Kökşetauda äne-mıne diplom alyp, mūǧalım boludy armandap jürgen kolledj studentı özıne qol saldy. Emtihannan üş alǧan boijetken ūstazdar ädıletsızdık qyldy dep qatty qamyǧypty. Onysyn anasyna jazǧan hatynda aitqan, dep habarlaidy «Adyrna» tılşısı «KTK»-ǧa sılteme jasap.
Jaqsy oquǧa tyrysqanyn aitqan Aiaulym bılımınıŋ laiyqty baǧalanbaǧanyna küiıngen. Al kolledjdegıler tömen baǧanyŋ būlai qaiǧyly jaǧdaiǧa ūlasatynyn älbette kütpegen. Olar aǧylşyn tılınen emtihandy qaita tapsyruǧa mümkındık berdık dep otyr.
Artynda aŋyrap qalǧan ata-anasy men tuǧan-tuysy Aiaulymnyŋ būndai äreketke barǧanyna sene alar emes. Aǧasynyŋ 16 jyl kütken säbiınıŋ toiynda än aituǧa äzırlenıp köilegın de daiyndap qoiypty. Anasy emtihanǧa ketken qyzy habarlasyp, üş alǧanyn aityp jylaǧanda bırer saǧattan keiın mäŋgı aiyrylyp qalamyn dep oilamaǧan. Aiaulym sol künı qala ırgesındegı üiıne kelıp, qorada jas ömırın qiia salǧan.
«Menıŋ balapanymdy osyndai jaǧdaiǧa jetkızgenderı üşın jauap bersın. Bır baǧany aiady ma eken?.. Sonşama menıŋ qyzymdy jek köretındei ne boldy? Būlai qaldyrmaimyz, aryz jazamyz»,—deidı marqūmnyŋ anasy.Boijetkennıŋ tuystary 18 jastaǧy qyzdyŋ ölımıne kolledj ūstazdaryn kınälap otyr. Būǧan sebep – Aiaulymnyŋ soŋǧy haty. Onda marqūm ata-anasynyŋ ümıtın aqtai almaǧanyn, ūstazdary bılımın ädıl baǧalamaǧanyn jazypty. Tört jyl bılım alǧan pedagogika kolledjdegılerge de būl jäit töbesınen jai tüskendei äser bergen.
«Emtihan belgılengen uaqytynda öttı. Olar jauaptaryn elektrondy türde jıberedı. 12 emes, 8 ball aldy. İä, 3 alǧanyna renjıdı. Bıraq qaita tapsyruǧa kelıstık. Qaita tapsyruǧa kelgende taqyryp sol, bıraq test basqa ekenın körıp bas tartty»,—deidı kolledj oqytuşysy Dinara Jüsıpova.Aiaulym üş alǧany üşın özıne qol salatynyn qasyndaǧy qūrbylary da sezbegen. Aǧylşyn tılın jetık meŋgerıp şetelde jūmys ısteimın degen asqaq armany bolypty. Qazır būl ıs boiynşa tergeu jürıp jatyr.
«Ölımge itermeleu babymen sotqa deiıngı tergeu bastaldy. Qaiǧyly jaǧdai Krasnyi iar kentınde bolǧan. 18 jastaǧy qyz özıne qol salǧan. Barlyq jaǧdai janjaqty tergelude»,—dedı Aqmola oblysy PD baspasöz qyzmetınıŋ resmi ökılı Äsem Äbdırahmanova.
Ūqsas jaŋalyqtar
