۋكي) جانە Higgsfield AI ستارتاپىنىڭ جەتەكشىسى ەرزات دۋلاتوۆتى اتاپ ءوتتى.
پرەزيدەنتتىڭ پىكىرىنشە، بۇل ازاماتتار قازاقستاننىڭ مادەنيەتىن، ونەرىن، رۋحانياتى مەن زياتكەرلىك قۋاتىن الەمگە تانىتىپ جۇرگەن رۋحاني ەلشىلەر.
قازاق ءتىلىنىڭ تەحنولوگيالىق دامۋ ۇدەرىسىندەگى مۇمكىندىكتەرى دە نازاردان تىس قالعان جوق. قاسىم-جومارت توقاەۆتىڭ ايتۋىنشا، انا ءتىلىمىز تسيفرلىق پلاتفورمالار مەن جاساندى ينتەللەكت جۇيەلەرىندە كەڭىنەن قولدانىلا باستادى. ماسەلەن، OpenAI زەرتتەۋىنە سايكەس، قازاق ءتىلى سوڭعى ءۇش جىلدا جاساندى ينتەللەكت جۇيەلەرىندەگى قولدانىسى قارقىندى كەڭەيگەن تىلدەردىڭ قاتارىنا ەنگەن. ال Yandex مالىمەتىنشە، كومپانيانىڭ بەلگىلى ءبىر ءونىمىن قازاق تىلىندە پايدالاناتىن ادامدار سانى ءبىر جىلدا 30 پايىزعا ارتقان. Google كومپانياسى دا وتكەن جىلى قازاق ءتىلىن Gemini تىلدىك مودەلىنە ەنگىزگەن.
مەملەكەت باسشىسى وتكەن كەزەڭدەردە ساياسي قىسىمعا قاراماستان، قازاق ءتىلىنىڭ زيالى قاۋىم، ءتىل ماماندارى، جۋرناليستەر مەن قاراپايىم ازاماتتاردىڭ ەڭبەگى ارقاسىندا ساقتالىپ، دامىعانىن اتاپ ءوتتى. سونداي-اق مەملەكەتتىك ءتىلدىڭ بولاشاعىنا قاتىستى ورىنسىز كۇمان مەن تەرىس پىكىردەن ارىلۋعا شاقىردى.
«قازاق ءتىلىنىڭ تاعدىرى كۇماندى، بەلگىسىز دەپ زارلاي بەرسەك، وزگە ەلدەر مەن حالىقتار بىزگە قالاي قارايدى، قالاي سەنەدى؟! ۇنەمى تۇڭىلە بەرۋ وڭ ناتيجە اكەلمەيدى، مۇنداي اڭگىمەنى دوعاراتىن كەز كەلگەنىنە كوزىمىز ابدەن جەتتى»، – دەدى پرەزيدەنت.
پرەزيدەنت توقاەۆ قازاق ءتىلىنىڭ بارلىق سالاداعى قولدانىسىن كەڭەيتۋ باعىتىنداعى جۇمىستى جالعاستىرۋ ماڭىزدى ەكەنىن اتاپ ءوتتى.
«قازاق ەلى باردا قازاق ءتىلى تۇعىردان تۇسپەيدى»، – دەپ تۇيىندەدى مەملەكەت باسشىسى.
