ۇلتتىق كىتاپ كۇنى اپتالىعى اياسىندا «بەسقوناق – كىتاپقا عاشىق ەتۋ امالى» تاقىرىبىندا بولاشاق مۇنايشىلارمەن تاعىلىمدى كەزدەسۋ ءوتتى. ماقساتى – جاستار اراسىندا كىتاپ وقۋ مادەنيەتىن قالىپتاستىرۋ، ۇلتتىق ادەبيەتكە دەگەن قىزىعۋشىلىقتى ارتتىرۋ.
كەزدەسۋگە ەلىمىزگە بەلگىلى قالامگەرلەر قاتىسىپ، ستۋدەنتتەرمەن ەركىن فورماتتا پىكىر الماستى. ادەبي كەش بارىسىندا قالامگەرلەر كىتاپ وقۋدىڭ تۇلعالىق دامۋ مەن وي-ءورىستى كەڭەيتۋدەگى رولىنە ەرەكشە توقتالىپ، قازىرگى قوعامداعى وقىرمان مادەنيەتىن قالىپتاستىرۋدىڭ ماڭىزىن اتاپ ءوتتى.
كىتاپ كۇنى قارساڭىندا س.وتەباەۆ اتىنداعى اتىراۋ مۇناي جانە گاز ۋنيۆەرسيتەتىندە باۋىرجان مومىشۇلىنىڭ «ۇشقان ۇيا» شىعارماسىن وقۋدان بىلىمگەرلەر اراسىندا بايقاۋ ۇيىمداستىرىلدى. ءىس-شارادا بايقاۋ قورىتىندىلانىپ، ۋنيۆەرسيتەت ستۋدەنتى اقپەيىل نۇراۋلەتوۆا جۇلدەگەر اتاندى. جەڭىمپازعا اقىن ەرلان ءجۇنىس ماراپات تابىستاپ، ىزگى تىلەگىن ءبىلدىردى.
ايتا كەتەيىك، بيىل وڭىردە ۇلتتىق كىتاپ كۇنى العاش رەت اپتالىق رەتىندە وتۋدە. اپتالىق اشىق اسپان استىنداعى كىتاپ كورمەسىمەن باستالىپ، وعان 300-گە جۋىق قالا تۇرعىنى قاتىستى. رۋحاني ءىس-شارا اياسىندا «كىتاپ – دوستىق امباسسادورى» اتتى ەلىمىزگە تانىمال قالامگەرلەردىڭ قاتىسۋىمەن ادەبي كەزدەسۋ ءوتىپ، 4 ءىرى ساۋدا ورنى مەن رەسپۋبليكاعا تانىمال باسپالار اراسىندا ىنتىماقتاستىق تۋرالى مەموراندۋمعا قول قويىلدى.
بۇگىن ءىس-شارالار لەگى «كىتاپ FEST» فەستيۆالىمەن قورىتىندىلانادى. فەستيۆالدە 9 تانىمال باسپانىڭ 5000-نان استام كىتابى جەڭىلدەتىلگەن باعامەن ۇسىنىلماق. سونىمەن قاتار جىل بويى ۇزدىك دەپ تانىلعان وقىرماندار مەن كىتاپ كلۋبتارى ارنايى نوميناتسيالارمەن ماراپاتتالادى.
