«ادىرنا» ۇلتتىق پورتالىنىڭ كەزەكتى سۇحباتى ماڭعىستاۋ وبلىسى، تۇپقاراعان اۋدانىنىڭ توتەنشە جاعدايلار ءبولىمىنىڭ باسشىسى نۇرقوجا قوجابەرگەنۇلىمەن بولدى.
- قىزمەتىڭىز تۋرالى ايتىپ وتسەڭىز. ءبىر كۇنىڭىز قالاي وتەدى؟
- ءبىز، توتەنشە جاعدايلار ءبولىمى بارلىق تابيعي جانە تەحنوگەندى سيپاتتاعى توتەنشە جاعدايلاردى الدىن الۋ، سونىمەن قاتار جويۋ ماقساتىندا جۇمىستار اتقارامىز. كۇندەلىكتى تاڭەرتەڭ 8-دە ءورت سوندىرۋشىلەر، ياعني قاراۋىل كەزەكشىلىككە ءتۇسىپ، تاۋلىك بويعى كەزەكشىلىكتى ۇيىمداستىرادى. قىزمەتكە كەلە سالىسىمەن تاڭەرتەڭگىلىك تۇگەندەۋ، تەكسەرۋ، ادامداردىڭ جاعدايىن باقىلاۋ شارالارى جاسالىپ، ءارى قاراي جۇمىسقا كىرىسەمىز.
مىسالى، قاراۋىلدىق كەزەكشىلىكتە ءارتۇرلى جاعدايلار بولادى. باستى قۇندىلىعىمىز – ازاماتتىق قورعاۋ تۋرالى زاڭعا سايكەس ادامنىڭ دەنساۋلىعى. ودان بولەك ءۇي جانۋارلارىنا، جالپى جانۋارلارعا كومەكتەسىپ جاتامىز. قانداي جاعداي بولماسىن، جۇمىس تەلەفونىنا قوڭىراۋ تۇسسە، كومەكتەسۋگە اركەز دايىنبىز. 101 ءنومىرى تاۋلىك بويى، سونىمەن قاتار 112 ءنومىرى حالىققا قىزمەت ەتەدى.
جارتى جىلدىقتىڭ قورىتىندىسى بويىنشا ءورت ءسوندىرۋ بولىمىندە 406 شىعىس بولدى. انىقتاما رەتىندە ايتىپ وتەيىن، وعان ءورت جاعدايلارى، 16 جانۋ جاعدايى، ءورت-تاكتيكالىق ساباقتار، سۋ كوزدەرىن تەكسەرۋ ت.ب. جاعدايلار جاتقىزىلادى.
- توتەنشە جاعدايلار قانداي بولىمدەرگە بولىنەدى؟ حالىقتىڭ بىلەتىنى ءورت ءسوندىرۋ ءبولىمى عانا.
- بىزدە ءورت ءسوندىرۋ بولىمىنەن بولەك جەدەل قۇتقارۋ ءبولىمى جۇمىس ىستەيدى. قازىر - ءوزىڭىز بىلەتىندەي سۋعا ءتۇسۋ ماۋسىمى. وسى كەزەڭدە قاۋىپسىزدىك شارالارىن ساقتاۋ شارت. جەدەل قۇتقارۋ ءبولىمى ادامداردىڭ سۋعا قاتىستى ماسەلەلەرىمەن اينالىسادى. بيىل اۋدان بويىنشا 2 قايعىلى جاعداي تىركەلىپ ۇلگەردى (سۋعا باتۋ جاعدايى). سونداي جاعدايلاردا ءورت ءسوندىرۋ جانە جەدەل قۇتقارۋ ءبولىمى بىرلەسىپ قىزمەت اتقارادى. نەگىزىنەن مۇنداي توتەنشە وقيعالار جالپى بولىمگە تيەسىلى.
- حالىقتىڭ اراسىندا توتەنشە جاعدايلاردى الدىن الۋ بويىنشا قانداي شارالار ۇيىمداستىرىلىپ جاتىر؟
- توتەنشە جاعدايلار ءبولىمىنىڭ ءبىر جىلعا ارنالعان ارنايى جوسپارى بار. سول جۇمىس جوسپارىنا سايكەس توتەنشە جاعدايلاردى بولدىرماۋ جانە ولاردى الدىن الۋ ماقساتىندا پروفيلاكتيكالىق شارالار جۇرگىزىلەدى. مىسالى، جىل باستالعالى بارلىق اۋدان بويىنشا ءبىلىم بەرۋ ورىندارىندا، بالاباقشامەن، وقۋشىلارمەن تۇسىندىرمە جۇمىستارى جۇرگىزىلىپ جاتىر. ءورت قاۋىپسىزدىگى، توتەنشە جاعداي تاقىرىبىندا مۇعالىمدەرمەن بىرگە دارىستەر وقىلىپ، ينتەراكتيۆتى ساباقتار وتكىزىلەدى جانە جارىستار ۇيىمداستىرىلادى.
ودان بولەك جىلىتۋ ماۋسىمى كەزىندە (قازان مەن ءساۋىر ايلارى ارالىعىندا) قىزمەتكەرلەرىمىز تۇرعىن ۇيلەردە ۇگىت-ناسيحات جۇمىستارىن جۇرگىزىپ وتىرادى. سونىمەن قاتار تەڭىز جاعاسىندا دەمالىپ جۇرگەن ادامدارعا سۋدا ادامنىڭ ءوزىن ۇستاۋى، سۋداعى قاۋىپسىزدىك، قايعىلى جاعدايلاردى الدىنا الۋ باعىتىندا تۇسىندىرمە جۇمىستارى ءتيىستى دەڭگەيدە ايتىلادى. ودان بولەك ۇيىمدار مەن مەكەمەلەردە ءورت جاعدايلارىن الدىن الۋ ماقساتىندا سول ورىنداردى تەكسەرۋ جوسپارى بار. وسىنداي بىرلەسكەن شارالار ءاردايىم جۇيەلى تۇردە جوسپار بويىنشا جۇرگىزىلىپ وتىرادى.
قازىر - ءورت قاۋىپتى كەزەڭ. وبلىسىمىزدا، اۋداندا دالا ءورتى دەيتىن جوق. ويتكەنى بىزدە ورمان جوق. دەسە دە ءساۋىر ايىنان قىركۇيەك ايىنا دەيىنگى ارالىقتى ءورت قاۋىپتى كەزەڭ دەيمىز. دالا ورتتەرىن الدىن الۋ ماقساتىندا جەرگىلىكتى اتقارۋشى ورگاندارمەن، كاسىپكەرلىك بولىممەن بىرلەسىپ ەگىستىكتە، دالادا جۇمىس جاسايتىن مەكەمەلەرمەن دوڭگەلەك ۇستەلدەر ۇيىمداستىرىپ، تۇسىندىرمە جۇمىستارى جاسالادى. كەز كەلگەن توتەنشە وقيعانىڭ الدىندا تۇسىندىرمە-ەسكەرتۋ جۇمىستارىن جاسايمىز. حالىققا جادىناما تاراتىپ، ۆيدەوروليكتەر ءتۇسىرىپ كورسەتەمىز. باستى ماقساتىمىز – حالىقتى اقپاراتتاندىرۋ.
- وسى سالاعا بەت بۇرامىن دەگەن نيەتى بار جاستارعا قانداي كەڭەس بەرەسىز؟ ولار قاي جەردە ءبىلىم الۋلارى كەرەك؟
- بىزدە قازاقستان بويىنشا كوكشەتاۋ قالاسىندا ورنالاسقان «كوكشەتاۋ تەحنيكالىق ينستيتۋتى» قىزمەت اتقارادى. توتەنشە جاعدايلار سالاسىنداعى مامانداردى دايىندايتىن جالعىز جوعارى وقۋ ورنى - وسى. بيىلدان باستاپ بۇل ينستيتۋتتىڭ ساتىسى «ازاماتتىق قورعاۋ اكادەمياسى» ستاتۋسىنا اۋىستى.
ودان بولەك بىزدە 11 جىل وقىعان جالپى بىلىممەن دە جۇمىسقا كىرۋگە مۇمكىندىك بار. ولار كىشى سەرجانتتىق قۇرامعا الىنادى. ەگەر ەر ازامات جاسى 35-تەن اسپاعان، دەنساۋلىعى جارامدى بولسا، ءورت ءسوندىرۋ سالاسىنا جۇمىسقا قابىلدايمىز. بۇل سالاعا كەلۋ ديپلومدى قاجەت ەتپەيدى. دەسە دە ادام مانساپتىق ءوسۋدى قالاسا، ديپلومى بولۋى كەرەك. كەيدە جاس جىگىتتەر ديپلومسىز ءورت ءسوندىرۋشى بولىپ جۇمىس ىستەپ ءجۇرىپ، ءوزىمىزدىڭ وقۋىمىزدى سىرتتاي وقىپ، ءارى قاراي وفيتسەرلىككە دەيىن، ودان ءارى باسشىلىق قۇرامعا وسۋگە مۇمكىندىك الادى.
بىزدە تەك ءورت سوندىرۋشىلەر ەمەس، ينجەنەرلىك ماماندىقتار، قۇرىلىس جانە ەلەكتر سالاسىن بىتىرگەن ماماندار دا قىزمەت اتقارادى. سونىمەن قاتار ءبىزدىڭ سالانىڭ قىزمەتكەرلەرى زەينەتكە ەرتە شىعادى. ەرەكشەلىك - ۋنيۆەرسيتەتتە وقىعان ءتورت جىل جاس ماماننىڭ «ستاجى» بولىپ ەسەپتەلەتىندىگىندە. جاڭا عانا وقۋ بىتىرگەن ماماننىڭ ەڭبەك كىتاپشاسىندا ءتورت جىل ەڭبەك ءوتىلىمى بار دەگەن جازۋ بولادى.
ەسكەرەتىن جايت، جۇمىسقا قابىلداناتىن ماماندار اراسىندا مەديتسينالىق بايقاۋ قاتاڭ جۇرگىزىلەدى. سونىمەن قاتار دەنە شىنىقتىرۋ بويىنشا قوسىمشا سىناقتار بولادى. مۇنداعى ماقسات – توتەنشە جاعداي كەزىندە بولۋى مۇمكىن قايعىلى وقيعالاردى الدىن الۋ.
- اڭگىمەڭىزگە راحمەت!
سۇحباتتاسقان: اقمارال بەرەكەت،
«ادىرنا» ۇلتتىق پورتالى
