مايك پومپەو اقش قىتايداعى ەتنيكالىق قازاقتار مەن ۇيعىرلاردىڭ قۋعىندالۋىن توقتاتۋدى تالاپ ەتەتىنىن ايتتى
نۇر-سۇلتان، 2 اقپان – Sputnik. اقش-تىڭ مەملەكەتتىك حاتشىسى مايك پومپەو الەم ەلدەرىن قىتايدا ەتنيكالىق قازاقتار مەن ۇيعىرلاردىڭ قۋعىندالۋىن توقتاتۋعا شاقىردى. بۇل تۋرالى Sputnik قازاقستان حابارلادى.
ء"بىز ادام ساۋداسى ماسەلەلەرىن، قازاقستانمەن شەكارا ماڭىنداعى قىتايدىڭ شىڭجاڭ لاگەرلەرىندە وتىرعان ءبىر ميلليوننان استام ۇيعىر مەن ەتنيكالىق قازاقتاردىڭ اۋىر تاعدىرىن تالقىلادىق", - دەدى پومپەو ەلوردادا قازاقستاننىڭ سىرتقى ىستەر ءمينيسترى مۇحتار تىلەۋبەردىمەن وتكەن كەلىسسوزدەردەن كەيىن.
ول اقش بارلىق ەلدى جۇمىلا ارەكەت ەتىپ، بۇل رەپرەسسيانى توقتاتۋدى تالاپ ەتۋگە شاقىراتىنىن جەتكىزدى.
ء"بىز قىتايدان قاشقان بوسقىنداردى قاۋىپسىز باسپانامەن قامتاماسىز ەتۋگە ۇندەيمىز", - دەدى پومپەو.
ايتا كەتسەك، اقش-تىڭ مەملەكەتتىك حاتشىسى مايك پومپەو ەكى كۇندىك ساپارمەن قازاقستانعا كەلدى.
پومپەو مەملەكەت باسشىسى قاسىم-جومارت توقاەۆپەن جانە تۇڭعىش پرەزيدەنت، قاۋىپسىزدىك كەڭەسىنىڭ توراعاسى نۇرسۇلتان نازارباەۆپەن كەزدەسەدى دەپ جوسپارلانعان.
مەملەكەتتىك حاتشىنىڭ ساپارى العاشىندا جاڭا جىلدىڭ العاشقى جۇمىس كۇنى – 5 قاڭتارعا جوسپارلانعان ەدى. الايدا ول اقش-تىڭ يراكتاعى ەلشىلىگىنىڭ الدىنداعى تارتىپسىزدىككە بايلانىستى قازاقستانعا ساپارىن كەيىنگە قالدىردى.
قازاقستانعا ساپارىنان كەيىن پومپەو وزبەكستانعا بارادى.
