ۇلتتىق اقپارات كەڭىستىگىندە جازۋشىلار وداعىنىڭ اۋ-جايى تالقىعا تۇسكەنى ءبىراز بولدى. و باستا "جازۋشىلار وداعى قوعام ءۇشىن قاجەت ينستيتۋت پا؟" دەگەن ساۋال ورتاعا شىقتى. الەۋمەتتىك مەدياداعى تالاس-تارتىس شيراپ، وداقتىڭ باسشىلىعى مەن تۇرلەنۋى ماسەلەسى قاتار قارالدى. قوعامداعى ساياسي وزگەرىستەر مەن بۇلعاقتارعا بەيقامدىق تانىتىپ، سىي-سياپات جولىندا عانا "توبە كورسەتەتىن" جازۋشىلار توبىن جازعىرىپ شىققان قوعام بەلسەندىلەرى تابىلدى. ساكەن سەيفۋلليننەن باستاپ ۇلت زيالىلارى قىزمەت ەتكەن شىعارماشىل شاڭىراقتىڭ جاڭا زامانعا ساي جۇلگەلىپ، جاندانعانىن قالايتىندار ءوز ۇمىتكەرلەرىن ۇسىندى.
جازۋشىلار وداعىنىڭ باسشىسىنا ۇسىنىلعان ۇمىتكەرلەر قاتارىندا مەرەكە قۇلكەنوۆ، ۇلىقبەك ەسداۋلەت، اقبەرەن ەلگەزەك، نۇرجان قۋانتايۇلى، جۇسىپبەك قورعاسبەك، دۋمان رامازان، ارمان المەنبەت سىندى تۋىندىگەر ازاماتتار بار. داۋدىڭ باسى اقىن اقبەرەن ەلگەزەكتىڭ ء"وز ەركىمەن" وداقتاعى قىزمەتىنەن كەتكەنىن حابارلاعان ساتتەن باستالدى. وقىرمان ءدۇدامال كەيىپتە قالعان. اقىن ءوزىنىڭ جازباسىندا بيۋروكراتيا مەن جازۋشىلار وداعىنا ءتان ىردۋ-دىردۋدان شارشاعانىن ايتتى.
«مەن بۇگىننەن باستاپ قازاقستان جازۋشىلارى وداعىنداعى قىزمەتىمنەن رەسمي تۇردە كەتتىم. كەلە جاتقان قۇرىلتايدا قويىلاتىن سپەكتاكلگە قاتىسۋعا قۇلقىم جوق». اقىن اقبەرەن ەلگەزەك.
الايدا جازۋشىلار وداعىنىڭ قازىرگى باسشىسى ۇلىقبەك ەسداۋلەت ءوز ورىنباسارىنىڭ وكپەسى قارا قازانداي ەكەنىن ايتىپ، شەشىمىنىڭ سىرى باسقادا دەيدى. ونىڭ ايتۋىنشا:
...بىراق ءوزى سوڭعى كەزدە بيزنەس جاساپ جۇرگەن. كىتاپ شىعاراتىن باسپاسى بار. سوعان ۋاقىتى جەتپەي ءجۇر مە، بىلمەيمىن. كەيىنگى ۋاقىتتا جۇمىسقا كىشكەنە سالعىرت قاراپ ءجۇردى...<...>... ونىڭ ايتىپ تۇرعانى – الدا وتەتىن قۇرىلتاي. بالكىم، جازۋشىلار وداعىنىڭ توراعالىعىنا تۇسكىسى كەلدى مە ەكەن، بىرەۋ وعان «سەن ءبارىبىر وتپەيسىڭ» دەگەن بە، بىلمەيمىن عوي. سونداي ءبىر وكپەسى بار سياقتى.
وداقتىڭ ىشكى شوعىنان تۇتانعان الاۋدان ءورت شىقتى. قالامگەرلەر قىزدى-قىزدىنىڭ بۋىمەن الەۋمەتتىك جەلىدە بەس جىل بويى اتقارىلعان جۇمىستار، قارجىنىڭ جۇمسالۋ جايى، قور بولعان جانە قايتارىلعان اقشا، جەكە باستىڭ جاعدايىن ءسوز ەتتى. سونىمەن قاتار وداق ارقاسىندا ءوز ەڭبەكتەرى مەن "ەت جاقىندارىنىڭ" شىعارماسىن اسقان باسىمدىقپەن ناسيحاتتاۋ جايى مەن قۇرالاقان قالعانداردىڭ حاقى-قۇقى اشىق تالقىلانا باستادى.
العاشىندا وداقتى جانداندىرۋعا قاتىستى ءوزىنىڭ ۇتىمدى وي، تىڭ يدەياسىن ايتىپ، جازۋشى، باسپاگەر ارمان المەنبەت كوزگە ءتۇستى. باسپاگەردىڭ پايىمداۋىنشا، وداق - قازاق قوعامىنا قاجەتتى رۋحاني ينستيتۋت. ول ءوز يدەياسىن قوعام تالقىسىنا تاستاپ، كوپشىلىك قاۋىمنىڭ وڭ باعاسىن الدى. تەك ماسەلە - ارمان المەنبەتتىڭ جازۋشىلار وداعىنىڭ قۇرامىندا بولماۋى. دەگەنمەن ۇمىتكەر ءوز باعدارلاماسىن فەيسبۋك پاراقشاسىندا جاريالادى. ونىڭ ايتۋىنشا, "قازاق ءتىلىن تەرەڭ بىلەتىن، شىعارماشىلىق قابىلەتى بار قالامگەرلەر، اسىرەسە قىرىقتان اسقان بۋىن وسى قايناعان تىرشىلىككە ارالاسا الماي قالدى".
جاس پەن جاسامىس. جاھاندىق تۇلعا ما، ۇلتتىق سيپات پا؟
جاس پەن ورتا جاستاعى ءارى جاڭاشىل جازۋشىلار ۇمىرتكەرلەردىڭ "داعدارىس مەنەدجەرى", "جاھاندىق تۇلعا", "لينگۆيست", "ديپلومات" بولعانىن قالايتىنىن جەتكىزدى. ولاردىڭ "كوبىك ءسوز بەن اتاسىن ايتىپ اس بۇلدايتىن، باباسىن ايتىپ، بەلەڭگە شىعاتىنداردان" شىنايى جالىققانى بايقالادى.
- جازۋشىلار وداعىنىڭ قازىرگى توراعاسى 69 جاستاعى اتامىز ۇلىقبەك ەسداۋلەتتىڭ ورنىنا 72 جاستاعى اتامىز مەرەكە قۇلكەنوۆ باسقارادى دەگەن اڭگىمە بار! دۇرىس قوي، جازۋشىلار وداعىن ءار ءجۇز باسقارىپ كەلەدى، كەلەسى كەزەك - باسقارماعان جۇزدە. بىراق، نەگە پەنسياداعى اتالاردى شارشاتا بەرەسىزدەر، ول كىسىلەردى دەمالدىرۋ كەرەك قوي، تەرىن الىپ، ناعىز بايگە قوساتىن جاستا عوي. بايگە دەگەنىم زەينەت جاسىندا بۇل كىسىلەردەن كەرەمەت شىعارما تۋار ەدى. سىزدەر قىزمەتكە سالا بەرەسىزدەر بۇل كىسىلەردى،... - دەپ جازدى ەرقانات تۇرسىنجانۇلى.
ازاماتتىق جۋرناليستيكا وكىلى ءسابيت ىرىسباۆ بىلاي جازدى:
- جازۋشىلار وداعىنىڭ توراعاسى مەرەكە قۇلكەنوۆ بولادى دەپ حابارلادى ۇلى دالا ءجۋرناليسى وڭعار قابدەن. شالداردان شارشامادىق پا؟
دەگەنمەن ەڭسەلى بۋىن اراسىندا جازۋشىلار وداعىنا ۇلتتىق سيپات دارىتىپ، قوعام كوڭىلىنىڭ كىلتىن تاپقانىن قۇپتاپ وتىرعاندار دا بار.
داۋ اراسىندا جازۋشى بەيبىت سارىباي ماسەلەنى الىستان وراعىتۋ قاجەت ەكەندىگىن تىلگە تيەك ەتىپ ۇلگەردى:
- اناۋ كرەسلو جازۋشىلار وداعى توراعاسىنىڭ ورنى. ول ورىنعا وتىرۋ ءۇشىن ەڭ اۋەلى شىعارماشىلىق الەۋەتىڭ بولۋ كەرەك. وقىرمان دا، قالام ۇستاعان قاۋىم دا سەنىڭ شىعارماشىلىعىڭدى مويىنداۋ كەرەك.
ادەبيەت ءۇشىن سۇيەكتى، وقىرمان ءۇشىن سۇيىكتى شىعارماڭ بولۋى شارت. ايتپەسە، كۇشتى مەنەدجەر بولسام بولدى دەپ كىرىپ كەلەتىندەي، كراكاديلدەردى قورعاۋ وداعى ەمەس بۇل. ەكىنشىدەن، ارينە، كۇشتى مەنەدجەر بولۋىڭ كەرەك. ۇشىنشىدەن مىسىڭ (مەد ەمەس) بولۋى كەرەك. جوعارى بيلىكتى وزىڭمەن ساناستىرا الماساڭ ءبارى بەكەر. مينيسترلەر مەن وبلىس، قالا اكىمدەرى تۇگىلى، ۇكىمەت باسشىسىنا تىكەلەي تەلەفونداتاتىن بەدەل كەرەك-اق. ء“اي، ءاليحان، قالدارىڭ قالاي؟”،-دەمەسەڭ دە، بۇگەجەكتەمەيتىندەي دەڭگەيدە بول. ءسوزىڭدى وتكىزە الۋعا ءتيىسسىڭ. ول بولماسا، قويا عوي. شارۋا قيىن. وسى ۇشەۋى ءبىر باسىڭدا توقايلاسسا عانا، بەل شەشە كىرىس. مەن ادەيى ادال، مەيىرىمدى، اقجۇرەك، جاناشىر دەگەندەي ناقتى كەرەك تالاپتاردى قوسپاي وتىرمىن. ويتكەنى سەن ونسىز دا سولاي بولۋىڭ كەرەك.
بەيبىت سارىباي جانە جازۋشىلار وداعى باسشىسىنىڭ ورنى
كانديداتتى لەپەسشىل قولداۋشىلارىنا قاراي ەمەس، باعدارلاماسىنا قاراي تاڭداۋ قاجەت...
بۇل جولعى وداق باسشىسىن سايلاۋدا تىڭ يدەيا مەن جاڭا باعىتتار ۇسىنىپ جۇرگەن - ارمان المەنبەت. باسپاگەر سايلاۋ جولىندا بارلىق تالاپتاردى ەسكەرىپ، قارسىلاس ۇمىتكەر دۋمان رامازاندى پىكىرسايىسقا، دەباتقا، شاقىردى. بىراق جازۋشى دەباتتى ۋاقىت شىعىنى دەپ سانايتىنىن ايتىپ، باس تارتتى.
ارمان المەنبەت ءوز باعدارلاماسىندا جازۋشىلاردى جۇمىسقا تارتۋ، ۇلتتىق پروزانى دامىتۋ، جازۋشىلاردىڭ الەۋمەتتىك مارتەبەسىن ايقىنداۋ، فيليالدار مەن وداقتاعى جيىندار ماسەلەسىن قاراستىرعان. مىسالى:
جازۋشىلار وداعىندا تىرشىلىكتى قايناتۋ جايىندا. ونىڭ ىشەنەن كىتاپحانا مەن كىتاپ دۇكەنى اشىلۋى كەرەك. ماڭايداعى كونسەرۆاتوريا مەن ونەر اكادەمياسىنىڭ ستۋدەنتتەرى، تاياۋ-جىراقتاعى ۋنيۆەرسيتەت ستۋدەنتتەرى سول جەرگە كەلىپ كىتاپ وقىپ، كوفە ءىشىپ، ءبىر-بىرىمەن ارالاسۋى كەرەك. سول جەردە ىلعي كەزدەسۋلەر ءوتىپ جاتۋى كەرەك. ول ەركىن فورماتتا، وقىرمانمەن كەزدەسۋ سەكىلدى وتۋگە ءتيىس. تەك جازۋشىلار عانا ەمەس، عالىمدار، ساياساتتانۋشىلار، كاسىپكەرلەر دە كەلىپ جاتۋى كەرەك. وداقتىڭ ىشىندە ءتىل ۇيرەتەتىن كۋرستار اشىلۋى كەرەك. سونداي-اق، ونەر اكادەمياسىنىڭ جانە باسقا دا وقۋ ورىندارىنىڭ ستۋدەنتتەرىنەن قۇرىلعان اۋەسقوي تەاتر جۇمىس ىستەسە، وعان جاس دراماتۋرگتار پەسا جازسا، اقىلى قويىلىمدار قويسا، قالا حالقى كەلەتىنىنە كۇمان بولماس ەدى.
جازۋشى دۋمان رامازان باعدارلاماسىندا:
...شىعارماشىلىق ءۇيى بار، مەملەكەتتىك تەندەدلەردەن تۇسەتىن قارجى-قاراجات بار، ەگەر ءىستىڭ ەبىن تاپسا، ءوزىن-ءوزى اقتايدى دەپ ويلايمىن. وداققا تۇسكەن ءار تيىننىڭ ورنىمەن جۇمسالۋىن قاتاڭ قاداعالاپ، ەرەكشە باقىلاۋدا ۇستاسا، وڭدى-سولدى شاشا بەرمەسە، كوپ نارسە تىندىرۋعا بولادى. جىل سايىن وداقتىڭ كىرىس-شىعىسىن ەسەپتەپ، ەسەپ بەرىپ وتىرسا، جۇرتشىلىقتا دا ەشقانداي كۇدىك-كۇمان تۋمايدى. زامانعا ساي ءبارى اشىق بولۋى كەرەك. تۇككە قاجەتى جوق جيىنداردىڭ بارلىعىن قىسقارتىپ، نەمەسە باسقاشا، جاڭاشا فورماتتا وتكىزۋدى ويلاستىرىپ، جاڭاشا جۇمىس ىستەۋگە كوشۋ كەرەك. بۇل جاعىنان العاندا دا ىستەيمىن دەگەن ادامعا قازاقستان جازۋشىلار وداعىندا مۇمكىندىك مول. ءوزىم قىزمەت ىستەيتىن «جۇلدىز» جۋرنالىندا ىسكە جارايتىن دەنى دۇرىس ءبىر كومپيۋتەر، ءبىر پرينتەر جوق. جازۋشىلار وداعىنىڭ قازىرگى جالپى جاعدايى وسىنداي. ءبارىن جاڭالاۋعا، جاراقتاندىرۋعا، ءدال سوعان قارجى تابۋعا بولادى، - دەيدى.
تارتىستىڭ قىزعان شاعىندا الامانعا قازاق ۇلتتىق ۋنيۆەرسيتەتى، جۋرناليستيكا فاكۋلتەتىنىڭ دەكانى نۇرجان قۋانتايۇلىنىڭ كانديداتۋراسى قوسىلدى. الەۋمەتتىك جەلىدە قارشا بوراعان قولداۋلار مەن كوزقاراستاردىڭ مولدىعى اڭدالادى. قالامگەردىڭ باعدارلاماسى "جاڭا كەزەڭدە – جاڭا بەلەسكە" دەپ اتالادى. باعدارلامادا ديپلوماتيالىق بايلانىس، قارجى تارتۋ ماسەلەسى، باسپا قىزمەتى مەن حالىقارالىق بايلانىس، شەتەل ۇيىمدارىنىڭ تاجىريبەسى، جاس قالامگەرلەر ماسەلەسى ءسوز ەتىلگەن:
...اۋەلى جازۋشىلار وداعىنىڭ جارعىسى وزگەرۋى ءتيىس. وداقتىڭ «باسقارما مۇشەلىگى» جانە «سەكرەتاريات» دەپ اتالاتىن باسقارۋ فورمالارى زامان اعىسىنا ىلەسە الماي بارادى.
ۋاقىت تالابىنا سايكەس جاڭا جوبالارعا جول اشىلۋى قاجەت. «ەستى ادام ەسكىنى جاڭعىرتادى» دەگەندەي، بۇرىنعى ۇلگىنى دە جاڭا مازمۇندا جاڭعىرتقان ءجون. مىسالى، سوۆەت وداعى كەزىندە دۇرىلدەپ جۇمىس ىستەگەن «كىتاپ ساۋداسى» جۇيەسىن مادەنيەت مينيسترلىگىمەن، وبلىس اكىمدىكتەرىمەن بىرلەسە وتىرىپ رەسپۋبليكالىق دەڭگەيدە جاڭاشا ۇيلەستىرۋگە ابدەن بولادى... وداقتىڭ شىعارماشىلىق كەڭەسى اشىلىپ، ول جۇيەلى تۇردە جۇمىس ىستەۋى كەرەك. جازۋشىلار وداعىنىڭ جانىنان ادەبي قور اشىلىپ، ول كوممەرتسيالىق نەگىزگە كوشۋى قاجەت... كەيبىر قازاق ءتىلدى كىتاپتار Kitap DYKENI-ىندە تۇرعانىمەن، ولارعا كورسەتىلەتىن جارناما مەن تەحنيكالىق قولداۋ جوقتىڭ قاسى. قازاق تىلىندەگى اۋديوكىتاپتاردى تەز تابۋعا بولاتىن سايتتار كوپتەپ اشىلۋى كەرەك. «امازون» پلاتفورماسىنا شىعۋ ءۇشىن ءبىزدىڭ شىعارمالار اعىلشىن تىلىنە ساپالى اۋدارىلۋى كەرەك، ال ول ءبىر كۇننىڭ جۇمىسى ەمەس.
ال جازۋشىلار وداعىنىڭ جانە ءبىر ۇمىتكەرى ۇلىقبەك ەسداۋلەت وداق جانىنان ادەبي قور قۇرۋعا قۇلشىنىپ وتىرعاندىعىن ءبىلدىردى. باعدارلامادا شەتەلمەن بايلانىس اگەنتتىگىن اشۋ قاجەتتىلىگى دە ايتىلعان.
- مادەنيەت مينيسترلىگىمەن بىرىگىپ، «كوركەم اۋدارما ورتالىعىن» قۇرۋ. مۇنداي ورتالىقتار الەمنىڭ ءبىراز ەلىندە بار... جازۋشىلارعا كىتاپ جازۋعا گرانت ءبولۋ. بۇل جۇمىس تا مادەنيەت مينيسترلىگىنىڭ قولداۋىمەن ىسكە اسىرىلادى. مۇنىڭ ەرەجەلەرى مەن شارتتارىن، قارجىلاندىرۋ تارتىپتەرىن جاساۋدى قولعا الدىق. بۇل جەردە ارناۋلى كوميسسيا قۇرىلىپ، ساراپتاما ارقىلى قاتاڭ سۇرىپتاۋ جۇرگىزىلەدى...
...جاستارعا ارنالعان «التىن توبىلعى»، «التىن ساقا»، «ۇلى دالا»، «ايتۇمار» سياقتى بايقاۋلاردىڭ ۇزىلمەۋىنە، قارجىسىن كوبەيتۋگە كوڭىل بولەمىز.جاستارعا ارنالعان «التىن توبىلعى»، «التىن ساقا»، «ۇلى دالا»، «ايتۇمار» سياقتى بايقاۋلاردىڭ ۇزىلمەۋىنە، قارجىسىن كوبەيتۋگە كوڭىل بولەمىز.
دەگەنمەن جاستارعا ارنالعان ادەبي بايقاۋلاردىڭ سالتاناتتى شاراسىنان كەيىن ەشكىم "تىنىش تارقاعان" ەمەس. بايقاۋلارعا كوپ وقىرمان كۇمانمەن قارايتىنىن ايتۋىمىز كەرەك. ونىڭ دالەلى - "ايبوزداعى" ايعاي-شۋ.
جازۋشى قانات ابىلقايىر وداق توراعاسىنا لايىق ازامات رەتىندە قالامگەر جۇسىپبەك قورعاسبەكتىڭ كانديداتۋراسىن ۇسىندى. ونىڭ ۇسىنىسىن اقىن توقتارالى تاڭجارىق، اقىن ۇلاربەك دالەيۇلى قولدادى.
- "ۇلىقبەك اعا توراعالىقتان كەتە قالسا، ول ورىنعا لايىق كىم بار؟" دەگەن وي مازالاعالى ءبىر اي بولدى.ارى ويلاپ، بەرى ويلاپ ءوز باسىم جۇسىپبەك قورعاسبەكءتىڭ كانديداتۋراسىنا توقتادىم.مەنىڭشە، قانداي جاعداي بولماسىن، ساكەن، ءسابيت، عابيتتەردەي الىپتاردان قالعان قاسيەتتى وردانى الدىمەن قازاقتى شىعارماشىلىعىمەن مويىنداتقان قالامگەر باسقارۋ كەرەك.جۇسىپبەك اعانىڭ "جانسەبىل", "جىندى قايىڭ", "قاسقىر ادامىنان" باستاپ بار شىعارماسى سول ۇدەدەن شىعادى،.. - دەدى قانات ابىلقايىر.
جۋرناليست ءارى قالامگەر سەرىك ابىكەنۇلى كەي كانديداتتاردى ۇسىنىپ، بيلىك وكىلدەرىنە توپتاسىپ حات جازعانداردى جازعىردى.
- توپتاسىپ حات جازۋ توقتاماپتى، ا؟ باياعىدا قازاقشا ءماۋ دەمەيتىن ءماسىموۆتى قازاق ءتىلىنىڭ قامقورشىسى كورىپ حات زۋلاتقاندار تاعى دا "پاشكىلەپ" قول قويىپ، ءتۇرلى لاۋازىمدى تۇلعالارعا قاراي زۋلاتىپ جاتىر. ءبىرىنىڭ كوسەگەنى - وداققا باستىق، ەندى بىرىنىكى جاي عانا - وداقباستىق. وتكەننەن بەرى قاراپ، وقىپ ءجۇر ەدىم، ءدال وسى تارتىستان دەموكراتيا لەبى ەسكەندەي بولعان. توردەن قولداۋشى، جەرلەس، رۋلاستان قورعاۋشى ىزدەگەن "تازكەپەش" تاعى ءدوپ كەپتى.
قالىڭ قازاق قىزىعا كوز تىگەتىن كۇن. وداق بيلىكتىڭ ساياسي سپەكتاكل قوياتىن ساحناسىنا اينالدى ما؟
ايىلىن جيىپ، تەرتەسىن تارتا ەلدىڭ تۇكپىر-تۇكپىرىنەن جولعا شىققان قالامگەرلەردىڭ فوتوسۋرەتتەرى الەۋمەتتىك جەلىدە جاريالانىپ جاتىر. ەرتەڭ - قۇرىلتاي. قازاقتىڭ قارقارا قالامگەرىنىڭ قۇتتى ورداسىنا اينالعان كيەلى شاڭىراقتا سايلاۋ وتەدى. قىزۋ تارتىس، ءتىپتى، جۇدىرىق ءتۇيىستىرىپ، اياق تەبىستىرەر كۇتپەگەن جاعدايلاردىڭ بولاتىنىن ءىشى سەزىپ وتىرعاندار كوپ. ونىڭ ۇستىنە بۇرناعى، XV قۇرىلتايداعى، جايت جۇرتقا ءمالىم.
جازۋشىلار وداعىنىڭ قۇرىلتايى. الماتى. 12 ناۋرىز 2018 جىل. "ازاتتىق راديوسىنان"
ونى دا ەستەرىڭىزگە سالا كەتەيىك، وسىنىڭ الدىنداعى قۇرىلتايدا ءسوز العان اقىن مۇحتار شاحانوۆ نۇرلان ءورازاليندى “قورازالين” دەپ اتاعان ەدى.
- ورازالين ۇلتتىق مۇددەگە كەلگەندا قورازالين بولدى. تاۋىقالين، ءشوجاليننىڭ دەڭگەيىندە سامعادى. ول بيلىكتەگى باسشىلاردىڭ ءتۋفليىن شەبەرلىكپەن جالادى. ونىڭ ەڭبەگى سول. بۇل دا قازىرگى كەزەڭنىڭ ۇلكەن ونەرى، – دەدى مۇحتار شاحانوۆ.
“جينالىسقا كەلمەي سىرتتان تون ءپىشۋ، ءوزىن جازۋشىلار وداعىنان جوعارى قوياتىن ۇلىلىقتىڭ اۋرۋىمەن اۋىرعان ادامداردىڭ عانا قولىنان كەلەتىن نارسە. ۇيقاستى مەن دە سىزگە ايتايىن، ماعان ەكى، ءۇش جىل بۇرىن حات كەلدى. “شاحانوۆ، شاكالوۆ” دەگەن. سىزدەر ەلدى سىيلاڭىزدار، اعايىن. مەنىڭ اكەمدە، مەنىڭ اتامدا ەشقايسىڭىزدىڭ شارۋالارىڭىز بولماسىن. وسى مەنىڭ ەكى اعاما بەرگەن جاۋابىم، – دەدى نۇرلان ورازالين.
ايرىقشا وقىس ارەكەتتەر مەن جاعا جىرتىسۋ امالدارى مۇنداي باسقوسۋلارعا ءتان قۇبىلىستار. بۇل جايلى تاناگوز تولقىنقىزى مىنانداي پىكىر بىلدىرگەن-تۇعىن:
- جاقىندا وتكەن جازۋشىلار وداعىنىڭ پلەنۋمىندا وتىرىپ، ەلدىڭ قايماعى سانالاتىن اقىن-جازۋشى اعالارىمدى سىرتتاي باقىلادىم. كەشەگى الاش ارىستارى قانداي ەدى؟ كەشەگى ءاليحان بوكەيحان مەن احمەت بايتۇرسىنۇلى، ءمىرجاقىپ دۋلاتۇلى مەن مۇستافا شوقايلار قانداي ەدى؟! ولار نەنى اڭسادى؟ ءبىز بۇگىن نەنى داۋلاپ ءجۇرمىز؟ مەن زالدا وتىرىپ اتىلىپ كەتكەن الاش ارىستارىن قاتتى ساعىندىم. ماعان ءتاڭىر تاڭداۋ بەرسە، قازاقتى قىناداي قىرعان، قيت ەتسە اتىلىپ كەتەتىن قاسىرەتتى عاسىرعا اتتانار ەدىم.
سوڭعى جىلدارى جازۋشىلار وداعىنىڭ بيلىكتىڭ "قولبالاسىنا" اينالىپ كەتكەندىگى دە ايتىلا باستادى. قالاي بولعاندا دا، قۇرىلتاي ورتاق ىمىراعا كەلۋدىڭ كيەلى نۇكتەسى بولا ما، نەمەسە داۋدىڭ جاڭا جالعاسى بولا ما، ەرتەڭ وسى ۋاقىتتا تالقىلاپ وتىراتىن شىعارمىز...
داستان قاستاي
"ادىرنا" ۇلتتىق پورتالى
