استانادا ءتىل عالىمدارىمەن جانە سالا ساراپشىلارىمەن كەزدەسكەن ۆيتسە-پرەزيدەنت ەرلان قارين مەملەكەت باسشىسى قاسىم-جومارت توقاەۆتىڭ ءتىل نورمالارىنا قاتىستى باستاماسىمەن اينالىساتىن ءتىل ماماندارى مەن ساراپشىلارعا ماڭىزدى تاريحي ميسسيا جۇكتەلىپ وتىرعانىن جەتكىزدى.
– پرەزيدەنت قاسىم-جومارت كەمەلۇلى توقاەۆ وتكەن اپتادا حالىقارالىق «قازاق ءتىلى» قوعامىنىڭ 10-ىنشى قۇرىلتايىنا قاتىسىپ، ءتىل سالاداعى جىلدار بويى جيناقتالعان پروبلەمالاردى جۇيەلى تۇردە رەتكە كەلتىرۋ قاجەت ەكەنىن ايتتى. ول ءۇشىن كاسىبي ءتىل ماماندارىنان، عالىمداردان، ساراپشىلاردان، جالپى قوعام وكىلدەرىنەن ارنايى جۇمىس توبىن قۇرۋدى تاپسىردى. مىنە، پرەزيدەنتتىڭ سول تاپسىرماسىنا سايكەس، قازاق ءتىلىنىڭ دامۋىنا قاتىستى اسا ماڭىزدى ءارى جاۋاپتى، ۇلتتىق دەڭگەيدەگى ۇلكەن جوبانى باستاعالى وتىرمىز. شىن مانىندە، بۇل – تاريحي ءسات. ياعني، عالىمدار مەن ساراپشىلار قازاق ءتىلىنىڭ دامۋىن جاڭا دەڭگەيگە كوتەرەتىن اۋقىمدى رەفورماعا كىرىسەدى، – دەدى ەرلان قارين.
ۆيتسە-پرەزيدەنتتىڭ ايتۋىنشا، پرەزيدەنت باستاماسىمەن اينالىساتىن ساراپشىلاردىڭ ۇلكەن توبى جاساقتالادى. ونىڭ قۇرامىنا ا.بايتۇرسىنۇلى اتىنداعى ءتىل ءبىلىمى ينستيتۋتىنىڭ قىزمەتكەرلەرى، جوعارى وقۋ ورىندارىنىڭ بىلىكتى ءتىل ماماندارى، عالىمدار، ساراپشىلار، ءىت سالاسىنىڭ وكىلدەرى ەنەدى. ءتىل نورمالارىن جەتىلدىرۋ باعىتىنداعى نەگىزگى جۇمىستى وسى ساراپشىلار توبى جۇرگىزەدى.
ودان بولەك، پرەزيدەنت تاپسىرماسىمەن ءتىل نورمالارىن جەتىلدىرۋ جونىندەگى ارنايى جۇمىس توبى قۇرىلادى. بۇل ۆەدومستۆوارالىق توپ جۇمىستى جالپى ۇيلەستىرەدى جانە ۇيىمداستىرادى، ۇسىنىستار مەن پىكىرلەردى سارالاپ، ەرەجەلەردى بەكىتەدى.
