شىعارمانى جالعىز اۆتور جازبايدى. ورتا، قوعام، وقىرمان - ءبارى شىعارمانىڭ اينالاسىنداعى ورىنداۋشىلار.
مو يان قالاي نوبەلگە جەتتى؟ قىتايدا مو ياننان ارتىق جازۋشى جوق پا؟ بار، جەتەدى. ءۇي حۋا، ۋاڭ مىڭ، جيا پيڭۋا، بۇل ءبىز ەستىپ، بىلگەنى عانا. جازۋشى وتە كوپ، جىلىنا بەس ءجۇز رومان جارىق كورەتىن شىعار، ءتىپتى مىڭ بولار. باسپالاردا دا باسەكەلەستىك جوعارى، وقىرماننىڭ دا تالعامى وسكەن، ءىرى دۇنيەنى تالاپ ەتەدى، ءسىز بەن ءبىزدىڭ ەرتەگىنى مۇرنىنا سۇرتپەيدى.
جالپى، نوبەلگە جەتكەن ەلدەردىڭ بارىندە سونداي. جاقسى ءبىر كىتاپ جازىلسا، وقىرماننىڭ جاپپاي وقۋىمەن-اق جازۋشىنى بايىتىپ تاستايدى. شىن جازۋشى ودان كەيىن ودان ءارى جاقسى دۇنيە جازۋعا تىرىسادى. ءسويتىپ وسە بەرەدى. ەڭ باستىسى باسەكە.
ال بىزدە شە؟ ءوز دەگەنىڭدى ەشقاشان جازا المايسىڭ! جان باعۋ ءۇشىن بىرەسە انانى، بىرەسە مىنانى جازاسىڭ. ونىڭ ءوزى وتسە، باسپالار وڭ كوزىمەن قاراپ ساعان دۇرىس ەسەپ بەرسە، جاقسى. ءبىر ۇلكەن ۇمىتپەن ءبىر نارسە جازاسىڭ، وسى وتەدى، ءارى قاراي اناۋ كوكەيىمدەگىنى جازام دەيسىڭ، قايدا؟؟؟ ول كوكەيىڭدەگى كوكەيىڭدە قالا بەرەدى.
قانشاما تالانتتى قىز، جىگىتتەر بار، شىعارماشىلىققا بارىن سالىپ وتىرۋعا مۇمكىندىك جوق! ءجۇز مىڭ دوللار تىكتىم دەپ، سونىمەن جارىلقايمىن دەپ ويلاماي-اق قوي. ونى بىرەۋ الار، ۇشەۋ الار. قالعان جۇرت نەمەن جازادى؟
وقىرمان قالىپتاسپاي ەشتەڭە وزگەرمەيدى! وزعان ۇلتتاردىڭ ءبارى كىتاپ وقيتىن ۇلتتار، سوسىن الادى دا نوبەلدى.
نوبەلدى مو يان جالعىز العان جوق، بۇكىل قىتاي وقىرمانى، سىنشىلارى، ادەبيەتتانۋشىلارى بىرىگىپ الدى. ماسەلە وسىندا!
مينيسترلىگىڭ بار، باسقاڭ بار، قازاق تىلىنە الەم ادەبيەتىن، فيلوسوفياسىن جاپپاي اۋدارۋ كەرەك، وقىرمان قالىپتاستىرۋ ءۇشىن دەپ قانشا زارلاساڭ دا ارتىنا قىستىرمايدى. قايداعى نوبەل ساعان!
