اتىراۋ وبلىسىنداعى شاڭدى داۋىل مەن توپىراق ارالاس جاڭبىردىڭ سەبەبىن انىقتاۋ ماقساتىندا كەشەندى جۇمىس باستالدى. وبلىس اكىمىنىڭ ورىنباسارى جاسۇلان بيسەمبيەۆ جەتەكشىلىك ەتەتىن ارنايى جۇمىس توبى كاسپي تەڭىزىنىڭ تارتىلىپ قالعان اۋماقتارىن اۋەدەن شولىپ شىقتى.
جۇمىس توبى قۇرامىنا اتىراۋ وبلىسى اكىمدىگى، ەكولوگيا دەپارتامەنتى، توتەنشە جاعدايلار دەپارتامەنتى جانە قورشاعان ورتانى قورعاۋ ماماندارى كىردى.
ەكولوگيا دەپارتامەنتىنىڭ باسشىسى ەرلان ەسەنوۆ قالىپتاسقان احۋالدىڭ نەگىزگى سەبەبى تەڭىز دەڭگەيىنىڭ تومەندەۋى مەن تابيعي فاكتورلار ەكەنىن اتاپ ءوتتى.
— كاسپي تەڭىزى دەڭگەيىنىڭ تومەندەۋىنە بايلانىستى بۇرىن سۋ استىندا بولعان اۋماقتار قازىر اشىق جاتىر. بۇل جەرلەرگە جينالعان تۇز بەن ۇساق قۇم جەلدىڭ اسەرىنەن اۋاعا كوتەرىلىپ، قالاعا تاراۋدا. وسى جاعداي ەكولوگيالىق احۋالدىڭ كۇرت وزگەرۋىنە اسەر ەتتى، — دەدى ول.
قازىر تەڭىز جاعالاۋى مەن قالا اۋماعىنان توپىراق سىنامالارى الىنىپ، كەشەندى زەرتحانالىق جۇمىستار باستالدى. زەرتتەۋ ناتيجەلەرى تابيعي قۇبىلىستىڭ ناقتى سەبەپتەرىن انىقتاۋعا مۇمكىندىك بەرەدى.
سونىمەن قاتار مۇنداي جاعدايلاردىڭ الدىن الۋ شارالارى دا كوزدەلۋدە. جاسۇلان بيسەمبيەۆتىڭ مالىمەتىنشە، ەگەر زەرتتەۋ قورىتىندىسى وسى سەبەپتى راستاسا، قۇرعاعان اۋماققا تابيعي ورتاعا بەيىمدەلگەن وسىمدىكتەر وتىرعىزىلماق. بۇدان بولەك، اۋاعا كوتەرىلەتىن شاڭ مەن تۇز كولەمىن ازايتۋ ءۇشىن ىلعالداندىرۋ تەحنولوگيالارىن قولدانۋ مۇمكىندىگى قاراستىرىلماق.
بۇگىندە قالا اۋماعىندا ۇساق قۇم قاباتى اشىق جاتقان ءتورت نەگىزگى ۋچاسكە انىقتالدى. مۇندا وسىمدىك قاباتى جوق، سوندىقتان بۇل اۋماقتاردى كوگالداندىرۋ باعدارلاماسىنا ەنگىزۋ جوسپارلانىپ وتىر.
ەسكە سالا كەتەيىك، بۇعان دەيىن وبلىس اكىمى سەرىك شاپكەنوۆ شاڭدى داۋىلداردىڭ پايدا بولۋىنا اسەر ەتەتىن اۋماقتارعا جان-جاقتى تالداۋ جۇرگىزۋدى تاپسىرعان ەدى. سونىمەن قاتار عىلىمي قاۋىمداستىق پەن سالا ماماندارىن تارتا وتىرىپ، كاسپي تەڭىزىنىڭ جاعالاۋى مەن قۇرعاعان بولىكتەرىندە فيتومەليوراتسيالىق شارالاردى ازىرلەپ، ىسكە اسىرۋ مىندەتى قويىلعان.
