دەپۋتات رينات زايتوۆ پارلامەنتتىڭ كەزەكتى وتىرىسىندا ءوزىنىڭ دەپۋتاتتىق ساۋالىن الماتى قالاسى اكىمى ەربولات دوساەۆقا، پرەمەر-مينيستر ورىنباسارى التاي كولگىنوۆكە جولدادى. ول قازاقتىڭ ايتىس ونەرىنىڭ قوعام ءۇشىن ماڭىزدىلىعىن ايتىپ، الماتى قالاسىنان ارنايى جەكە عيمارات ۇسىنۋدى سۇرادى، دەپ جازادى "ادىرنا". بۇل تۋرالى پارلامەنتتە ايتىلدى.
"قازاق حالقى ءۇشىن ايتىس ونەرىنىڭ ورنى ارقاشان ەرەكشە بولعان. ءسوز قادىرىن، ءوز قادىرىم دەپ ۇققان قازاق، ايتىس ونەرىن ءبىرتۇتاس مەملەكەتتىڭ مۇددەسىن قورعايتىن پىكىرتالاس الاڭى دەپ ءبىلدى. بۇگىنگى كۇنگە دەيىن ارا تۇرا مينيسترلىكتەن بولىنگەن قارجىعا ۇيىمداستىرىلىپ جۇرگەن ايتىستار بولعانى بولماسا، مەملەكەتتەن ماردىمدى قولداۋ كوردى دەپ ايتا المايمىز. سىزدەردەن سۇرايتىنىمىز، بىرىنشىدەن الماتى قالاسىنان ايتىسكەر اقىندار مەن جىرشى-تەرمەشىلەر وداعىنىڭ تۇراقتى مەكەن-جايى بولاتىن ارنايى عيمارات قاراستىرۋىلارىڭىزدى، سونداي-اق مادەنيەت منيسترلىگى تاراپىنان جۇيەلى قارجىلاندىرۋلارىڭىزدى سۇرايمىز" دەدى زايتوۆ.
قوعام بەلسەندىسى، ايتىسكەر اقىن، جۋرناليست وڭاعار قابدەن ۆيدەونى جەلىدە ءبولىسىپ، اتالمىش عيماراتقا ءجۇرسىن ەرماننىڭ اتىن بەرسە دە ارتىق ەتپەيتىنىن جازدى:
"ايتىسكەر اقىندار مەن جىرشى-تەرمەشىلەر وداعىنا دەپ قابىلداڭىزدار. جىراۋلار مەن تەرمەشىلەر دە وگەي بالانىڭ كۇيىن كەشىپ جۇرگەنى وتىرىك ەمەس. ءار وبلىس ورتالىعىندا اسسامبلەياعا دا ءبىر ءبىر ءزاۋلىم ساراي بەردىك قوي. اقىندار مەن جىرشى، تەرمەشىلەردىڭ ءوز الدىنا جەكە سارايى بولعانى دۇرىس. ول سارايعا ءجۇرسىن ەرماننىڭ اتىن بەرىپ قويسا دا ارتىق ەمەس" دەپ ءبولىستى ول.
