اقش-تىڭ كەدەندىك باقىلاۋ قىزمەتى شەكارانى زاڭسىز وتپەك بولعاندار اراسىندا ازيا جانە افريكا قۇرلىعىنىڭ ازاماتتارى كوپ ەكەنىن ايتادى. ونىڭ ىشىندە 2021-2023 جىلدار ارالىعىندا تۇركيانىڭ 30830 ازاماتى، ماۆريتانيانىڭ 15594 ازاماتى، وزبەكستاننىڭ 13624 ازاماتى، اۋعانستاننىڭ 6386 ازاماتى، مىسىردىڭ 3153 ازاماتى بار. بۇل تەك "لاڭكەستىك قاۋىپكە جاقىن" دەگەن تىزىمدەگىلەر سانى، ال ول تىزىمگە ەنبەيتىندەر سانى بۇدان الدەقايدا كوپ. ودان بولەك مىڭداعان يران، يراك، سيريا، ليۆان، پاكىستان، يەمەن، يوردانيا ازاماتتارى ۇستالعان.
شەكارانى زاڭسىز كەسىپ ءوتۋدىڭ باعىتى قالىپتاسقان. ميگرانتتار ازيادا ستامبۇل ارقىلى مادريدكە بارىپ، كەيىن كەمە نەمەسە ۇشاق ارقىلى بوگوتا، پاناما نەمەسە ماناگۋاعا بارادى. ارتىنشا ولار جاياۋ نەمەسە كولىكپەن نيكاراگۋا اۋماعىن باسىپ ءوتىپ، گوندۋراسقا جەتەدى. گوندۋراستان گۆاتەمالاعا ءوتىپ، مەكسيكا اسادى. ارتىنشا ءساتى تۇسسە اقش-قا وتۋگە تالپىنىس جاسايدى. ولار اقش جەرىندە بوسقىن ستاتۋسىن الىپ، كەيىن گرين-كارتا يەمدەنىپ، جۇمىس ىستەۋ قۇقىعىنا يە بولۋدان ۇمىتتەنەدى. الايدا بۇل وتە سيرەك جولىعاتىن ساتتىلىك دەيدى ماماندار.
وتكەن جىلى ونداعان وزبەكستان ازاماتى اقش-مەكسيكا شەكاراسىندا جوعالىپ كەتتى دەگەندى وقىپ ەدىم. باندالار اراسىنداعى اتىس-شابىس قۇربانى بولىپ كەتپەسە يگى ەدى. تاعدىرلارى نە بولدى ەكەن دەپ وتىرمىن...
