جاسمين تاستان ەسىمدى شىمكەنتتىك تۇلەك ۇبت-دا 120 بالل العان ەدى. الايدا قابىلداۋ كوميسسياسىنىڭ قاتەلىگىنەن تەگىن ءبىلىم الۋ مۇمكىندىگىنەن ايىرىلىپ قالدى. الايدا، بۇل ماسەلە شەشىلدى، دەپ حابارلايدى “ادىرنا” ۇلتتىق پورتالى.
تۇلەكتىڭ اتا-اناسى وقۋ ورنىنىڭ باسشىلىعى مەن عىلىم جانە جوعارى ءبىلىم مينيسترلىگىنە شاعىم تۇسىرەدى. كەيىن بۇل ماسەلە الەۋمەتتىك جەلىدە ءبىرشاما رەزونانس تۋدىرادى.
عىلىم جانە جوعارى ءبىلىم مينيسترلىگى بۇل ماسەلەنى تەز ارادا نازارعا الىپ، شۇعىل شەشىم قابىلدادى. وعان ءوزى قالاعان ۋنيۆەرسيتەتتەن گرانت بولىنەتىن بولدى.
“عىلىم جانە جوعارى ءبىلىم مينيسترلىگى ماماندارى بۇگىن بۇل ماسەلەنى نازارعا الىپ، شۇعىل شەشىم قابىلدادى. ءمينيستردىڭ كەڭەسشىسى تۇلەكتىڭ اتا-اناسىمەن سويلەسىپ، كەتكەن قاتەلىك ءۇشىن مينيستر مەن مينيسترلىكتىڭ اتىنان كەشىرىم سۇرادى. تەز ارادا تەحنيكالىق قاتەلىك تۇزەتىلىپ، تالاپكەر تاستان جاسمين قۋانىشقىزى ءۇشىن سۇلەيمەن دەميرەل اتىنداعى ۋنيۆەريسيتەتكە گرانت بولىنەتىن بولدى. سونداي-اق، ول جاتاقحانامەن قامتىلادى.
ال، قۇجات قابىلداۋدا قاتەلىك جىبەرگەن م.اۋەزوۆ اتىنداعى وڭتۇستىك قازاقستان ۋنيۆەرسيتەتى قابىلداۋ كوميسسياسىنىڭ مامانىنا «سوگىس» بەرىلدى”، دەپ جازدى قر عىلىم جانە جوعارى ءبىلىم ءمينيسترى ساياسات نۇربەك.
عىلىم جانە جوعارى ءبىلىم ءمينيسترى ساياسات نۇربەك اپپارات باسشىلارىنا جانە جوعارعى وقۋ ورىندارى رەكتورلارىنا تالاپكەرلەر مەن تەستىلەۋگە قاتىسۋشىلاردىڭ قۇجاتتارىن قابىلداۋ بارىسىندا مۇقيات بولۋدى ەسكەرتتى.
“ادىرنا” ۇلتتىق پورتالى
