"ۇلىم مەنى تىڭداماي، جىلىنا 30-50 كىتاپ وقيتىن بولدى" - مينيستر ايماعامبەتوۆ سىر ءبولىستى

3429
Adyrna.kz Telegram

قازاق ەلىنىڭ وقۋ-اعارتۋ ءمينيسترى اسحات ايماعامبەتوۆ ءوز پەرزەنتتەرىن قالاي كىتاپ وقۋعا باۋلىپ، ولارعا قالاي باعىت-باعدار بەرگەنى حاقىندا ءسوز ەتتى. سونىمەن قاتار، ۇلتتىڭ جەتەكشى ۇستازى پاراساتتى قوعام قالىپتاستىرۋدىڭ باستى كىلتى - جاپپاي كىتاپ وقۋ مادەنيەتى ەكەندىگىن ءوز مىسالىندا ايعاقتادى. بۇل تۋراسىندا "ادىرنا" ۇلتتىق پورتالى باياندايدى.

قازاق ەلىنىڭ وقۋ-اعارتۋ ءمينيسترى كىتاپ وقۋ مادەنيەتىنىڭ تال بەسىكتەن باستاپ قالىپتاساتىتسندىعىن جەتكىزدى. ءوز جازباسىنىڭ بەتاشارىندا بۇل جايلى:

بالالىق شاعىمنان قالعان ەستەلىكتەردىڭ ءبىرى - ۇيدەگى كىتاپتارعا تولى ۇلكەن سورەلەر مەن الۋان ءتۇرلى ادەبيەتتەر. ۇيدە كىتاپتاردىڭ بەلگىلى ءبىر سەرياسىنا جازىلۋ نەمەسە كەزەكتى رەت وقىلعان كىتاپتار تۋرالى سونداي ماقتانىشپەن، قىزىعۋشىلىقپەن ايتىلعانى ءالى ەسىمدە. وسىدان بولار مەنىڭ دە ۇيدەگى كىتاپتاردى قايتا وقىپ شىققانىم تاڭقالارلىق ەمەس. ال كەيىنىرەك اۋداندىق كىتاپحانانىڭ تۇراقتى وقىرمانى اتاندىم. بالا كەزىمدە «تاماق ءىشىپ وتىرعاندا كىتاپ وقىماۋ كەرەك» دەگەن ەسكەرتۋدى ءجيى ەستيتىنمىن، -دەپ جازدى.

مينيستر بۇل يگى قۇبىلىستى ءوز شاڭىراعىندا داستۇرگە اينالدىرعانىن جەتكىزدى. مينيستردەن بولەك، قاراپايىم وتاعاسى، اكە رەتىندە ءوز پەرزەنتتەرىن جاتا-جاستانا كىتاپ وقۋعا قالاي باۋلىعانىن تارقاتىپ ايتتى.

- ءوزىم اكە اتانعانىمدا بالالارىما الدىمەن ەرتەگى وقىپ بەردىم، كەيىن ۇلكەن ۇلىم ءوزى وقي باستادى. ەرتەگىلەر مەن شاعىن اڭگىمەلەردەن باستاپ، شىتىرمان وقيعالار، عىلىمي فانتاستيكا جانە كوركەم ەمەس فانتاستيكا سىندى جانرلارعا بىرتىندەپ كوشتىك. 5-سىنىپتان باستاپ ۇلىم جىلىنا 30-50 كىتاپ وقيتىن بولدى. سول كەزدە مەن دە ۇلىما كەشكى اس كەزىندە «كىتاپ وقىما» دەپ ەسكەرتۋ جاساي باستادىم. بالاباقشاعا بارىپ جۇرگەن كەنجە بالام ەرتەگىلەردى، اسىرەسە، «ەركەتاي» مەن «جانىبەك» تۋرالى زاماناۋي قازاق كوميكستەرىن تىڭداعاندى ۇناتادى، – دەيدى اسحات ايماعامبەتوۆ.

اسحات ايماعامبەتوۆ ءوز بالالارىن كىتاپ وقۋعا ەش ماجبۇرلەمەگەن. كىتاپ وقۋ - قىسىممەن ەمەس، قىزىعۋشىلىقپەن قالىپتاساتىن داعدى. ونىڭ ايتۋىنشا، بالا كورگەنىن ىستەيدى. سوندىقتان، اتا-انانىڭ كىتاپ وقىعانى لازىم.

«مەن ءوز تاجىريبەمنەن بالالاردى وقۋعا ماجبۇرلەۋگە بولمايتىنىن ايتا الامىن. بالالارعا قىسىم كورسەتپەي، كەرىسىنشە جەكە مىسالمەن وقۋعا دەگەن سۇيىسپەنشىلىكتى وياتۋ قاجەت. بالا اتا-اناسىنىڭ كىتاپ وقىپ وتىرعانىن كورۋى كەرەك. سوندا عانا قىزىعۋشىلىق پايدا بولادى. كىتاپتار بالانىڭ مىنەزىنە جانە قۇندىلىقتارىنىڭ قالىپتاسۋىنا اسەر ەتەتىنىن دە ەسكەرگەن ءجون. وڭ سيۋجەتتىك جەلىسى بار كىتاپتار جاقسى ادەتتەرگە باۋلىپ، دۇرىس تاربيە بەرەدى. سول سەبەپتى بالالاردى قولداۋ، كىتاپ وقۋعا باۋلۋ، ولارعا كىتاپ ساتىپ الىپ بەرۋ، كىتاپ كورمەلەرىنە بىرگە بارۋ وتە ماڭىزدى»، – دەيدى باس ۇستاز.

سونىمەن قاتار، مينيستر بارلىق تالاپكەرلەردى كىتاپپەن دوس بولۋعا شاقىردى.

- مەرەكە قارساڭىندا وسى جازبانى وقيتىن اتا-انالارعا بالالارعا قىزىقتى كىتاپ وقۋعا كەڭەس بەرۋدى ۇسىنار ەدىم. ولاردىڭ كىتاپ الەمىنە جاساعان ساياحاتى قىزىقتى بولسىن! بارلىق وقۋشىنى كىتاپ وقۋعا كوبىرەك ۋاقىت بولۋگە شاقىرامىن. ويتكەنى، ءبىلىم – ەڭ قۇندى بايلىق، – دەيدى اسحات ايماعامبەتوۆ.

"ادىرنا" ۇلتتىق پورتالى

 

پىكىرلەر