Tájirıbeli Aqtóbe oblysy ákiminiń jýrnalıstpen tym óktem, ursyp, jekip sóılesý máneri ersi kórindi.
Menmendik pe, álde ákimmin degen keýdemsoqtyq pa, ózine unamaıtyn suraqtar qoıyp júrgen jýrnalısti tuqyrtqan túri me?
Eger bildeı oblys ákimi jýrnalıstpen osylaı jekip sóılesetin bolsa, basqa óńirdegi sheneýnikteri endi áriptesterimizdi janyna jolatpaıtyn shyǵar.
Áleýmettik jeliden ákimdi kókke kóterip durys istedi degen pikirler de jedel uıymdastyrylyp jazylyp jatqany baıqalady. Qalaı bolǵanda da kez-kelgen aqparat quraly ókiline oblys ákiminiń bulaı jekip sóıleýge haqy joq. Memlekettik laýazymdy qyzmetkerdiń etıkasy qaıda?
Jaqynda Prezıdent ákimderdiń halyqqa jaqyn bolýyn, ár máseleni el aralap júrip halyqpen kezdesip baıypty túsindire alýyn talap etti emes pe? Jýrnalıst jergilikti turǵyndar kótergen máseleni surasa, ákim oǵan ursyp, bul kimniń suraǵy aty-jónin aıt dep dikińdep tur. Bul menmensigen "eski Qazaqstan ákimderinen" qalǵan jaman ádet qoı. Qazir ákimderdiń ustanymy "Ulyq bolsań, kishik bol!" bolýy kerek emes pe? Ákimder jýrnalıst qandaı suraq qoısa da renjimeı, tııanaqty túrde qyzmettik etıkany saqtap jaýap berýi tıis. Aqtóbe oblysynyń ákimi jaqsy úlgi kórsetip turǵan joq.
Ótkende týra osylaı menmendik tanytyp bul jýrnalıstiń ay suraqtaryna mensinbeı jaýap bergen ShQO ákimi myqty bolsa taǵy orynynda qalmady ma? Jýrnalısterge jekigenderdiń jaqsy bolǵanyn kórgemiz joq. Orys tildi bolsa da aqparat ókili retinde suraq qoıyp tur. Ákim suraqtan jaltarmaı, memlekettik tilde bolsa da ashyq jaýap berýge mindetti.
Másele bul arada ákimge unamaıtyn suraqtardyń qoıylýynda bolyp turǵan sııaqty. Jýrnalıst olıgarh Mashkevıch salǵan záýlim úıde oblys ákimi nege turdy? Nege saqaldy qurylys atanǵan Batys-2 elıtalyq shaǵyn aýdandaǵy turǵyn úıler salynyp bitpeı jatyr? Qyrýar qarjy bólingen Aqtóbedegi qoqys polıgony nege órtene beredi? Qalany tútinge orap,,aýany lastaıtyn órt nege óshirilmeıdi?Aqtóbeniń shetindegi aýdandar da nege jol jóndelmegen, keıbir aýdandarda nege svet joq? Aýyz sý máselesi keıbir aýyldarda nege áli sheshilmegen? Qandyaǵashtaǵy aýyz sýdyń lastanýyna kim kináli? degen óńirdegi ótkir máselelerge qatysty suraqtardy tótesinen qoıdy.
Kez-kelgen ákim jýrnalısterge istegen jumysyn kórsetkisi keledi . Ashat Nııazov oǵan bas shulǵı bermeı turǵyndardan jınalǵan shaǵymdar boıynsha saýaldardy boratty. Ákimge jýrnalıstiń osy erkindigi unamaǵan sııaqty. Bul - zaman talaby.
Qazir jýrnalıster mınıstrge de, depýtatqa da, kez-kelgen mekeme basshysyna da, kez-kelgen deńgeıdegi ákimderge de ashyq tótesinen suraq qoıa alady. Ákimder árdaıym halyqtyń qyzmetshisi ekendikterin umytpaı turǵyndar kótergen máseleni jetkizip turǵan jýrnalısterge renjimeı, jekimeı naqty dáıekti túrde jaýap berýi kerek!Jýrnalıstiń kásibı mindetiniń biri qoǵamdaǵy túıtkildi atqarýshy bılikke jetkizý.Ákimderdiń basty mindeti kóterilgen túıtkildi sheshýdiń jolyn, tetigin taýyp,nátıjeli jumys isteý.
