ەكى ەل پرەزيدەنتتەرىنىڭ قاتىسۋىمەن وتكەن كەزدەسۋدە قازاقستان رەسپۋبليكاسى ۇلتتىق عىلىم اكادەمياسى مەن موڭعوليا عىلىم اكادەمياسى اراسىندا ءوزارا تۇسىنىستىك جانە ىنتىماقتاستىق تۋرالى مەموراندۋم بەكىتىلدى، دەپ حابارلايدى "ادىرنا" ۇلتتىق پورتالى.
اقوردا تاراتقان اقپاراتقا سايكەس، ەكى ەل اراسىندا ون ءۇش قۇجاتقا قول قويىلعان.
سونىمەن قاتار، ش. ءۋاليحانوۆ اتىنداعى تاريح جانە ەتنولوگيا ينستيتۋتى مەن شىڭعىسحان ۇلتتىق مۋزەيى اراسىندا دا ىنتىماقتاستىق تۋرالى قۇجاتقا قول قويىلدى. بۇل كەلىسىمگە ينستيتۋت باس ديرەكتورى، اكادەميك زيابەك قابىلدينوۆ پەن مۋزەي ديرەكتورى، اكادەميك سامپيلدوندوۆىن چۋلۋن قول قويعان. مەموراندۋم اياسىندا قازاقستان مەن موڭعوليا تاريحشىلارىنىڭ بىرلەسكەن قاۋىمداستىعىن قۇرۋ، موڭعولياداعى قازاقتاردىڭ تاريحىن زەرتتەۋ، سونداي-اق شىڭعىس اۋلەتى مەن جوشى ۇلىسى كەزەڭدەرىنە قاتىستى ورتاق عىلىمي ەكسپەديتسيالار ۇيىمداستىرۋ كوزدەلگەن.
تاراپتار بۇدان بولەك بىرلەسكەن عىلىمي جوبالاردى جۇزەگە اسىرۋ، حالىقارالىق كونفەرەنتسيالار وتكىزۋ، جاس عالىمدارعا ارنالعان تاعىلىمدامالار ۇيىمداستىرۋ جانە Scopus بازاسىندا يندەكستەلگەن جۋرنالداردا ورتاق جاريالانىمدار ازىرلەۋ جونىندە كەلىسىمگە كەلدى. سونداي-اق XVII–XVIII عاسىرلاردىڭ ءبىرىنشى جارتىسىنداعى قازاق-جوڭعار قاتىناستارىنا قاتىستى تاريحي قۇجاتتار جيناعىن بىرلەسىپ شىعارۋ جوسپاردا بار.
ايتا كەتەيىك، بۇعان دەيىن شىڭعىس حان ۇلتتىق مۇراجايى ديرەكتورىنىڭ سۇحباتىن جاريالاعان ەدىك.
