فوتو: اقوردا
وسىدان بىرنەشە كۇن بۇرىن استانا تورىندە وتكەن «قازاق ءتىلى» حالىقارالىق قوعامىنىڭ ح قۇرىلتايى ۇلتتىق رۋحانياتىمىزدىڭ ناقتى باعىت-باعدارىن ايقىنداعان تاريحي ءسات بولدى. بۇل جيىندا مەملەكەت باسشىسى قاسىم-جومارت توقاەۆ انا ءتىلىمىزدىڭ بۇگىنى مەن ەرتەڭىنە قاتىستى كوپتىڭ كوكەيىندە جۇرگەن دۇنيەلەر تۋرالى ايتتى. ال جۇرتشىلىق پرەزيدەنتتىڭ ءسوزىن قالاي قابىلدادى؟ ءبىز الەۋمەتتىك جەلى قولدانۋشىلارىنىڭ پىكىرلەرىنە شولۋ جاساپ كوردىك.
پرەزيدەنتتىڭ ايتۋىنشا، ءتىل – بارشامىزعا ورتاق قۇندىلىق، سوندىقتان ونىڭ ابىروي-بەدەلىن اسىرۋ ءۇشىن تەك ۇكىمەت ەمەس، بۇكىل قوعام، زيالى قاۋىم مەن كاسىپكەرلەر بىرىگىپ، تاباندى جۇمىس ىستەۋى قاجەت. ونىڭ – «قازاق ەلى باردا قازاق ءتىلى تۇعىردان تۇسپەيدى!» – دەگەن ءسوزى ۇلتتىق سەنىمدى نىعايتتى.
بۇعان قوسا، مەملەكەت باسشىسى كەيبىر تەرميندەردىڭ قيسىنسىز، وراشولاق اۋدارىلاتىنىن تىلگە تيەك ەتتى. ءسويتىپ، اۋدارماشىلاردىڭ «جاڭاشىلدىعىنان» مەزى بولعان قاراپايىم حالىقتىڭ ويىنداعىسىن تاپ باستى.
ال ەندى بىرەۋلەر ءتىل مادەنيەتىندەگى تاعى ءبىر ماسەلەنى كوتەرىپ، قولداۋ ءبىلدىردى: «دۇرىس ايتادى، ارابشا قوسىپ سويلەۋدى توقتاتۋ كەرەك»، – دەگەن پىكىرلەر دە جەلىدە كەڭ تارادى.
ازاماتتاردىڭ باسىم بولىگى مەملەكەت باسشىسىنىڭ سوزىنەن رۋح العانىن جاسىرمادى. كوپتەگەن جەلى قولدانۋشىلارى ەلدىڭ بىرلىگى مەن ءتىلدىڭ مارتەبەسىن العا تارتىپ، بىرەۋلەر پرەزيدەنتكە جىلى لەبىزدەرىن ءبىلدىرىپ جاتسا، ال ەندى بىرەۋلەرى ول كوتەرگەن ماسەلەلەردىڭ ماڭىزدىلىعىن اتاپ ءوتتى.
تۇيىندەي كەلگەندە، بۇل قۇرىلتاي قوعام مەن بيلىكتىڭ ءتىل ماسەلەسىندەگى ۇستانىمى ءبىر ارنادا ەكەنىن ايقىن كورسەتتى. پرەزيدەنتتىڭ تىلگە قاتىستى ناقتى تۇيتكىلدەردى اشىق ايتۋى – حالىقتىڭ كوكەيىندەگى ويلارمەن قابىسىپ، جۇرتشىلىقتىڭ جۇرەگىنەن ورىن تاپتى.
