كاسپي تەڭىزىنىڭ كەي بولىگىندە سۋ بۇرىنعى جاعالاۋ سىزىعىنان 800 مەترگە دەيىن شەگىنگەن، دەپ حابارلايدى "ادىرنا" caliber.az-عا سىلتەپ.
بۇل تۋرالى ازەربايجاننىڭ مەملەكەتتىك مۇلىك ماسەلەلەرى جونىندەگى قىزمەتى جانىنداعى جىلجىمايتىن مۇلىك كاداسترى جانە ءتىزىلىمى مەملەكەتتىك باسقارماسى توراعاسىنىڭ ورىنباسارى فاريد دجافاروۆ ايتتى.
ونىڭ سوزىنشە، سۋ دەڭگەيىنىڭ تومەندەۋىنە قاراماستان، قۇرعاپ قالعان اۋماقتار بۇرىنعى قۇقىقتىق مارتەبەسىن ساقتايدى جانە تەڭىز اكۆاتورياسىنا جاتادى.
«بۇل – ەداۋىر ۇلكەن اۋماق. الايدا قولدانىستاعى زاڭناماعا سايكەس، اتالعان جەرلەر تەڭىز اكۆاتورياسىنا كىرەدى جانە بۇرىنعى قۇقىقتىق مارتەبەسىن ساقتايدى»، – دەدى فاريد دجافاروۆ كاسپي جاعالاۋىن باسقارۋدى جەتىلدىرۋگە ارنالعان بريفينگتە.
ول كاسپي تەڭىزىنىڭ جاعالاۋ سىزىعى 2016 جىلعى 24 تامىزدا مينيسترلەر كابينەتىنىڭ قاۋلىسىمەن بەكىتىلگەنىن ەسكە سالدى. ال ەنى 20 جانە 50 مەتر بولاتىن جاعالاۋدى قورعاۋ بەلدەۋلەرى مەملەكەتتىڭ ايرىقشا مەنشىگى بولىپ سانالادى.
سونىمەن قاتار فاريد دجافاروۆ جاعالاۋ اۋماقتارىن ايماقتارعا ءبولۋ جانە ولاردىڭ تسيفرلىق كارتاسىن ازىرلەۋ جوسپارلانىپ وتىرعانىن ايتتى. جۇمىس اياقتالعاننان كەيىن ازاماتتار ارنايى كارتا ارقىلى جاعالاۋدى باسقارۋ جۇيەسىنە كىرەتىن اۋماقتار تۋرالى اقپارات الا الادى.
