اتىراۋ وبلىسى جالپىۇلتتىق «كىتاپ وقيتىن ۇلت» جوباسىن ىسكە اسىرۋعا قوسىلىپ، وتباسىلىق قۇندىلىقتاردى نىعايتۋعا جانە كىتاپ ارقىلى ۇرپاقتار ساباقتاستىعىن ساقتاۋعا ەرەكشە كوڭىل ءبولىپ وتىر.
2 شىلدە كۇنى اتىراۋ وبلىسىنىڭ اكىمدىگى مەن «كىتاپ وقيتىن ۇلت – چيتايۋششايا ناتسيا» قوعامدىق قورى وقۋ مادەنيەتىن دامىتۋعا جانە رەسپۋبليكالىق كىتاپ وقۋ مارافونىنا دايىندالۋعا باعىتتالعان ىنتىماقتاستىق تۋرالى مەموراندۋمعا قول قويدى.
ايماقتاعى جوبانىڭ نەگىزگى باعىتتارىنىڭ ءبىرى — «كىتاپ وقيتىن اۋلەت» باستاماسى. ونىڭ باستى يدەياسى — قازاقستاندىق وتباسىلاردا بىرگە كىتاپ وقۋ ءداستۇرىن قايتا جاڭعىرتۋ، ياعني كىتاپتى قارىم-قاتىناس جاساۋعا، ومىرلىك تاجىريبە الماسۋعا جانە ۇرپاقتار اراسىنداعى بايلانىستى نىعايتۋعا ىقپال ەتەتىن قۇرالعا اينالدىرۋ.
اتىراۋ وبلىسى ەجەلدەن ۇلكەنگە قۇرمەتىمەن، بەرىك وتباسىلىق قاعيدالارىمەن جانە ۇرپاقتار ساباقتاستىعىمەن تانىمال. وتباسىندا العاشقى ومىرلىك قۇندىلىقتار، بىلىمگە دەگەن سۇيىسپەنشىلىك جانە ۇلتتىق مادەنيەتكە قىزىعۋشىلىق قالىپتاسادى. سوندىقتان وتباسىلىق كىتاپ وقۋ ءداستۇرىن دامىتۋ قازاقستان رەسپۋبليكاسى پرەزيدەنتىنىڭ زەردەلى ۇلت قالىپتاستىرۋ تۋرالى جارلىعىن ىسكە اسىرۋدىڭ ماڭىزدى قۇرامداس بولىگى رەتىندە قاراستىرىلادى.
التى اي بويى «كىتاپ وقيتىن ۇلت» رەسپۋبليكالىق كىتاپ وقۋ مارافونىنا قاتىسۋشىلار جوبا ۇسىنعان تىزىمدەگى 15 شىعارمانى وقۋى ءتيىس. تىزىمگە وتباسىلىق قۇندىلىقتارعا، تاربيەگە، جاۋاپكەرشىلىككە جانە حالىقتىڭ رۋحاني مۇراسىنا ارنالعان كىتاپتار ەنگىزىلگەن. سولاردىڭ قاتارىندا باۋىرجان مومىشۇلىنىڭ «ۇشقان ۇيا»، مۇحتار ماعاۋيننىڭ ء«بىر اتانىڭ بالالارى» جانە قازاقستان رەسپۋبليكاسى پرەزيدەنتى قاسىم-جومارت توقاەۆتىڭ «اكە تۋرالى وي-تولعاۋ» كىتاپتارى بار. بۇل شىعارمالار اتا-انالاردى، بالالاردى، اجەلەر مەن اتالاردى كىتاپ وقۋ مادەنيەتى توڭىرەگىندە بىرىكتىرىپ، وتباسىلىق تالقىلاۋلاردىڭ نەگىزىنە اينالۋى ءتيىس.
مەموراندۋمعا قول قويۋ پرەزيدەنتتىك باستامانى وڭىرلىك دەڭگەيدە ىسكە اسىرۋدىڭ تەتىگى بولدى. قۇجات مەملەكەتتىك ورگانداردىڭ، ءبىلىم جانە مادەنيەت ۇيىمدارىنىڭ، ازاماتتىق قوعام وكىلدەرىنىڭ جانە كاسىپكەرلىك سەرىكتەستەردىڭ كۇش-جىگەرىن بىرىكتىرۋدى كوزدەيدى. بۇل زاماناۋي كىتاپ وقۋ مادەنيەتىن قالىپتاستىرۋعا جانە كىتاپتىڭ قازاقستاندىقتاردىڭ كۇندەلىكتى ومىرىنە ەنۋىنە مۇمكىندىك بەرەدى.
جوبانىڭ ماڭىزدى قۇرامداس بولىگىنىڭ ءبىرى — تەحنولوگيالىق سەرىكتەس Yandex Qazaqstan كومپانياسىنىڭ «ياندەكس كىتاپتار» سەرۆيسى. ول جوبا قاتىسۋشىلارىنا اۋقىمدى تسيفرلىق كىتاپحاناعا قولجەتىمدىلىك بەرەدى. زاماناۋي تەحنولوگيالاردىڭ ارقاسىندا ءوڭىر تۇرعىندارى تۇرعىلىقتى جەرىنە قاراماستان مىڭداعان شىعارمانى تەگىن وقي الادى. وسىلايشا، وتباسىلىق كىتاپ وقۋ قالادا دا، شالعاي ەلدى مەكەندەردە دە قولجەتىمدى بولادى.
2026 جىلى قازاقستان رەسپۋبليكاسىنىڭ پرەزيدەنتى كىتاپ وقۋ مادەنيەتىن دامىتۋ جانە زەردەلى ۇلت قالىپتاستىرۋ تۋرالى جارلىققا قول قويىپ، وقۋ مادەنيەتىن دامىتۋدى مەملەكەتتىك ساياساتتىڭ باسىم باعىتتارىنىڭ ءبىرى رەتىندە ايقىندادى. قۇجات كىتاپتى ناسيحاتتاۋعا، وقىرماندىق داعدىلاردى دامىتۋعا جانە كىتاپ وقۋدى قوعامدىق قۇندىلىققا اينالدىرۋعا باعىتتالعان ۇزاق مەرزىمدى جۇيەلى جۇمىستى كوزدەيدى.
«وتباسى — كىتاپ وقۋدىڭ العاشقى مەكتەبى. ءار ۇيدە بالا العاش رەت كىتاپتى اشىپ، ويلانۋدى، سۇراق قويۋدى جانە ۇلكەندەردىڭ پىكىرىن قۇرمەتتەۋدى ۇيرەنەدى. سوندىقتان «كىتاپ وقيتىن اۋلەت» باعىتى ءبىز ءۇشىن ەرەكشە ماڭىزعا يە. بىرلەسكەن كىتاپ وقۋ ۇرپاقتار اراسىنداعى بايلانىستى نىعايتۋعا كومەكتەسەدى جانە اتىراۋ وبلىسى وتباسىلارى ءۇشىن جاڭا يگى داستۇرگە اينالادى دەپ سەنەمىز»، — دەدى اتىراۋ وبلىسى اكىمىنىڭ ورىنباسارى شامۋراتوۆ دارىن دۇيسەمبايۇلى.
«كىتاپ وقيتىن ۇلت» وتباسىنان باستالادى. اتا-انالار، بالالار، اجەلەر مەن اتالار ءبىر كىتاپتى وقىپ، ونى بىرگە تالقىلاعاندا، كىتاپ وقۋ مىندەت ەمەس، وتباسىلىق مادەنيەتتىڭ ءبىر بولىگىنە اينالادى. ءدال سوندىقتان «كىتاپ وقيتىن اۋلەت» باعىتى ءبىزدىڭ جوبامىزدا ەرەكشە ورىن الادى. ءبىز كىتاپتىڭ ءاربىر قازاقستاندىق وتباسىنىڭ ومىرىنە قايتا ەنۋىنە جاعداي جاساۋعا ۇمتىلامىز، ال زاماناۋي تسيفرلىق تەحنولوگيالار بۇل ۇدەرىستى ءاربىر ادام ءۇشىن قولجەتىمدى ەتۋگە كومەكتەسەدى»، — دەدى «كىتاپ وقيتىن ۇلت – چيتايۋششايا ناتسيا» قوعامدىق قورىنىڭ اتقارۋشى ديرەكتورى ايان ساكوشەۆ.
ىنتىماقتاستىقتىڭ نەگىزگى باستاماسى — وقۋشىلاردى، ستۋدەنتتەردى، پەداگوگتەردى، اتا-انالاردى، اعا بۋىن وكىلدەرىن جانە تۇتاس وتباسىلاردى بىرىكتىرەتىن «كىتاپ وقيتىن ۇلت» رەسپۋبليكالىق كىتاپ وقۋ مارافونى. ەرەكشە نازار بىرگە كىتاپ وقىپ، ونى تالقىلاپ، اسەرلەرىمەن بولىسەتىن وتباسىلىق كوماندالارعا اۋدارىلادى.
جاقىن ارادا وڭىردە ايماقتىق جوبالىق كەڭسە قۇرىلىپ، ءبىلىم بەرۋ جانە مادەنيەت ۇيىمدارىندا ۇيلەستىرۋشىلەر بەلگىلەنەدى. قاتىسۋشىلاردى تىركەۋگە جانە وقىلعان كىتاپتاردى ەسەپكە الۋعا ارنالعان تسيفرلىق پلاتفورما ىسكە قوسىلادى. سونىمەن قاتار اۋىلدىق جانە شالعاي ەلدى مەكەندەردىڭ تۇرعىندارىن جوباعا تارتۋعا ەرەكشە نازار اۋدارىلادى. بۇل جوباعا قاتىسۋدىڭ ءاربىر وتباسى ءۇشىن قولجەتىمدى بولۋىنا مۇمكىندىك بەرەدى.
