«اتامۇرا» باسپاسىنان قازاقستاننىڭ كورنەكتى مەملەكەت قايراتكەرى، عالىم، زاڭ عىلىمىنىڭ دوكتورى، تاريح عىلىمىنىڭ كانديداتى، پروفەسسور، قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى مۇحتار ابرارۇلى قۇل-مۇحاممەدتىڭ «مەنىڭ اعالارىم» اتتى ەسسەلەر جيناعى جارىق كوردى.
بۇل جيناققا كەيىنگى جيىرما جىل (2005–2025) ىشىندە جازىلىپ، قازاق قاۋىمىنىڭ ىستىق ىقىلاسىنا يە بولعان حالقىمىزدىڭ اسا كورنەكتى مەملەكەت جانە قوعام، عىلىم مەن مادەنيەت قايراتكەرلەرى تۋرالى تاڭداۋلى ەسسەلەرى ەنگىزىلدى.
سەريانىڭ العاشقى ەسسەسى «عۇلاما» اكادەميك ماناش قوزىباەۆقا ارنالدى. اۆتور ۇستاز بەن شاكىرتتىڭ جاراسىمدى سىيلاستىعىن بايانداپ، مەيىرىم مەن شاپاعاتقا بولەنگەن جىلداردان وي قوزعايدى. ال «اقساراعات» ەسسەسى عىلىمي جەتەكشىسى اكادەميك سالىق زيمانوۆتىڭ مايدان مەن عىلىم جولىنداعى جورىقتارىن بايان ەتەدى. سول سياقتى ۇلتتىق عىلىم اكادەمياسىنىڭ پرەزيدەنتى، لەنيندىك سىيلىقتىڭ لاۋرەاتى شاھماردان ەسەنوۆ، اكادەميكتەر رىمعالي نۇرعالي، تورەگەلدى شارمانوۆ، ومىربەك جولداسبەكوۆ، زەينوللا قابدولوۆ، پروفەسسور تەمىربەك قوجاكەەۆ تۋرالى تولعانىستاردىڭ ءاربىرى تەبىرەنىسپەن وقىلادى.
اۆتور «قازاقستاننىڭ حالىق قاھارماندارى» رەيحستاگقا تۋ تىككەن راقىمجان قوشقارباەۆ پەن پارتيزان جازۋشى قاسىم قايسەنوۆ جايىنداعى «جاۋجۇرەك» جانە «قاھارمان» ەسسەلەرىن سۇراپىل سوعىس جىلدارىنداعى كوپشىلىككە بەلگىسىز، ناقتى قۇجاتتارمەن دايەكتەيدى.
سونىمەن قاتار ايتۋلى قوعام قايراتكەرلەرى كامال سمايىلوۆتىڭ، قالتاي مۇحامەدجانوۆتىڭ، شوت-امان ءۋاليحاننىڭ عيبراتتى عۇمىرلارى شالقار شابىتپەن قاعازعا تۇسكەن. كەيىنگى كەزەڭدە زور ىزدەنىسپەن جازىلىپ، وقىرماندار ىقىلاسىنا بولەنگەن زەرتتەۋى قازاقتىڭ عۇلاما جازۋشىسى مۇحتار اۋەزوۆتىڭ ۇلى، مەملەكەت جانە قوعام قايراتكەرى، مادەنيەتتانۋشى مۇرات مۇحتارۇلى اۋەزوۆكە ارنالعان. بۇل ەسسەدە كەيىپكەردىڭ بالالىق شاعىنان باستالعان ءومىر جولى كوركەم سۋرەتتەلەدى. «اسىلزادا» ەسسەسى – اۆتوردىڭ قولىنا العاش قالام ۇستاتىپ، «الىپپەدەن» بۇرىن قاسيەتتى «قۇراندى» وقىتقان اكەسى ابرار اكەتايۇلىنا سيامەن سومداعان ەسكەرتكىشى.
قازاقتىڭ حح عاسىردىڭ سوڭى مەن ءححى عاسىردىڭ باسىنداعى ايتۋلى ون بەس تۇلعاسىن قامتىعان بۇل كىتاپ – وقىرماندار قولىنا تيەتىن مول قازىنا.
