باق: كوكشەتاۋدا كوللەدج ستۋدەنتى ەمتيحاننان ءۇش العانى ءۇشىن وزىنە قول سالۋى مۇمكىن

2792
Adyrna.kz Telegram

كوكشەتاۋدا انە-مىنە ديپلوم الىپ، مۇعالىم بولۋدى ارمانداپ جۇرگەن كوللەدج ستۋدەنتى وزىنە قول سالدى. ەمتيحاننان ءۇش العان بويجەتكەن ۇستازدار ادىلەتسىزدىك قىلدى دەپ قاتتى قامىعىپتى. ونىسىن اناسىنا جازعان حاتىندا ايتقان، دەپ حابارلايدى «ادىرنا» ءتىلشىسى «كتك»-عا سىلتەمە جاساپ.

جاقسى وقۋعا تىرىسقانىن ايتقان اياۋلىم ءبىلىمىنىڭ لايىقتى باعالانباعانىنا كۇيىنگەن. ال كوللەدجدەگىلەر تومەن باعانىڭ بۇلاي قايعىلى جاعدايعا ۇلاساتىنىن البەتتە كۇتپەگەن. ولار اعىلشىن تىلىنەن ەمتيحاندى قايتا تاپسىرۋعا مۇمكىندىك بەردىك دەپ وتىر.
ارتىندا اڭىراپ قالعان اتا-اناسى مەن تۋعان-تۋىسى اياۋلىمنىڭ بۇنداي ارەكەتكە بارعانىنا سەنە الار ەمەس. اعاسىنىڭ 16 جىل كۇتكەن ءسابيىنىڭ تويىندا ءان ايتۋعا ازىرلەنىپ كويلەگىن دە دايىنداپ قويىپتى. اناسى ەمتيحانعا كەتكەن قىزى حابارلاسىپ، ءۇش العانىن ايتىپ جىلاعاندا بىرەر ساعاتتان كەيىن ماڭگى ايىرىلىپ قالامىن دەپ ويلاماعان. اياۋلىم سول كۇنى قالا ىرگەسىندەگى ۇيىنە كەلىپ، قورادا جاس ءومىرىن قيا سالعان.

«مەنىڭ بالاپانىمدى وسىنداي جاعدايعا جەتكىزگەندەرى ءۇشىن جاۋاپ بەرسىن. ءبىر باعانى ايادى ما ەكەن؟.. سونشاما مەنىڭ قىزىمدى جەك كورەتىندەي نە بولدى؟ بۇلاي قالدىرمايمىز، ارىز جازامىز»،—دەيدى مارقۇمنىڭ اناسى.

بويجەتكەننىڭ تۋىستارى 18 جاستاعى قىزدىڭ ولىمىنە كوللەدج ۇستازدارىن كىنالاپ وتىر. بۇعان سەبەپ – اياۋلىمنىڭ سوڭعى حاتى. وندا مارقۇم اتا-اناسىنىڭ ءۇمىتىن اقتاي الماعانىن، ۇستازدارى ءبىلىمىن ءادىل باعالاماعانىن جازىپتى. ءتورت جىل ءبىلىم العان پەداگوگيكا كوللەدجدەگىلەرگە دە بۇل ءجايت توبەسىنەن جاي تۇسكەندەي اسەر بەرگەن.

«ەمتيحان بەلگىلەنگەن ۋاقىتىندا ءوتتى. ولار جاۋاپتارىن ەلەكتروندى تۇردە جىبەرەدى. 12 ەمەس، 8 بالل الدى. ءيا، 3 العانىنا رەنجىدى. بىراق قايتا تاپسىرۋعا كەلىستىك. قايتا تاپسىرۋعا كەلگەندە تاقىرىپ سول، بىراق تەست باسقا ەكەنىن كورىپ باس تارتتى»،—دەيدى كوللەدج وقىتۋشىسى دينارا ءجۇسىپوۆا.

اياۋلىم ءۇش العانى ءۇشىن وزىنە قول سالاتىنىن قاسىنداعى قۇربىلارى دا سەزبەگەن. اعىلشىن ءتىلىن جەتىك مەڭگەرىپ شەتەلدە جۇمىس ىستەيمىن دەگەن اسقاق ارمانى بولىپتى. قازىر بۇل ءىس بويىنشا تەرگەۋ ءجۇرىپ جاتىر.

«ولىمگە يتەرمەلەۋ بابىمەن سوتقا دەيىنگى تەرگەۋ باستالدى. قايعىلى جاعداي كراسنىي يار كەنتىندە بولعان. 18 جاستاعى قىز وزىنە قول سالعان. بارلىق جاعداي جانجاقتى تەرگەلۋدە»،—دەدى اقمولا وبلىسى پد ءباسپاسوز قىزمەتىنىڭ رەسمي وكىلى اسەم ءابدىراحمانوۆا.

پىكىرلەر