بۇگىن، 30 ماۋسىم - اقىن، جۋرناليست، ەل اۋزىندا جۇرگەن ەستى ءان “نۋريكامال” ءانىنىڭ ءسوزىن جازعان ءحانبيبى ەسەنقاراقىزى 75 جاسقا تولدى، دەپ حابارلايدى “ادىرنا” ۇلتتىق پورتالى.
ءحانبيبى ەسەنقاراقىزى 1949 جىلى سارىاعاش اۋدانىندا دۇنيەگە كەلگەن. ەڭبەك جولىن ۇستازدىق قىزمەتتەن باستادى.
1971 – 1976 جىلدارى سارىاعاش اۋدانى «قىزىل تۋ» گازەتىنىڭ قىزمەتكەرى، 1976 – 1980 جىلدارى وبلىستىق تەلەراديو كوميتەتىندە رەداكتور، 1980 – 1987 جىلدارى حالىق شىعارماشىلىق وبلىستىق ورتالىعىندا باس مامان، 1987 – 1993 جىلدارى وبلىستىق «قايىرىمدىلىق» قورىنىڭ ءتورايىمى، وبلىستىق «قازاق ءتىلى» قوعامىنىڭ ءتورايىمى، وبلىستىق مادەنيەت باسقارماسىنىڭ باستىعى قىزمەتتەرىن اتقاردى.
1994 جىلدان ش.قالداياقوۆ اتىنداعى وبلىستىق فيلارمونيانىڭ ديرەكتورى. «قانات قاقتى»، «بۇلتسىز اسپان»، جۇلدىزىم»، «جانگۇلىم»، «جان ايقايى»، «ماحاببات ماڭگىلىك»، «جىر كىتابى»، «سىر كىتابى»، «شىندىققا قاراي ءجۇزدىم مەن»اتتى پروزالىق كىتاپتاردىڭ اۆتورى. قر ەڭبەك سىڭىرگەن قىزمەتكەرى بولدى.
ءحانبيبى ەسەنقاراقىزى اۋەزدى انىمەن دە، ۇيلەسىمدى سوزىمەن دە، شىعۋ تاريحىمەن دە ۇلكەن تانىمالدىلىققا يە بولىپ، ءالى كۇنگە دەيىن ەل اۋزىندا جۇرگەن “نۋريكامال” ءانىنىڭ ءسوزىن 1988 جىلى جازدى. ال اۋەنىنىڭ اۆتورى، ءوزىنىڭ جۇبايى - تۇردىقىلىش ىزتاەۆ.
ءان تۇردىقىلىش ىزتاەۆتىڭ نۋريكامال ەسىمدى قىزعا عاشىق بولۋىنان تۋعان ەكەن. ول كەزدە وتباسىنىڭ ءۇش بالاسى بولعان.
ەسەنقاراقىزىنىڭ ايتۋىنشا، ول ءبىر كۇنى جارىنىڭ پيانينو جانىندا وتىرعانىن كورەدى. ول كەزدە ونەرپاز جارىنىڭ نۋريكامال ەسىمدى بويجەتكەنگە عاشىق بولىپ قالعانىن بىلگەن. سول ساتتە جارىنىڭ اتىنان نۋريكامالعا ولەڭ جازىپ، "ايتقىڭ كەلگەنى وسى ما ەدى؟" دەپ، ولەڭدى كۇيەۋىنە اكەلىپ بەرگەن ەكەن.
سول ساتتە قازاق ءانىنىڭ قورى "نۋريكامال" تۋىندىسىمەن تولىقتى.
