تاجىريبەلى اقتوبە وبلىسى اكىمىنىڭ جۋرناليستپەن تىم وكتەم، ۇرسىپ، جەكىپ سويلەسۋ مانەرى ەرسى كورىندى.
مەنمەندىك پە، الدە اكىممىن دەگەن كەۋدەمسوقتىق پا، وزىنە ۇنامايتىن سۇراقتار قويىپ جۇرگەن ءجۋرناليستى تۇقىرتقان ءتۇرى مە؟
ەگەر بىلدەي وبلىس اكىمى جۋرناليستپەن وسىلاي جەكىپ سويلەسەتىن بولسا، باسقا وڭىردەگى شەنەۋنىكتەرى ەندى ارىپتەستەرىمىزدى جانىنا جولاتپايتىن شىعار.
الەۋمەتتىك جەلىدەن اكىمدى كوككە كوتەرىپ دۇرىس ىستەدى دەگەن پىكىرلەر دە جەدەل ۇيىمداستىرىلىپ جازىلىپ جاتقانى بايقالادى. قالاي بولعاندا دا كەز-كەلگەن اقپارات قۇرالى وكىلىنە وبلىس اكىمىنىڭ بۇلاي جەكىپ سويلەۋگە حاقى جوق. مەملەكەتتىك لاۋازىمدى قىزمەتكەردىڭ ەتيكاسى قايدا؟
جاقىندا پرەزيدەنت اكىمدەردىڭ حالىققا جاقىن بولۋىن، ءار ماسەلەنى ەل ارالاپ ءجۇرىپ حالىقپەن كەزدەسىپ بايىپتى تۇسىندىرە الۋىن تالاپ ەتتى ەمەس پە؟ جۋرناليست جەرگىلىكتى تۇرعىندار كوتەرگەن ماسەلەنى سۇراسا، اكىم وعان ۇرسىپ، بۇل كىمنىڭ سۇراعى اتى-ءجونىن ايت دەپ دىكىڭدەپ تۇر. بۇل مەنمەنسىگەن "ەسكى قازاقستان اكىمدەرىنەن" قالعان جامان ادەت قوي. قازىر اكىمدەردىڭ ۇستانىمى "ۇلىق بولساڭ، كىشىك بول!" بولۋى كەرەك ەمەس پە؟ اكىمدەر جۋرناليست قانداي سۇراق قويسا دا رەنجىمەي، تياناقتى تۇردە قىزمەتتىك ەتيكانى ساقتاپ جاۋاپ بەرۋى ءتيىس. اقتوبە وبلىسىنىڭ اكىمى جاقسى ۇلگى كورسەتىپ تۇرعان جوق.
وتكەندە تۋرا وسىلاي مەنمەندىك تانىتىپ بۇل ءجۋرناليستىڭ اششى سۇراقتارىنا مەنسىنبەي جاۋاپ بەرگەن شقو اكىمى مىقتى بولسا تاعى ورىنىندا قالمادى ما؟ جۋرناليستەرگە جەكىگەندەردىڭ جاقسى بولعانىن كورگەمىز جوق. ورىس ءتىلدى بولسا دا اقپارات وكىلى رەتىندە سۇراق قويىپ تۇر. اكىم سۇراقتان جالتارماي، مەملەكەتتىك تىلدە بولسا دا اشىق جاۋاپ بەرۋگە مىندەتتى.
ماسەلە بۇل ارادا اكىمگە ۇنامايتىن سۇراقتاردىڭ قويىلۋىندا بولىپ تۇرعان سياقتى. جۋرناليست وليگارح ماشكەۆيچ سالعان ءزاۋلىم ۇيدە وبلىس اكىمى نەگە تۇردى؟ نەگە ساقالدى قۇرىلىس اتانعان باتىس-2 ەليتالىق شاعىن اۋدانداعى تۇرعىن ۇيلەر سالىنىپ بىتپەي جاتىر؟ قىرۋار قارجى بولىنگەن اقتوبەدەگى قوقىس پوليگونى نەگە ورتەنە بەرەدى؟ قالانى تۇتىنگە وراپ،،اۋانى لاستايتىن ءورت نەگە وشىرىلمەيدى؟اقتوبەنىڭ شەتىندەگى اۋداندار دا نەگە جول جوندەلمەگەن، كەيبىر اۋدانداردا نەگە سۆەت جوق؟ اۋىز سۋ ماسەلەسى كەيبىر اۋىلداردا نەگە ءالى شەشىلمەگەن؟ قاندىاعاشتاعى اۋىز سۋدىڭ لاستانۋىنا كىم كىنالى؟ دەگەن وڭىردەگى وتكىر ماسەلەلەرگە قاتىستى سۇراقتاردى توتەسىنەن قويدى.
كەز-كەلگەن اكىم جۋرناليستەرگە ىستەگەن جۇمىسىن كورسەتكىسى كەلەدى . اسحات نيازوۆ وعان باس شۇلعي بەرمەي تۇرعىنداردان جينالعان شاعىمدار بويىنشا ساۋالداردى بوراتتى. اكىمگە ءجۋرناليستىڭ وسى ەركىندىگى ۇناماعان سياقتى. بۇل - زامان تالابى.
قازىر جۋرناليستەر مينيسترگە دە، دەپۋتاتقا دا، كەز-كەلگەن مەكەمە باسشىسىنا دا، كەز-كەلگەن دەڭگەيدەگى اكىمدەرگە دە اشىق توتەسىنەن سۇراق قويا الادى. اكىمدەر ءاردايىم حالىقتىڭ قىزمەتشىسى ەكەندىكتەرىن ۇمىتپاي تۇرعىندار كوتەرگەن ماسەلەنى جەتكىزىپ تۇرعان جۋرناليستەرگە رەنجىمەي، جەكىمەي ناقتى دايەكتى تۇردە جاۋاپ بەرۋى كەرەك!جۋرناليستىڭ كاسىبي مىندەتىنىڭ ءبىرى قوعامداعى تۇيتكىلدى اتقارۋشى بيلىككە جەتكىزۋ.اكىمدەردىڭ باستى مىندەتى كوتەرىلگەن تۇيتكىلدى شەشۋدىڭ جولىن، تەتىگىن تاۋىپ،ناتيجەلى جۇمىس ىستەۋ.
