اتىراۋدا 8 جاسار بالا جايىق وزەنىنە باتقان جاسوسپىرىمدەردى قۇتقاردى (ۆيدەو)

2521
Adyrna.kz Telegram
فوتو: اشىق دەرەككوزدەن
فوتو: اشىق دەرەككوزدەن

اتىراۋدا 8 جاسار وقۋشى وزەنگە باتقان ەكى ءجاسوسپىرىمدى قۇتقاردى. بۇل تۋرالى اتىراۋ وبلىستىق پوليتسيا دەپارتامەنتى مالىمدەدى. قۇتقارعان ءسات ۆيدەوعا ءتۇسىپ قالعان، دەپ حابارلايدى “ادىرنا” ۇلتتىق پورتالى.

مالىمەت بويىنشا، 3 جەلتوقساندا كامەلەتكە تولماعان ەكى 14 جانە 9 جاستاعى جاسوسپىرىمدەر «جۇمىسكەر» ىقشام اۋدانىنداعى كوپىردىڭ جانىندا مۇز ۇستىندە ويناپ جۇرگەن. كەنەتتەن مۇز جارىلىپ، بالالار سۋعا باتۋعا شاق قالعان. دىنمۇحاممەد ويلانباستان كومەككە جەتىپ، باسىن قاتەرگە تىگىپ، جىگىتتەردى مۇزداي سۋدان الىپ شىقتى.

“سۋعا باتىپ بارا جاتقان بالالاردى كورگەندە، مەنىڭ جالعىز ويىم ولاردى قۇتقارۋ بولدى، ويتكەنى اعىس قاتتى. مەن ويلانباستان مۇزدىڭ ويىعىنا جۇگىرىپ بارىپ، ەكى بالانى سۋدان الىپ شىقتىم. مەن ولاردى قۇتقارۋ ءۇشىن قولدان كەلگەننىڭ ءبارىن جاسادىم”، - دەيدى 8 جاسار دىنمۇحاممەد.

كەيىن وقيعا ورنىنا جەتكەن پوليتسيا قىزمەتكەرلەرى بالالارعا كومەكتەسىپ، ولاردى امان-ەسەن اتا-انالارىنا تاپسىردى.

“مەن دىنمۇحاممەدكە بالامدى ولىمنەن امان الىپ قالعان باتىل ارەكەتى مەن جاناشىرلىق سەزىمى ءۇشىن ەرەكشە العىس ايتقىم كەلەدى. ول بولماعاندا مۇنىڭ سوڭى قالاي بولارىن كىم ءبىلسىن؟! ول وسىنداي باتىلدىعى ءۇشىن ۇلكەن قۇرمەتكە لايىق. مەن دە ءوزىمنىڭ العىسىمدى بىلدىرەمىن. ەرجۇرەك، ابزال ۇل تاربيەلەپ وسىرگەن اتا-اناسىنا مىڭ العىس. ەڭ باستىسى دەنى ساۋ بولىپ ءوسسىن”، - دەيدى قۇتقارىلعان 9 جاسار بالانىڭ اناسى.

ايتا كەتەيىك، پوليتسيا قىزمەتكەرلەرى مۇزدىڭ ءالى جۇقا ەكەنىن جانە ونىڭ ءۇستى وتە قاۋىپتى ەكەنىن ەسكەرتەدى. سونداي-اق، كامەلەتكە تولماعان بالالاردىڭ اتا-انالارىن بالالارىن قاداعالاۋعا شاقىرادى.

پىكىرلەر