وتكەن كۇندەگى ەكى وقيعا كادىمگىدەي ەسەڭگىرەتتى. ەكەۋى ەلىمىزدەگى بالالاردىڭ جاعدايىن اشكەرە ەتكەندەي، بالالارىمىز ءۇشىن ەلىمىز قاۋىپسىز ەل ەمەس ەكەنى انىق كورىندى.
ءبىرىنشىسى، سارىاعاشتاعى وقيعا. بەس جاسار قىزدىڭ تاعدىرى. بۇل ەلىمىزدىڭ قۇقىق قورعاۋ ورگاندارىنىڭ بىلىققا باتقانىنىڭ ناتيجەسى. ءبىراز، جۇرت اتۋ جازاسىن ەنگىزۋ تۋرالى ايتىپ جاتىر. ەنگىزۋ كەرەك ونداي ازعىندارعا. بىراق، ودان دا ماڭىزدى دۇنيە بار.
ول قۇقىق قورعاۋ سالاسىنداعى ادىلەتتىلىك. ويلاڭىزشى، بۇرىن ءبىر رەت ادام ءولتىرىپ سوتتالعان ادام، ەكىنشى رەت بىرەۋدى بالتالاپ تاستاسا، ونى ءۇش جىلعا شارتتى جازاعا كەسىپ بوساتا سالۋ قانداي لوگيكاعا، قانداي ادىلەتتى زاڭعا سيادى؟
ەرتەڭ ءولىم جازاسىن ەنگىزگەن كۇندە ءالى جەتكەن، بايلانىسى جەتكەن قۇتىلىپ كەتپەسىنە كىم كەپىل؟ زاڭ تەك السىزدەر ءۇشىن عانا ىسكە اسىپ، بايلانىسى بار نەمەسە اقشالى ادام بىلگەنىن ىستەپ جۇرە بەرسە قالاي ەل بولامىز...
ايتپاقشى، ءبىزدىڭ ەلدە قولىنان كەلسە قونىشىنان باسۋدى دۇرىس سانايتىندار كوپ. ءبىر جۇلدىزسىماقتىڭ بالاسى جالعان قۇجات جاساپ، ۇبت-عا كىرسە قولىنان كەلسە ىستەسىن، نە كورە المايسىڭدار دەيتىن. ءبىر، جۇلدىزسىماق ەسىرتكىگە تويىپ الىپ، ماشينا ايداسا ەركەلىگىڭدى كوتەرەتىن حالقىڭ قالماپتى دەپ كۇڭىرەنەتىن قاۋىپ تۇرسا قانداي قۇقىقتىق ەل، قانداي ادىلەتتى قازاقستان بولامىز؟
ەكىنشىسى، الماتىداعى 7 جاسار قىزدىڭ ءولىمى. 10 شىلدە كۇنى الماتىدا جەتى جاسار قىزدى وگەي شەشەسى دارەتحاناعا بارىپ ۇلگەرمەي، ۇلكەن دارەتىن جىبەرىپ قويعانى ءۇشىن جۋىناتىن بولمەدە اياۋسىز ۇرىپ قاتىگەزدىكپەن ولتىرگەن. سوندا قويعان كىناسى بولمەنى لاستاعانى بولعان. قايتىس بولعان كىشكەنتاي قىزدىڭ اكەسى قاراپايىم اۋلا سىپىرۋشى بولىپ جۇمىس ىستەيدى، ايەلىنەن 15 جاس كىشى دەيدى.
جۋىناتىن بولمەدە ۇرىپ-سوعىپ، ءولىمشى ەتىپ ساباعان. قىزدىڭ اياعى مەن قولى سۇيەكتەرى سىنعان، باسى جارىلعان، دەنەسىنىڭ ءبارى كوگەرگەن، ازاپپەن كوز جۇمعان. ەڭ ايانىشتىسى بۇعان دەيىن دە كورشىلەر بالانىڭ كومەك سۇراپ جىلايتىنىن ايتىپ، بىرنەشە رەت پوليتسياعا جۇگىنگەن، سوڭعى رەت مامىر ايىندا ءتارتىپ ساقشىلارى شاقىرىلعان، بىراق بوستاندىق اۋدانىنىڭ ۋچاسكەلىك پوليتسيا قىزمەتكەرى ەشتەڭە ىستەمەگەن دەيدى. مىنە، تاعى دا پوليتسيانىڭ كىناسى بار. قۇقىق قورعاۋ سالاسىنىڭ جاۋاپسىزدىعى.
ال، ۇرىپ ولتىرگەن كۇدىكتى وگەي شەشە بالجان تۇرلىبەك دەگەن قوعام بەلسەندىسى ەكەن. ونى ءبىر سايتتار "قوعام قايراتكەرى" دەپ جازىپ تاراتىپ جاتىر. "قايراتكەر" دەگەن ءسوزدى دە قور قىلدى-اۋ، ابدەن. كىم كورىنگەننەن قايراتكەر جاسايمىز. كوكبەتتەن - تۇلعا، دۇلەيدەن - باتىر، شايپاۋدان زيالى جاساپ الاتىن قوعامعا اينالدىق.
ول دا ەرتەڭ اقتالىپ كەتسە تاڭعالمايمىز. بىزدە ءبارى مۇمكىن وكىنىشكە وراي.
ەڭ قيىنى، ءدال وسى ەكى وقيعادان بالالارىمىز قاۋىپسىز ەمەس ەكەنىن كورەمىز. ءبارىمىز بىتپەس قۋ تىرلىكتىڭ سوڭىندامىز. ۇيگە قاماساڭ تەلەفوننان وزگە ەرمەگى جوق، ونداعى تاربيەنىڭ وڭباي تۇرعانى دا اقيقات.
ال، ءبىر ۋاقىت دالاعا شىقسا، اۋا جۇتىپ بالا بوپ ويناپ شىقسا، بىرگە شىقپاي تاعى بولمايدى. قورقىنىشتى.
زاڭ ۇستەمدىك قۇرىپ، قۇقىقتىق ەلگە اينالماي ءبارى بەكەر. ادىلەتتى قوعام ورناتۋعا ءبارىمىز مۇقتاجبىز.
ال، بيلىك سوعان تالپىنعانداردى قۋدالايدى، قۋعىندايدى. مىنا جەردە بىلىق بار، بىلاي تۇزەتەيىك دەگەن ادامدى جاۋ كورەدى. ىشكى كۋحنياعا كىرگىزبەۋگە تىرىسادى. بۇلاي قالاي ەل بولامىز؟
قاتىگەزدىك سونشا اسقىنىپ كەتتى، نەگە؟
زاڭسىزدىق سونشا بەلەڭ الىپ كەتتى، نەگە؟
جۇرەكتەر نەگە سونشا قاتايىپ كەتتى؟
ادەلتتىلىكتى ءار ءبىرىمىز تالاپ ەتۋگە مىندەتتىمىز!
ءار ءبىرىمىز جەمقورلىقپەن كۇرەسۋگە مىندەتتىمىز!
ءار ءبىرىمىز قۇقىقتىق ەل بولۋعا ارەكەت جاساۋعا مىندەتتىمىز!
ءار ءبىرىمىز قوعامداعى ءار بالاعا قامقور بولۋعا مىندەتتىمىز!
ءار ءبىرىمىز زاڭدى ساقتاۋعا، ساقتاتۋعا ارەكەت ەتۋگە مىندەتتىمىز!
ايتپەسە، ەل بولمايمىز!!!
