اتىراۋدا قازاقستان حالقىنىڭ بىرلىگى كۇنى سالتاناتتى تۇردە اتالىپ ءوتتى. سۇلتان بەيبارىس الاڭىندا قالا تۇرعىندارى مەن قوناقتارىنا ارنالعان «بىرلىكتە گۇلدەنگەن ۇلى دالا» اتتى مەرەكەلىك كونتسەرت ۇيىمداستىرىلىپ، وعان جەرگىلىكتى ونەرپازدار قاتىستى.
مەرەكەلىك باعدارلاما «Musicians» ونەر مەكتەبىنىڭ حور ءانسامبلىنىڭ ونەرىمەن باستالدى. قازاق، ورىس، كارىس، ۇيعىر، تاتار، گرۋزين جانە وزبەك ۇلتى وكىلدەرى ساحنادا سالت-داستۇرلەردى پاش ەتىپ، كورەرمەندەرگە «دوستىق ءبيى» اتتى حورەوگرافيالىق كومپوزيتسيا تارتۋ ەتتى. بۇل قويىلىم حالىقتىڭ بىرلىگى پەن ءوزارا تۇسىنىستىگىن ادەمى بەينەلەدى. 
ءوڭىر باسشىسى سەرىك شاپكەنوۆ جينالعانداردى مەرەكەمەن قۇتتىقتاپ، ونىڭ ايرىقشا ماڭىزىن اتاپ ءوتتى. ول بىرلىك پەن كەلىسىم قاعيداتتارى ەلىمىزدىڭ باستى قۇجاتى – قازاقستان رەسپۋبليكاسىنىڭ جاڭارتىلعان كونستيتۋتسياسىندا ناقتى كورىنىس تاپقانىن ايتتى.
– بۇل مەرەكە — ءبىزدىڭ بەيبىتشىلىگىمىزدى، تاتۋلىعىمىزدى پاش ەتەتىن مەرەكە. ءوزىنىڭ قۇندىلىعىنان وتە جوعارى تۇراتىن مەرەكەلەردىڭ ءبىرى. ۇلى دالامىزداعى بەيبىت ءومىر مەن تۇراقتىلىق كوپۇلتتى حالقىمىزدىڭ ءبىر-بىرىنە دەگەن قۇرمەتى مەن اۋىزبىرشىلىگىنىڭ ارقاسىندا ساقتالىپ كەلەدى.
بۇل – اتا-بابادان امانات بوپ قالعان مۇرا. وسىنىڭ ارقاسىندا ەلىمىز بەيبىتشىلىك پەن كەلىسىمنىڭ ۇلگىسىنە اينالدى. بارشاڭىزدى تاعى دا وسى ۇلى مەرەكەمەن قۇتتىقتاي وتىرىپ، دەندەرىڭىزگە ساۋلىق، وتباسىلارىڭىزعا اماندىق تىلەيمىن، – دەدى س. شاپكەنوۆ.
مەرەكەلىك شارا حور ۇجىمدارىنىڭ ونەرىمەن جانە ءداستۇرلى مۋزىكالىق اسپاپتارمەن سۇيەمەلدەنگەن دەفيلە-پوپۋرريمەن جالعاستى.
– بۇل – سان ۇلتتى ءبىر شاڭىراق استىنا توپتاستىراتىن اسا ماڭىزدى مەرەكە. ەلىمىزدە ءاردايىم تۇراقتىلىق پەن كەلىسىم ورناپ، بولاشاققا دەگەن سەنىمىمىز نىعايا بەرسىن! ورتاق قۇندىلىقتارىمىز ءبىزدى بىرىكتىرە ءتۇسىپ، وركەندەۋگە جەتەلەسىن! – دەدى «تاۆروس» ەتنومادەني بىرلەستىگىنىڭ وكىلى يزابەللا گالستيان.
بۇگىندە اتىراۋ وبلىسىندا 50-دەن استام ۇلت وكىلى تۇرادى جانە 18 ەتنومادەني بىرلەستىك جۇمىس ىستەيدى. ولاردىڭ قۇرامىندا اقساقالدار مەن انالار كەڭەستەرى، «جومارت جان» ورتالىعى، جۋرناليستەر كلۋبى، عىلىمي-ساراپتامالىق توپ جانە وزگە دە قۇرىلىمدار بار.
