كوللاج جي كومەگىمەن جاسالعان
اقش اكىمشىلىگى ۆاشينگتوننىڭ باستاماسىمەن قۇرىلعان Pax Silica تەحنولوگيالىق اليانسىنا كىرەتىن ەلدەرگە قىتايدىڭ جي-دى دامىتۋعا باعىتتالعان باعدارلامالارىنا قاتىسقان جاعدايدا، بىرلەستىكتەن شىعارىلۋى مۇمكىن ەكەنىن ەسكەرتپەك، دەپ حابارلايدى "ادىرنا" ءتىلشىسى.
بۇل تۋرالى Reuters اگەنتتىگى حابارلادى.
اقش مەملەكەتتىك دەپارتامەنتى Pax Silica قۇرامىنداعى جانە ۆاشينگتونمەن جاساندى ينتەللەكت سالاسىندا ىنتىماقتاستىققا مۇددەلى 35 مەملەكەتكە ءتيىستى حات جولداماق.
اگەنتتىك مالىمەتىنشە، قۇجاتتا Pax Silica اليانسىنا قاتىسۋ بەلگىلى ءبىر مىندەتتەمەلەر جۇكتەيتىنى جانە ونىڭ ماقساتتارىنا قايشى كەلەتىن ۇقساس باستامالارعا قاتار قاتىسۋعا بولمايتىنى ايتىلعان.
Reuters مالىمەتىنە سايكەس، قازىر Pax Silica-عا جانە قىتايدىڭ وسىعان ۇقساس تەحنولوگيالىق باستاماسىنا قاتار قاتىسىپ وتىرعان جالعىز ەل – قازاقستان. اقش-تىڭ بۇل ۇستانىمى باسقا مەملەكەتتەرگە جاساندى ينتەللەكت سالاسىنداعى تەحنولوگيالىق باسەكەلەستىكتە ۆاشينگتون مەن بەيجىڭمەن ءبىر ۋاقىتتا ىنتىماقتاستىق ورناتۋ مۇمكىن بولمايتىنىن كورسەتۋگە باعىتتالعان.
Pax Silica جارتىلاي وتكىزگىشتەردى، اسا ماڭىزدى پايدالى قازبالاردى، ەنەرگيا رەسۋرستارىن جانە جاساندى ينتەللەكت تەحنولوگيالارىن ءوندىرۋ مەن جەتكىزۋدىڭ يننوۆاتسيالىق تىزبەكتەرىن دامىتۋ ماقساتىندا قۇرىلعان.
اليانس قۇرامىنا اۆستراليا، ۇلىبريتانيا، گەرمانيا، يزرايل، ءۇندىستان، يتاليا، بىرىككەن اراب امىرلىكتەرى، وڭتۇستىك كورەيا، جاپونيا جانە باسقا دا مەملەكەتتەر كىرگەن.
