قازاقستان، وزبەكستان، قىرعىزستان جانە تۇرىكمەنستان رەسەي پرەزيدەنتى ۆلاديمير ءپۋتيننىڭ نوۆگورود وبلىسىنداعى رەزيدەنتسياسىنا جاسالعان شابۋىل ارەكەتىن قاتاڭ ايىپتادى، دەپ حابارلايدى "ادىرنا" ۇلتتىق پورتالى.
قازاقستان پرەزيدەنتى قاسىم-جومارت توقاەۆ تا ۆلاديمير پۋتينمەن تەلەفون ارقىلى سويلەسۋ بارىسىندا رەزيدەنتسياعا جاسالعان شابۋىل ارەكەتىن ايىپتادى. اقوردانىڭ حابارلاۋىنشا، توقاەۆ مۇنداي ارەكەتتەردىڭ بەيبىت ۇدەرىستى ىلگەرىلەتۋگە جانە قاقتىعىستى ساياسي جولمەن شەشۋگە ىقپال ەتپەيتىنىن اتاپ ءوتتى. سونىمەن قاتار، ول ۋكراينا ماسەلەسى بويىنشا كەلىسسوزدەردە بايقالعان ىلگەرىلەۋدى وڭ باعالاپ، تۇراقتى كەلىسىمدەرگە قول جەتكىزۋ ءۇشىن ساياسي-ديپلوماتيالىق كۇش-جىگەردى جالعاستىرۋدىڭ ماڭىزىن ايتتى. اڭگىمە بارىسىندا ەكىجاقتى ىنتىماقتاستىقتىڭ قازىرگى جاعدايى تالقىلانىپ، ءوتىپ بارا جاتقان جىلدىڭ قازاق-رەسەي قاتىناستارى ءۇشىن مازمۇندى ءارى ناتيجەلى بولعانى اتاپ ءوتىلدى.
وزبەكستان پرەزيدەنتى شاۆكات ميرزيوەۆ رەسەي باسشىسى ۆلاديمير پۋتينمەن 30 جەلتوقساندا وتكەن تەلەفون ارقىلى اڭگىمە بارىسىندا اتالعان وقيعاعا قاتىستى ءوز ۇستانىمىن ءبىلدىردى. اڭگىمە سوڭىندا ەكى ەل باسشىلارى ءبىر-ءبىرىن جانە حالىقتارىن كەلە جاتقان 2026 جىلمەن قۇتتىقتادى.
قىرعىزستان پرەزيدەنتى سادىر جاپاروۆ تا اتالعان وقيعاعا قاتىستى الاڭداۋشىلىق ءبىلدىردى. ونىڭ ءباسپاسوز حاتشىسى اسقات الاگوزوۆتىڭ ايتۋىنشا، مەملەكەت باسشىسى مۇنداي جاعدايلار ۋكرايناداعى داعدارىستى ساياسي-ديپلوماتيالىق جولمەن رەتتەۋگە باعىتتالعان كۇش-جىگەرگە قاۋىپ ءتوندىرۋى مۇمكىن ەكەنىن اتاپ وتكەن.
تۇرىكمەنستان دا بۇل جاعدايعا قاتىستى ءوز ۇستانىمىن ءبىلدىردى. تۇرىكمەنستان سىرتقى ىستەر مينيسترلىگى تاراتقان مالىمدەمەدە رەسەي پرەزيدەنتىنىڭ رەزيدەنتسياسىنا جاسالعان شابۋىل تۋرالى حابارلارعا بايلانىستى الاڭداۋشىلىق ءبىلدىرىلىپ، حالىقارالىق قاۋىپسىزدىك پەن تۇراقتىلىققا قاتەر توندىرەتىن مۇنداي ارەكەتتەر ايىپتالاتىنى ايتىلعان.
بۇعان دەيىن رەسەيدىڭ سىرتقى ىستەر ءمينيسترى سەرگەي لاۆروۆ 28-29 جەلتوقسانعا قاراعان ءتۇنى ۋكراينا تاراپىنان رەسەي پرەزيدەنتىنىڭ نوۆگورود وبلىسىنداعى رەزيدەنتسياسىنا دروندار ارقىلى شابۋىل جاساۋ ارەكەتى بولعانىن مالىمدەگەن ەدى. ونىڭ ايتۋىنشا، شابۋىلعا 91 ۇشقىشسىز ۇشۋ اپپاراتى قاتىسقان. ولاردىڭ بارلىعى اۋە شابۋىلىنا قارسى قورعانىس كۇشتەرىمەن جويىلعان.
الايدا باتىس ەلدەرى بۇل مالىمدەمەگە كۇمانمەن قاراۋدا. اقش-تىڭ ناتو جانىنداعى تۇراقتى وكىلى مەتتيۋ ۋيتاكەر شابۋىلدىڭ بولعان-بولماعانى ناقتى ەمەس ەكەنىن ايتىپ، ۆاشينگتون بارلاۋ قىزمەتتەرىنەن اقپارات كۇتىپ وتىرعانىن جەتكىزدى.
ايتا كەتەيىك، ۋكراينا بيلىگى شابۋىلدى راستايتىن ەشقانداي دەرەك ۇسىنىلماعانىن حابارلاعان.
