اقتاۋ–استانا باعىتىنداعى رەيستە ۇشاق كاپيتانى جولاۋشىلارعا تەك ورىس جانە اعىلشىن تىلدەرىندە سويلەگەن، دەپ حابارلايدى "ادىرنا" ۇلتتىق پورتالى.
Orda.kz دەرەگىنشە، Threads جەلىسىندە beimalim اتتى قولدانۋشى FlyArystan بورتىندا ءتىل تۋرالى داۋ بولعانىن حابارلاعان.
ول قازاق تىلىندەگى حابارلاندىرۋدى سۇراعاندا، جولسەرىك وعان «مۇنى ءسىز شەشپەيسىز» دەپ، ورىسشا جاۋاپ بەرگەن.
«ساپار بارىسىندا تاعى سۇرادىم: كاپيتان نەگە قازاقشا سويلەمەيدى؟ جولسەرىك ءاليا ادىلبەكقىزى “كاپيتان ورىس تىلىندە سويلەيدى، سوندىقتان ەكى تىلدە عانا حابارلايدى” دەدى. تۇتىنۋشى قۇقىعىم بۇزىلىپ جاتقانىن ايتقاندا، ء“سىز شەشپەيسىز (نە ۆام رەشات)” دەپ جاۋاپ بەردى»، — دەپ جازدى جولاۋشى.
كومپانيا بۇل جاعدايعا قاتىستى تۇسىنىكتەمە بەردى. FlyArystan مالىمدەمەسىنە سايكەس، رەيس كەزىندە بارلىق حابارلاندىرۋلار مەملەكەتتىك تىلدە اعا بورتسەرىك تاراپىنان جاسالعان.
«FS7376 اقتاۋ–استانا رەيسىندە قازاق تىلىندەگى اقپارات اعا بورتسەرىك تاراپىنان بەرىلدى. جولاۋشى ۇشقىشتىڭ جەكە ءوزى قازاق تىلىندە حابارلاعانىن تالاپ ەتكەن. بارلىق حابارلاندىرۋلار زاڭناماعا جانە حالىقارالىق ازاماتتىق اۆياتسيا تاجىريبەسىنە ساي ورىندالدى»، — دەلىنگەن كومپانيا حابارلاماسىندا.
بۇعان ۇقساس جاعدايدى باسقا Threads قولدانۋشىسى دا اتاپ ءوتتى.
ول قوستاناي–استانا رەيسىندە ۇشقىش تەك ورىس جانە اعىلشىن تىلدەرىندە سويلەگەنىن جازعان.
«بورت كاپيتانى ستەپان پودكرىتوۆ قازاقشا امانداسىپ، قوشتاسپادى. سۇراعانىمدا، جولسەرىك “اۆياكومپانيادا ونداي تالاپ جوق” دەدى»، - دەيدى ول.
ايتا كەتەيىك، تامىز ايىندا دا ءدال وسى اۆياكومپانيا قىزمەتكەرلەرى مەن جولاۋشى اراسىندا ءتىل تۋرالى داۋ تۋعان.
