Kókshetaýda áne-mine dıplom alyp, muǵalim bolýdy armandap júrgen kolledj stýdenti ózine qol saldy. Emtıhannan úsh alǵan boıjetken ustazdar ádiletsizdik qyldy dep qatty qamyǵypty. Onysyn anasyna jazǵan hatynda aıtqan, dep habarlaıdy «Adyrna» tilshisi «KTK»-ǵa silteme jasap.
Jaqsy oqýǵa tyrysqanyn aıtqan Aıaýlym biliminiń laıyqty baǵalanbaǵanyna kúıingen. Al kolledjdegiler tómen baǵanyń bulaı qaıǵyly jaǵdaıǵa ulasatynyn álbette kútpegen. Olar aǵylshyn tilinen emtıhandy qaıta tapsyrýǵa múmkindik berdik dep otyr.
Artynda ańyrap qalǵan ata-anasy men týǵan-týysy Aıaýlymnyń bundaı áreketke barǵanyna sene alar emes. Aǵasynyń 16 jyl kútken sábıiniń toıynda án aıtýǵa ázirlenip kóılegin de daıyndap qoıypty. Anasy emtıhanǵa ketken qyzy habarlasyp, úsh alǵanyn aıtyp jylaǵanda birer saǵattan keıin máńgi aıyrylyp qalamyn dep oılamaǵan. Aıaýlym sol kúni qala irgesindegi úıine kelip, qorada jas ómirin qııa salǵan.
«Meniń balapanymdy osyndaı jaǵdaıǵa jetkizgenderi úshin jaýap bersin. Bir baǵany aıady ma eken?.. Sonshama meniń qyzymdy jek kóretindeı ne boldy? Bulaı qaldyrmaımyz, aryz jazamyz»,—deıdi marqumnyń anasy.
Boıjetkenniń týystary 18 jastaǵy qyzdyń ólimine kolledj ustazdaryn kinálap otyr. Buǵan sebep – Aıaýlymnyń sońǵy haty. Onda marqum ata-anasynyń úmitin aqtaı almaǵanyn, ustazdary bilimin ádil baǵalamaǵanyn jazypty. Tórt jyl bilim alǵan pedagogıka kolledjdegilerge de bul jáıt tóbesinen jaı túskendeı áser bergen.
«Emtıhan belgilengen ýaqytynda ótti. Olar jaýaptaryn elektrondy túrde jiberedi. 12 emes, 8 ball aldy. Iá, 3 alǵanyna renjidi. Biraq qaıta tapsyrýǵa kelistik. Qaıta tapsyrýǵa kelgende taqyryp sol, biraq test basqa ekenin kórip bas tartty»,—deıdi kolledj oqytýshysy Dınara Júsipova.
Aıaýlym úsh alǵany úshin ózine qol salatynyn qasyndaǵy qurbylary da sezbegen. Aǵylshyn tilin jetik meńgerip shetelde jumys isteımin degen asqaq armany bolypty. Qazir bul is boıynsha tergeý júrip jatyr.
«Ólimge ıtermeleý babymen sotqa deıingi tergeý bastaldy. Qaıǵyly jaǵdaı Krasnyı ıar kentinde bolǵan. 18 jastaǵy qyz ózine qol salǵan. Barlyq jaǵdaı janjaqty tergelýde»,—dedi Aqmola oblysy PD baspasóz qyzmetiniń resmı ókili Ásem Ábdirahmanova.
