لاۆكرافتتىڭ كتۋلحۋى، شىن مانىندە، قانداي كەيىپكەر؟
الەم وقىرماندارى ءۇشىن لاۆكرافت ەسىمى، الدىمەن كتۋلحۋدى ەسكە تۇسىرەدى.
سۋرەت اۆتورى: رەيموند بەيلەسس
*اڭىز بويىنشا ەگەر جۇلدىزدار بەلگىلى ءبىر جۇيەمەن، تىزبەكتەلە ورنالاسسا، تەڭىز تۇبىندەگى كتۋلحۋ بوساپ، جەر بەتىنە كوتەرىلەدى. ونىڭ ماقساتى – جەر بەتىندەگى تىرشىلىك يەلەرىنە ءوز بيلىگىن جۇرگىزۋ.
*لاۆكرافت شىعارماشىلىعىن زەرتتەۋشىلەر زۇلىم قۇبىجىقتىڭ ءپروتوتيپى – پولينەزيالىقتار ەپوسىندا ءومىر سۇرەتىن تەڭىز ەلەمەنتىنىڭ قۇدايى – تانگاروا بولعان دەسەدى.
ال اۆتوردىڭ تەڭىز تۇبىندە ۇيىقتاپ جاتقان كتۋلحۋدى سۋرەتتەۋىنىڭ ءوزىن دەنەڭ تىتىركەنبەي وقۋ مۇمكىن ەمەس. ونىڭ قاناتى بار شىرىشتى دەنەسىن سەگىزاياققا دا، ايداھارعا دا ۇقساتۋعا بولادى. ءبىر قاراعاندا ادامعا دا ۇقسايدى دەپ ايتاتىندار بار. قۇرلىقتا دا، سۋدا دا جۇرە الاتىن الىپ قۇبىجىقتىڭ ءبىر ەرەكشە قاسيەتى – تەز قالپىنا كەلەدى. كتۋلحۋدىڭ تەڭىز تۇبىنە قالاي باتقانى تۋرالى سان ءتۇرلى اڭىزدار ايتىلادى. ول ادامداردىڭ ساناسىنا اسەر ەتىپ، ءوزىنىڭ دەگەنىن ىستەتە الادى. الايدا كتۋلحۋ تىنىق مۇحيتىنىڭ تەرەڭىندەگى ر’لايح قالاسىنىڭ قيراندىلارى استىندا تەرەڭ ۇيقىعا كەتكەلى بۇل قابىلەتى السىرەي باستاعان. سونىڭ وزىندە دە ول ادامداردىڭ تۇسىنە كىرىپ، ۇرەيىن ۇشىرىپ، ءتىپتى كەيبىرىن اقىلىنان اداستىرىپ جىبەرەدى. ونىڭ قورقىنىشتى داۋىسىن ەستىگەندەر ءوزىن-ءوزى ولتىرۋگە دەيىن باردى.
«كتۋلحۋ سارىنى» اڭگىمەسى العاش رەت 1928 جىلى اعىلشىندىق Weird Tales جۋرنالىندا جاريالاندى. اۆتور ومىردەن وتكەننەن كەيىن عانا ونىڭ شىعارمالارى تانىمال بولا باستادى.
2005 جىلى وقيعا جەلىسىمەن فيلم ءتۇسىرىلىپ، كومپيۋتەرلىك ويىندار دا قۇراستىرىلعان.
ەستەرىڭىزە سالا كەتەيىك، الەمگە تانىمال فانتاستيكا جانرىنداعى بۇل تۋىندى قازاق تىلىنە اۋدارىلىپ، وقىرمان نازارىنا ۇسىنىلعان بولاتىن.
«ادامزات ءۇشىن بەيمالىم، قۇپيا دۇنيە وتە كوپ. ءار وقىرمان كەيدە قيالىن جەتىلدىرىپ، ويىن باسقا نارسەگە ءبولۋ ءۇشىن، وسىنداي شىعارمالاردى وقۋى كەرەك دەپ ويلايمىن. لاۆكرافت اڭگىمەلەرىنىڭ قاي-قايسىسى دا قورقىنىشتى. فانتاستيكا جانرى بولعاندىقتان، شىنى كەرەك، اۋدارۋ بارىسىندا كەيبىر وقيعالار تۇسىمە كىرەتىن»، – دەيدى اۋدارماشى اقساۋلە بايمەنشە.
امەريكالىق جازۋشى، جۋرناليست گوۆارد فيلليپس لاۆكرافت (1890-1937) رود-ايلەند شتاتىنىڭ پروۆيدەنس قالاسىندا دۇنيەگە كەلگەن. بالا كەزىنەن استرونوميا مەن حيمياعا قىزىعۋشىلىق تانىتىپ، قورقىنىشتى اڭگىمەلەردى وقىعاندى ۇناتقان. شىعارمالارىنىڭ باسىم كوپشىلىگى ميستيكالىق، فانتاستيكالىق جانردا جازىلعان.
لاۆكرافت قۇرعان «تىلسىم دۇنيە فيلوسوفياسى» كلايۆ باركەر، ستيۆەن كينگ، گانس رۋدي گيگەر، نيل گەيمان سياقتى تانىمال قالامگەرلەرگە ەرەكشە اسەر ەتكەن.
«كتۋلحۋ سارىنى» — ف.گ. لاۆكرافتتىڭ قورقىنىشتى حيكايالاردان تۇراتىن اڭگىمەلەر جيناعى. «فوليانت» باسپاسىنان جارىق كورگەن بۇل جيناققا جازۋشىنىڭ «كۇمىس كىلت»، «حەربەرت ۋەست ولگەندەردى تىرىلتەدى»، «مولا» جانە ت.ب. اڭگىمەلەرى ەنگەن.
