ءانشى اللا پۋگاچيوۆا جۋرناليست كاتەرينا گوردەەۆاعا بەرگەن سۇحباتىندا ءوزىنىڭ بالالىق شاعى، وتباسى تاريحى مەن باۋىرىنىڭ قاسىرەتتى تاعدىرى تۋرالى العاش رەت اشىق ايتتى، دەپ حابارلايدى "ادىرنا" ۇلتتىق پورتالى Orda.kz-كە سىلتەمە جاساپ.
ءانشىنىڭ سوزىنشە، ونىڭ تۋعان اعاسى كەڭەس داۋىرىندە قازاقستاندا اسكەري قىزمەت اتقارىپ، سەمەيدەگى يادرولىق پوليگوندا رادياتسياعا ۇشىراعان. بۇل جاعداي بۇكىل وتباسىنىڭ تاعدىرىنا اۋىر اسەر ەتكەن.
«اۋەلى اعام اسكەري قىزمەتتە بولدى، بايلانىس سالاسىنىڭ مىقتى مامانى ەدى. سەمەيدە، قىتاي شەكاراسىندا قىزمەت ەتىپ ءجۇرىپ ساۋلە ءتيدى. كەيىن بالالارى ءولى تۋا باستادى. سودان سوڭ ونى الدەبىر سەبەپپەن اۋعانستانعا جىبەردى»، — دەپ ەسكە الدى پۋگاچيوۆا.
ءانشىنىڭ ايتۋىنشا، اعاسى بالا كەزىنەن وتە دارىندى، ءتىل ۇيرەنۋگە قابىلەتتى بولعان. ول اسكەري شەت تىلدەر ينستيتۋتىنا تۇسۋگە نيەتتەنگەنىمەن، ساۋساعىنداعى كەمىستىك سالدارىنان قابىلدانباعان.
«بارلىق ەمتيحانىن ۇزدىك تاپسىرعان ەدى. بىراق ينستيتۋتقا الماي قويعانى ۇلكەن قاسىرەت بولدى. سول كەزدە جۇيكەسى سىر بەرىپ، ىشىمدىككە سالىنىپ كەتتى»، — دەدى ول.
كەيىن اعاسى اسكەري بايلانىس ۋچيليششەسىنە جىبەرىلىپ، ارمانىن جۇزەگە اسىرا الماسا دا، بىلىكتى اسكەري مامان بولعان.
«شىن مانىندە وتە تالانتتى جان ەدى… ونىڭ تاعدىرى مەن رادياتسيا سالدارى بۇكىل وتباسىمىزعا اۋىر سوققى بولدى»، - دەپ تولعاندى پۋگاچيوۆا.
بۇل پۋگاچيوۆانىڭ رەسەيدەن كەتكەننەن كەيىن بەرگەن العاشقى كەڭ كولەمدى سۇحباتى. ءانشى ءوزىنىڭ شەتەلگە كوشۋ سەبەبىن دە ءتۇسىندىردى.
ونىڭ سوزىنشە، جۇبايى ماكسيم گالكينگە «شەتەل اگەنتى» دەگەن ايىپ تاعىلىپ، وتباسىنا قۋدالاۋ جاسالعان. بالالارى مەكتەپتە بۋللينگكە ۇشىراعان.
«ار-وجدان داڭقتان قىمبات. مەن شىندىقتى ايتۋ ءۇشىن كەتۋگە ءماجبۇر بولدىم»، — دەدى ول.
پريمادوننا سۇحبات بارىسىندا سوعىستى دا، بيلىكتىڭ شەكسىزدىگىن دە سىنعا الدى. ءسوز بوستاندىعى — ءاربىر ازاماتتىڭ قۇقىعى ەكەنىن اتاپ ءوتتى.
ء«وزىمىزدىڭ دە، وزگە ەلدىڭ دە ادامدارىنىڭ قازاسى — توزۋگە بولمايتىن قايعى»، — دەدى پۋگاچيوۆا.
ءانشى بالالىق شاعىنداعى جوقشىلىق، مايدانگەر اكەسىنىڭ تاعدىرى، اعاسىنىڭ قاسىرەتتى ءومىر جولى، سونداي-اق شىعارماشىلىق بيىككە قالاي جەتكەنىن دە ەسكە الدى. ول «ارلەكينو» انىنەن باستاپ «زولوتوي ورفەيدەگى» جەڭىسىن، چەرنوبىل اپاتىن جويۋشىلارعا ارنالعان كونتسەرتتەرىن دە باياندادى.
