موڭعوليادا 11 شىلدەدەن باستالاتىن ءداستۇرلى «ناادام» مەرەكەسى تويلانىپ جاتىر. موڭعول حالقىنىڭ ۇلتتىق مەرەكەسىندە ات جارىسى، ۇلتتىق كۇرەس ءوتىپ، ايتۋلى كۇننىڭ ساداق اتۋ سىندى سايىستارمەن كوركى قىزادى. مەرەكەگە وراي ۇيىمداستىرىلعان ات جارىسىندا اتبەگى ساپار بايىنۇلىنىڭ ءتورت بىردەن سايگۇلىگى وزا شاپتى، دەپ حابارلايدى "ادىرنا" ۇلتتىق پورتالى جەرگىلىكتى «Janadauir.com»-گە cىلتەمە كورسەتە وتىرىپ.
موڭعولياداعى ۋلاانحۋس ولكەسىنىڭ تۋماسى، بەلدى كاسىپكەر، اتبەگى ساپار بايىنۇلىنىڭ باپتاعان سايگۇلىكتەرى جۇلدەلى بولدى. باپكەر وسى جولعى تويعا تاي جارىسىنان باستاپ ايعىر جارىسىنا دەيىن 7 ات قوسقان. ونىڭ 2 اتى ءبىرىنشى كەلگەن.
انىعىراق ايتقاندا جۋان ات جانە قۇنان جارىسىنان ءبىرىنشى، تاي جانە بەستى ات جارىسىنان ءۇشىنشى بولىپ كومبەگە جەتكەن، دەپ حابارلايدى موڭعوليالىق «Janadauir.com».
بايگەگە قوسىلعان اتتارىنىڭ ىشىنەن 4 اتى جۇلدەگەر اتانعان.
اتبەگى ساپاردىڭ ايتۋىنشا، ول ات باپتاۋدىڭ قىر-سىرىن كىشكەنەدەن جەتىك مەڭگەرگەن. ءوزى بالا كۇنىنەن اساۋ ۇيرەتىپ، جۇيرىك مىنگەن قىر بالاسى ەكەندىگىن ايتتى. ات باپكەرى قىس بويى 24 جىلقىنى قولعا ۇستاپ، ولاردى الامانعا دايىندايتىنىن حابارلادى.
اتبەگى ساپار بايىنۇلىنىڭ بولاشاقتاعى ماقساتى – جىلقى تۇقىمىن اسىلداندىرۋ.
"ادىرنا" ۇلتتىق پورتالى
