قازىرگى قوعامنىڭ ەڭ ۇلكەن بايلىعى – ءبىلىمدى دە شىعارماشىل جاس ۇرپاق. ويتكەنى ەلدىڭ بولاشاعى بالالاردىڭ ارمانى مەن قيالىنا تىكەلەي بايلانىستى. سوندىقتان ولاردىڭ شىعارماشىلىق قابىلەتىن اشۋ مەن ساپالى بالالار كونتەنتىن قالىپتاستىرۋ – ءار اتا-انا مەن ۇستازدىڭ، ءتىپتى بۇكىل قوعامنىڭ ورتاق مىندەتى.
بۇگىنگى بالالار بۇرىنعى بۋىننان وزگەشە. ولار تەحنولوگيانى ەركىن مەڭگەرگەن، اقپاراتتى تەز قابىلدايدى جانە ءوزىن ءتۇرلى فورمادا بىلدىرۋگە دايىن. بىراق وسى مۇمكىندىكتىڭ ءبارى دۇرىس باعىتتالماسا، بالانىڭ قيالى مەن قىزىعۋشىلىعى جەلىدەگى بوس اقپاراتتىڭ اراسىندا جوعالىپ كەتۋى مۇمكىن. سوندىقتان ەڭ الدىمەن جاسوسپىرىمدەردىڭ شىعارماشىلىعىن دامىتاتىن ورتا مەن جاعداي قالىپتاستىرۋ ماڭىزدى.
مىسالى، كەيبىر مەكتەپتەردە «شىعارماشىلىق اپتالىعى» سىندى ءتۇرلى ءىس-شارالار ۇيىمداستىرىلادى. وسىنداي شارالاردا بالالار ءوز قولىمەن سۋرەت سالىپ، بەينەروليك ءتۇسىرىپ، شاعىن كورىنىس قويادى. بۇل – ولاردىڭ ويلاۋ قابىلەتىن، جاۋاپكەرشىلىگىن جانە وزىنە دەگەن سەنىمىن ارتتىراتىن تاماشا مۇمكىندىك. مەنىڭ ويىمشا، ءار مەكتەپتە وسىنداي شىعارماشىلىق الاڭدار تۇراقتى تۇردە وتكىزىلسە، بالالاردىڭ الەۋەتى ودان ءارى اشىلار ەدى.
قازىر ينتەرنەت كەڭىستىگىندە ءتۇرلى بالالار ارنالارى بار. دەگەنمەن، ولاردىڭ ءبارى بالانىڭ رۋحاني دامۋىنا اسەر ەتە بەرمەيدى. سول سەبەپتى قازاق تىلىندەگى ساپالى، تاربيەلىك ءمانى بار كونتەنتتىڭ كوبەيۋى – ۋاقىت تالابى. ماسەلەن، “بالاپان” ارناسىنىڭ مۋلتفيلمدەرى مەن “Ozge Epic” سەكىلدى جوبالار ۇلتتىق قۇندىلىقتاردى زاماناۋي فورماتتا ۇسىنادى. مۇنداي كونتەنت بالانىڭ ءتىلىن، ويلاۋىن جانە مادەني ساناسىن قالىپتاستىرۋعا كومەكتەسەدى.
بالالار شىعارماشىلىعىن قولداۋدىڭ تاعى ءبىر جولى – اتا-انانىڭ نازارىندا. ەگەر بالا سۋرەت سالۋعا نەمەسە ۆيدەو تۇسىرۋگە قىزىقسا، ونى توقتاتپاي، كەرىسىنشە، شابىتتاندىرۋ قاجەت. ءبىر قاراعاندا ۇساق كورىنەتىن حوببي بولاشاقتا ۇلكەن جەتىستىككە باستار جول بولۋى مۇمكىن. كوپتەگەن تانىمال سۋرەتشىلەر مەن انشىلەر ءوز جولىن ءدال وسىنداي كىشكەنتاي قىزىعۋشىلىقتان باستاعان.
قورىتا ايتقاندا، شىعارماشىلىق پەن ساپالى كونتەنت – جاس ۇرپاقتىڭ جان دۇنيەسىن بايىتىپ، وي-ءورىسىن كەڭەيتەتىن ەڭ كۇشتى قۇرال. ءار بالا – بولاشاق ونەرتاپقىش، جازۋشى، سۋرەتشى نەمەسە رەجيسسەر بولۋى مۇمكىن. تەك وعان سەنىم مەن مۇمكىندىك بەرۋ كەرەك. ەگەر ءبىز بالالارعا دۇرىس باعىت پەن قولداۋ كورسەتسەك، ولار ءوز شىعارماشىلىعىمەن ەلىن سۇيەتىن، مادەنيەتتى دە رۋحى مىقتى تۇلعا بولىپ وسەدى.
