پرەزيدەنت قاسىم-جومارت توقاەۆتىڭ «Ana tili» گازەتىنە بەرگەن سۇحباتى جاريالاندى. وندا مەملەكەت باسشىسى قازاقستاننىڭ ەكس-پرەزيدەنتى نۇرسۇلتان نازارباەۆتىڭ بيلىكتەن كەتكەننەن كەيىنگى ارەكەتى تۋرالى ايتتى، دەپ حابارلايدى “ادىرنا” ۇلتتىق پورتالى.
“كەز كەلگەن ءداۋىردىڭ جاقسى جاعى دا، كولەڭكەلى تۇستارى دا بار. ءبىزدىڭ جاڭا تاريحىمىزدا جارقىن ساتتەر الدەقايدا كوپ بولدى. بۇل – اقيقات. سالىستىرمالى تۇردە العاندا، قىسقا مەرزىم ىشىندە مەملەكەتتىگىمىزدىڭ بەرىك تۇعىرى قالىپتاستى، بيلىك ينستيتۋتتارى قۇرىلدى، جاڭا استانامىز بوي كوتەردى، شەكارامىز شەگەندەلىپ، زاڭ جۇزىندە بەكىتىلدى. كوپتەگەن ەلمەن ءتيىمدى قارىم-قاتىناس ورناتىلدى، ەكونوميكاعا شەتەلدەن ينۆەستيتسيا تارتىلدى. وسى جەتىستىكتىڭ ءبارىن جوققا شىعارۋ دۇرىس بولماس ەدى. ءبىز ادىلەتتى مەملەكەت قۇرامىز دەسەك، تاريحقا دا، ونى جاساۋعا اتسالىسقان ازاماتتارعا دا ءادىل قاراۋىمىز كەرەك. مۇنىڭ ءبارى، تۇپتەپ كەلگەندە، ۇلتتىڭ بولاشاعى ءۇشىن قاجەت. وتكەندى وي ەلەگىنەن وتكىزىپ، ونى ءادىل ءارى شىنايى باعالاي الماساق، العا سەنىممەن قادام باسا المايمىز. ساياسي احۋالدىڭ ىقپالىمەن ءوز تاريحىڭدى كوپە-كورىنەۋ بۇرمالاي بەرۋگە بولمايدى. ەل شەجىرەسىن باسىنان باستاپ قايتا جازۋ ءتىپتى قاۋىپتى”، - دەدى توقاەۆ.
پرەزيدەنتتىڭ ايتۋىنشا، نازارباەۆتىڭ كەزىندە كەمشىلىكتەر بولعان.
“ارينە، نۇرسۇلتان نازارباەۆ ۇزاق جىل بويى ەل تىزگىنىن ۇستاعان ۋاقىتتا كەمشىلىكتەر بولدى. بىراق ەشتەڭە ىستەمەگەن ادام عانا قاتەلەسپەيدى. اشىعىن ايتۋ كەرەك، ول وتستاۆكاعا كەتكەنىمەن، قاۋىپسىزدىك كەڭەسىنىڭ توراعاسى بولىپ وتىرعان كەزدە ساياسي سىپايىلىقتى ساقتاي بەرمەيتىن. مۇنى دا ايتا كەتكەن ءجون. ۇنەمى پرەمەر-ءمينيستردى، ۇلتتىق بانكتىڭ توراعاسىن، مينيسترلەردى، اكىمدەردى شاقىرىپ الىپ، جينالىس وتكىزەتىن. بۇعان ءوز ازاماتتارىمىزدى بىلاي قويعاندا، شەتەل باسشىلارى مەن ديپلوماتتارى دا تاڭدانا قارايتىن. «نازارباەۆ قىزمەتىنەن كەتكەن سوڭ ءتىپتى جوعارىلادى، ەندى پرەزيدەنت تە وعان باعىنادى» دەگەن ءازىل اڭگىمە دە پايدا بولدى. ال، شىن مانىندە، بۇل ازىلدەيتىن جاعداي ەمەس ەدى.
بۇل جاعداي قوسارلانعان بيلىك تۋرالى الىپ قاشپا اڭگىمەنىڭ ورشۋىنە اكەپ سوقتى. شەنەۋنىكتەر دە كابينەتتەن كابينەتكە جۇگىرىپ، كىمنىڭ تاپسىرماسىن ورىندايتىنىن بىلمەي دال بولاتىن. ول از دەسەڭىز، كەيبىر شەنەۋنىكتەر «ەلباسى ينستيتۋتى پرەزيدەنت بيلىگىنەن جوعارى تۇرۋعا ءتيىس» دەپ، اقىلعا سىيمايتىن جاعدايدى زاڭ جۇزىندە نەگىزدەمەك بولدى، - دەيدى مەملەكەت باسشىسى.
سونداي-اق نازارباەۆتىڭ اقورداعا قايتىپ كەلۋى مۇمكىن ەكەنىن ايتقانى ناعىز بيلىك داعدارىسىن تۋىنداتقان.
نۇرسۇلتان نازارباەۆتىڭ 2021 جىلعى قاراشادا وتكەن Astana Club جيىنىندا 92 جاستاعى ماحاتحير موحامادتى مىسالعا كەلتىرىپ، ءوزىنىڭ اقورداعا قايتىپ كەلۋى مۇمكىن ەكەنىن مالىمدەۋىن جانە بۇرىنعى پرەزيدەنتتىڭ سول جىلى جەلتوقسان ايىندا سانكت-پەتەربۋرگ قالاسىندا وتكەن تمد ەلدەرىنىڭ سامميتىنە قاتىسۋىن ناعىز بيلىك داعدارىسىنا اكەپ سوقتىرعان نەگىزگى وقيعالار دەۋگە بولادى. سونىڭ الدىندا عانا جەرگىلىكتى ءبىر ساياساتتانۋشى وعان «ەلباسىنىڭ التىن ءداۋىرىن» قالپىنا كەلتىرۋ ءۇشىن باتىل شارالار قابىلداۋ قاجەتتىگىن ايتىپ، ارانداتۋشىلىق مازمۇنداعى حات جولداعان ەدى.
الايدا قازىر پاراساتتىلىق تانىتىپ، نۇرسۇلتان نازارباەۆتىڭ قازاقستانعا سىڭىرگەن تاريحي ەڭبەگىن لايىقتى باعالاۋ كەرەك. مەن پرەزيدەنت رەتىندە مەملەكەت مۇددەسىن باسشىلىققا الۋعا، ەل بىرلىگىن بارىنەن بيىك قويۋعا مىندەتتىمىن.
ءسىزدىڭ سۇراعىڭىزعا كەلسەك، قازىر ءبىز شامامەن ايىنا ءبىر رەت تەلەفون ارقىلى سويلەسىپ تۇرامىز”، - دەدى مەملەكەت باسشىسى.
پرەزيدەنتتىڭ وسىدان ءبىر جىل بۇرىن دا، 2024 جىلى 3 قاڭتاردا «ەگەمەن قازاقستان» گازەتىنە بەرگەن كولەمدى سۇحباتى جاريالانعان. سوندا پرەزيدەنت ىشكى جانە سىرتقى ساياسات، ەلدىڭ الەۋمەتتىك-ەكونوميكالىق دامۋى، 2022 جىلعى قاڭتار وقيعاسى، تۇرمىستىق زورلىق-زومبىلىق، اتوم ەلەكتر ستانتسيالارىنىڭ قۇرىلىسى جانە باسقا دا وزەكتى تاقىرىپتارعا قاتىستى سۇراقتارعا جاۋاپ بەرگەن ەدى.
