شىمكەنتتە ەكى جىل بويى ازاماتتاردى «مەملەكەتتىك باعدارلامامەن پاتەر الۋعا كومەكتەسەمىن» دەپ الداپ كەلگەن تۇرعىنعا قاتىستى سوت شەشىمى شىقتى. بۇل تۋرالى شىمكەنت قالالىق پوليتسيا دەپارتامەنتىنىڭ ءباسپاسوز قىزمەتى جاريالادى، دەپ حابارلايدى “ادىرنا” ۇلتتىق پورتالى.
الاياقتىڭ ارباۋىنا 21 تۇرعىن ءتۇسىپ، جالپى سوماسى 34 ملن اقشا بەرگەن.
«الاياقتىقتى كاسىپ ەتكەن 27 جاستاعى ايەل قالا اۋماعىندا سوعىلىپ جاتقان كوپقاباتتى تۇرعىن ۇيلەردەن تانىسى ارقىلى پاتەر الىپ بەرە الاتىنىن ايتىپ، ءوزىن جارنامالاعان. وسىلايشا، تۇرعىنداردىڭ سەنىمىنە كىرىپ، اقشالارىن ءوز پايداسىنا جاراتىپ وتىرعان» دەلىنگەن قالالىق پد حابارلاماسىندا.
سونداي-اق بالالارىن قاراتۋ ءۇشىن ۇيىنە جۇمىسقا العان كەلىنشەكتىڭ بانك كارتاسىن الداپ سۇراپ الىپ، ۇيالى تەلەفونىنا ونىڭ قوسىمشاسىن ورناتىپ قويعان. ال جابىرلەنۋشىلەر بەرگەن اقشانىڭ ءبارى سول كارتاعا ءتۇسىپ وتىرعان. كەلىنشەكتىڭ بۇل الاياقتىق ارەكەتتى بىلگەن ساتتە پوليتسياعا ارىزدانعان.
بۇدان وزگە، باسقا جابىرلەنۋشىلەردەن العان اقشانى كەزدەيسوق ادامدارعا ءوتىنىش جاساپ، بانكوماتتاردان شەشىپ جۇرگەن.
«كۇتكەن ۇيىنە قول جەتكىزە الماي، الدانعانىن بىلگەن تۇرعىندار پوليتسياعا ارىزدانعان. ءتارتىپ ساقشىلارىمەن جۇرگىزىلگەن جەدەل-ىزدەستىرۋ جۇمىستارى بارىسىندا، كۋالەردەن جاۋاپ الىپ، سۇراستىرۋ جۇمىستارى جۇرگىزىلدى. سونداي-اق بانكتىك اۋدارىمدار تەكسەرىلىپ، ايەلدىڭ الاياقتىق ءىسى دالەلدەندى. سوت شەشىمىمەن قىلمىستىق ءىس جاساعانى ءۇشىن ايەل 4 جىلعا سوتتالدى» دەلىنگەن حابارلامادا.
ءوز كەزەگىندە ءتارتىپ ساقشىلارى ازاماتتارعا الاياقتىڭ ارباۋىنا ءتۇسىپ قالماۋ ءۇشىن، بەيتانىس تۇلعالارعا ارتىق سەنىم تانىتپاي، كۇماندى قىزمەت ۇسىنىسىنا ەرمەۋىنە شاقىرادى. ءۇي ماسەلەسى جونىندە ارنايى مەملەكەتتىك مەكەمەگە جۇگىنۋگە كەڭەس بەرەدى.
”ادىرنا” ۇلتتىق پورتالى
